តើអ្នកស្រឡាញ់រថយន្តរបស់អ្នក ហើយមិនចង់ឲ្យវាឆាប់ចូលជាងណាស់មែនទេ ? ប៉ុន្តែអ្នកមិនទាន់ដឹងថា អ្វីដែលកំពុងធ្វើអាចបណ្តាលឲ្យរថយន្តសំណព្វចិត្តរបស់អ្នកឆាប់ខូច ។ នេះជាទម្លាប់អាក្រក់៥យ៉ាងដែលអ្នកអាចធ្វើដោយមិនដឹងខ្លួន និងឆ្ងល់ថា ហេតុអ្វីបានជារថយន្តចេះតែឆាប់ខូច ៖
១-ជិះទាល់តែសាំងនៅបាតធុង ៖
មានអ្នកខ្លះទម្លាប់ខ្ជិលចាក់សាំងព្រោះយល់ថា សាំងនៅសល់ក្នុងធុងខ្លះដែរ ។ ទង្វើនេះ ធ្វើឲ្យឆាប់ខូចប្រព័ន្ធទុយោបូមសាំងនៅក្នុងធុងសាំង។ ជាទូទៅ ប្រព័ន្ធទុយោនេះអាចរក្សាគុណភាព នៅពេលមានសាំងគ្រប់គ្រាន់អាចលិចវាបាន ។ កាលណាអ្នកជិះទាំងធុងមានសាំងសល់ត្រឹមបាត វាធ្វើឲ្យទុយោសាំងឆាប់ខូចមុនអាយុកាលកំណត់ ដែលតម្រូវឲ្យប្តូរវា ។ ដូចនេះ ចូរកុំទុកឲ្យសាំងសល់ដល់បាតធុងតទៅទៀត ត្រូវឆាប់ចាក់បំពេញកាន់តែល្អ ។
២-ឆាប់ដាក់លេខទៅក្រោយលឿនពេក ៖
វាកើតឡើងនៅពេលអ្នកកំពុងស្ថិតក្នុងចំណតរថយន្ត ដែលតម្រូវឲ្យដាក់លេខទៅមុខ-ក្រោយភ្លាមៗដើម្បីចូលចត ។ ការដាក់លេខទៅក្រោយ-មុខលឿនពេក ក៏អាចធ្វើឲ្យរថយន្តឆាប់ខូចផងដែរ ។ បើចង់ថយក្រោយ អ្នកគួរបង្អង់សិន ហើយចាំដាក់លេខថយក្រោយ មិនមែនកំពុងតែទៅមុខ ស្រាប់តែដាក់លេខថយក្រោយភ្លាមនោះទេ ។
៣-រោទ៍ម៉ាស៊ីនទាំងវាមិនទាន់ក្តៅស្រួល ៖
អ្នកប្រហែលគិតថា ការរោទ៍ម៉ាស៊ីនឮពេលបញ្ឆេះហើយភ្លាមអាចជួយឲ្យម៉ាស៊ីនឆាប់ក្តៅហើយជិះស្រួល ។ វាមិនមែនជាវិធីដ៏ល្អឡើយ។ ការរោទ៍ភ្លាមៗក្រោយពេលម៉ាស៊ីនឆេះ គឺធ្វើឲ្យកម្តៅនៅក្នុងម៉ាស៊ីនឡើងភ្លាមៗ ហើយវាត្រូវប្រឈមមុខនឹងការខូចលឿន ។ អ្វីគួរធ្វើ គឺត្រូវបញ្ឆេះចោលធម្មតារយៈពេល៦០វិនាទីមុននឹងធ្វើដំណើរ ដើម្បីរក្សាអាយុកាលម៉ាស៊ីនបានយូរ ។
៤-ជាន់ហ្វ្រាំងឈប់ភ្លាមៗ ៖
ការជាន់ហ្វ្រាំងឈប់ភ្លាមៗអាចបណ្តាលមកពីការជាន់ទៅមុខលឿនពេក ដែលធ្វើឲ្យហ្វ្រាំងរថយន្តខំប្រឹងទប់ល្បឿនជាបន្ទាន់ ។ វាអាចធ្វើឲ្យស្បែកហ្វ្រាំងរថយន្តឆាប់សឹក ។
៥-ដឹកធ្ងន់ពេក ៖
កាលណារថយន្តដឹកកាន់តែធ្ងន់ ម៉ាស៊ីនក៏ខំប្រឹងរត់ បូមទ្រុតទាប ហើយហ្វ្រាំងក៏ប្រឹងចាប់ ជាពិសេស ស៊ីសាំងជាងមុន ។ អ្វីគួរធ្វើ គឺត្រូវយករបស់របរគ្មានប្រយោជន៍ចេញពីក្នុងរថយន្តឲ្យអស់ ដើម្បីកាត់បន្ថយទម្ងន់លើរថយន្ត ។
សរុបមក គ្មាននរណាម្នាក់មានចេតនាចង់ឲ្យរថយន្តឆាប់ខូចទេ ប៉ុន្តែពេលខ្លះទង្វើរបស់យើងបណ្តាលឲ្យវាឆាប់ខូច ។ ដូចនេះ គួរតែឈប់ប្រព្រឹត្តទង្វើមិនល្អខាងលើ ដើម្បីឲ្យរថយន្តប្រើប្រាស់បានយូរ អស់ប្រាក់តិច និងមិនចូលជាង ៕
ចែករំលែកព័តមាននេះ