តាមទ្រឹស្តី ម៉ាស៊ីនកម្លាំងសេសតិច មិនមែនសុទ្ធតែស៊ីសាំងតិចជាងម៉ាស៊ីនកម្លាំងសេសធំនោះទេ ។ រថយន្តមានកម្លាំងសេសធំ អាចនឹងសន្សំប្រេងបានច្រើនជាងម៉ាស៊ីនតូចក្នុងករណីមួយចំនួន។
ឧទាហរណ៍ ម៉ាស៊ីនតូចចាស់ៗប្រើប្រាស់យូរ ដែលមានកម្ទេចដែកនៅក្នុងម៉ាស៊ីន និងរចនាឡើងដោយមិនទាន់សម័យ ព្រមទាំងគ្មានប្រព័ន្ធគ្រប់គ្រងចែកចាយប្រេងបានល្អ អាចនឹងស៊ីសាំងច្រើនជាងម៉ាស៊ីនធំ ដែលទើបតែប្រើប្រាស់ថ្មីៗ ជាមួយការរចនាដោយប្រើប្រាស់វត្ថុធាតុដើមស្រាល ប្រព័ន្ធគ្រប់គ្រងចែកចាយប្រេងល្អ និងការពារតួម៉ាស៊ីនខាងក្នុងមិនឲ្យសឹកចេញកម្ទេចដែក ។
ម្យ៉ាងវិញទៀត ម៉ាស៊ីនតូចអាចងាយនឹងជួបប្រទះការដឹកលើសសមត្ថភាព ។ នៅពេលម៉ាស៊ីនខំប្រឹងធ្វើការលើសទម្ងន់ដែលគេកំណត់មក វានឹងស៊ីប្រេងជាងធម្មតា និងឆាប់ខូច ។ ចំពោះម៉ាស៊ីនធំវិញ យើងចង់ជិះច្រើននាក់ក៏បានដែរ ព្រោះកម្លាំងខ្លាំងអាចទ្រាំទ្រនឹងទម្ងន់បានច្រើន ។
លើសពីនេះ មានកត្តាផ្សេងៗជាច្រើនដែលធ្វើឲ្យយើងមិនអាចកំណត់ថា ម៉ាស៊ីនធំស៊ីច្រើនជាង ឬម៉ាស៊ីនតូចស៊ីច្រើនជាងទេ ។ វារួមមាន របៀបនៃការបើកបរ ការថែរក្សាម៉ាស៊ីនរថយន្ត និងចរាចរណ៍លើផ្លូវជាដើម ។
សរុបមក ទំហំម៉ាស៊ីននៅតែអាចកំណត់បាននូវអត្រាស៊ីសាំងដដែល គ្រាន់តែអាស្រ័យលើកត្តាផ្សេងទៀតដូចបានរៀបរាប់ខាងលើ ៕
ចែករំលែកព័តមាននេះ