រាជធានីភ្នំពេញ ៖ ប៉ុន្មានឆ្នាំចុងក្រោយនេះ ទីផ្សារទូរស័ព្ទស្មាតហ្វូនមានការរីកចម្រើនខ្លាំងគួរឲ្យកត់សម្គាល់ ពិសេសយុវវ័យភាគច្រើនមានស្មាតហ្វូនក្នុងដៃ ។ យ៉ាងណាក៏ដោយ បើនិយាយពីស្មាតហ្វូនមួយទឹក ដែលដាក់លក់
រាជធានីភ្នំពេញ ៖ ប៉ុន្មានឆ្នាំចុងក្រោយនេះ ទីផ្សារទូរស័ព្ទស្មាតហ្វូនមានការរីកចម្រើនខ្លាំងគួរឲ្យកត់សម្គាល់ ពិសេសយុវវ័យភាគច្រើនមានស្មាតហ្វូនក្នុងដៃ ។ យ៉ាងណាក៏ដោយ បើនិយាយពីស្មាតហ្វូនមួយទឹក ដែលដាក់លក់នៅលើទីផ្សារកម្ពុជាសព្វថ្ងៃវិញ ហាក់ដូចជាស្ងប់ស្ងាត់ជាងឆ្នាំមុនៗ ខណៈអ្នកខ្លះយល់ថា មកពីស្មាតហ្វូននាំចូលពីចិនមានតម្លៃធូរថ្លៃ ហើយលក្ខខណ្ឌនៃការទិញស្មាតហ្វូនថ្មី ក៏ងាយស្រួលដូចជា តាមរយៈការបង់រំលស់ជាដើម ដែលជាហេតុធ្វើឲ្យការលក់ស្មាតហ្វូនមួយទឹកធ្លាក់ចុះ ។
អាជីវករលក់ទូរស័ព្ទនៅផ្សារឃ្លាំងរំសេវ លោក យុន ឧត្តម បានឱ្យដឹងថា ការលក់ទូរស័ព្ទសព្វថ្ងៃនេះ ពិតជាធា្លក់ចុះមែន ។ លោកថា ក្នុង១ថ្ងៃ លោកអាចលក់បានតែ១ឬ២គ្រឿងប៉ុណ្ណោះ ហើយថ្ងៃខ្លះអត់តែម្ដង ខុសប្លែកពីគ្រាមុនៗ ក្នុង១ថ្ងៃយ៉ាងហោចណាស់ ក៏លក់បានពី៥ទៅ៦គ្រឿងដែរ ។
លោកថា ៖ « ការស្ងាត់ភ្ញៀវមកទិញនេះ មិនមែនតែតូបខ្ញុំទេ សូម្បីតែអាជីវករលក់ ឬបោះដុំទូរស័ព្ទនៅផ្សារឃ្លាំងរំសេវផ្សេងទៀត ក៏ជួបបញ្ហាដូចគ្នានេះដែរ » ។
ការធ្លាក់ចុះនេះ លោកយល់ថា អាចមកពីទីផ្សារឥឡូវទូលំទូលាយជាងមុន ព្រោះទីណាក៏មានហាងលក់ទូរស័ព្ទមួយទឹក ដែលខុសពីឆ្នាំកន្លងទៅ បើគេចង់ទិញស្មាតហ្វូនមួយទឹក គេនឹកឃើញដល់ផ្សារឃ្លាំងរំសេវ ។ ម្យ៉ាងទៀត បច្ចុប្បន្ន យុវវ័យខ្មែរបានធ្វើចំណាកស្រុកច្រើន ដូច្នេះ អតិថិជនក៏អាចបាត់បង់ទៅតាមហ្នឹងខ្លះដែរ ។
ទោះបីជាការលក់ធ្លាក់ចុះ ប៉ុន្តែសម្រាប់ទីផ្សារស្មាតហ្វូនមួយទឹកនេះ លោក យុន ឧត្តម លើកឡើងថា វាងាយស្រួលលក់ជាងទូរស័ព្ទថ្មី ប៉ុន្តែស៊េរីទាប ជាពិសេស ទូរស័ព្ទម៉ាកអាយហ្វូន និងសាមស៊ុងទទួលបានការគាំទ្រច្រើន ព្រោះតម្លៃសមរម្យអាចអតិថិជនទិញយកទៅប្រើប្រាស់ លេងហ្វេសប៊ុក និងមើលព័ត៌មានបាន ។
អ្នកនាង ដានី អាជីវករបោះដុំស្មាតហ្វូនមួយទឹក ឱ្យដឹងថា ៖ « បច្ចុប្បន្ននេះ ការលក់រាយ និងបោះដុំ គឺស្ងាត់ភ្ញៀវចូលទិញដូចគ្នា » ។ អ្នកនាងបន្តថា ៖ « ខ្ញុំអង្គុយ១ព្រឹកហើយ មិនទាន់មានអ្នកមកកៅឆាយសោះ មិនដឹងថាមកពីមូលហេតុអ្វីបានជាស្ងាត់ភ្ញៀវបែបនេះ មិនដូចពេលមុនសោះ » ។
ចំណែកអ្នកស្រី ហោ ស្រីណេត អាជីវករលក់ស្មាតហ្វូនមួយទឹកដែរ បានឱ្យដឹងថា រាល់ថ្ងៃ មិនសូវមានភ្ញៀវមកទិញទូរស័ព្ទទេ ។ ការលក់បានរាល់ថ្ងៃ ដោយសារមានម៉ូយស្គាល់ច្រើនដែលគេចេះតែមកជួយទិញប៉ុណ្ណោះ ។
ម្ចាស់ហាងលក់ទូរស័ព្ទមួយនៅម្ដុំផ្សារកណ្ដាល លោកឡុង សុវណ្ណ បានឲ្យដឹងតាមទូរស័ព្ទនាថ្ងៃទី៥ កក្កដា ថា ការលក់ស្មាតមួយទឹកឥឡូវ មិនដូចកាលពី៣ឬ៤ឆ្នាំមុនទេ ខណៈដែលបច្ចុប្បន្នទីផ្សារលក់តាមអនឡាញកំពុងកើនឡើងខ្លាំង ធ្វើឲ្យបាត់ចំណែកទីផ្សារខ្លះសម្រាប់អ្នកលក់តាមហាងដែលពួកគេលក់តាមប្រពៃណី ។
ចំណែកការដែលទីផ្សារវាធ្លាក់ចុះនេះ លោកគិតថា ៖« ដោយសារតែកត្ដាមួយចំនួនដូចជា ក្រុមហ៊ុន ឬហាងខ្លះចាប់ផ្ដើមលក់ផលិតផលថ្មីដោយបង់រំលស់តាមស្ថាប័នហិរញ្ញវត្ថុហើយស្មាតហ្វូនថ្មីៗខ្លះមានតម្លៃសមល្មម អាចថតរូបបាន លេងអីុនធើរណេតបាន និងមានការធានាត្រឹមត្រូវទៀតផង ដូច្នេះបើគេថ្លឹងថ្លែងទៅ លើតម្លៃលើសខ្វះគ្នាតិចតួច គេប្រាកដជាជ្រើសរើសយកផលិតផលថ្មី អីចឹងហើយបានជាការលក់ស្មាតហ្វូនមួយទឹកឥឡូវថមថយ » ៕
ចែករំលែកព័តមាននេះ