រាជធានីភ្នំពេញ ៖ លោក ឃួង ស្រេង អភិបាលនៃគណៈអភិបាលរាជធានីភ្នំពេញ នៅព្រឹកថ្ងៃទី០៥ កក្កដា២០១៧នេះ បានដឹកនាំកិច្ចប្រជុំជាលើកដំបូងបន្ទាប់ពីប្រកាសតែងតាំងរួចកាលពីពេលថ្មីៗនេះ ជាមួយមន្ត្រីពាក់ពន្ធ័សំខាន់ៗក្រោមឱវាទរដ្ឋបាលរាជធានីភ្នំពេញ ដោយផ្តោតសំខាន់លើបញ្ហាកិច្ចការពារសន្តិសុខសុវត្ថិភាពជូនប្រជាពលរដ្ឋក្នុងរាជធានី។ លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានឲ្យដឹងក្រោយកិច្ចប្រជុំខាងលើនេះថា កិច្ចប្រជុំនោះបានដាក់ចេញជាការងារមួយចំនួន ដើម្បីឲ្យអាជ្ញាធរថ្នាក់ខណ្ឌ និងសមត្ថកិច្ចពាក់ពន្ធ័ គណៈបញ្ជាការឯកភាពរាជធានីភ្នំពេញអនុវត្តឲ្យមានប្រសិទ្ធភាព។
លោកបានបន្តថា កិច្ចប្រជុំនេះ ផ្តោតសំខាន់លើការងាររៀបចំសណ្តាប់ធ្នាប់សាធារណៈ ជាពិសេសការតាំងលក់ដូរលើចិញ្ចើមផ្លូវ ការចតយានយន្តលើទ្រូងផ្លូវ ការរឹតបន្តឹងឡានដឹកដី ចេញចូលរាជធានីភ្នំពេញ ដាច់ខាតត្រូវតែមានច្បាប់ ក្នុងនោះជម្រុញឲ្យឡានដឹកដីត្រូវគិតពីការលាងកង់រថយន្តចេញពីការដ្ឋាន និងគ្របឲ្យបានត្រឹមត្រូវជាដើម។ លោក ម៉េត មាសភក្តី បានឲ្យដឹងទៀតថា ពាក់ព័ន្ធនឹងបញ្ហាគ្រឿ្ញងញៀន គឺជាចំណុចបញ្ហអាទិភាពដែលអាជ្ញាធរត្រូវយកចិត្តទុកដាក់ ដើម្បីទប់ស្កាត់ទៅនឹងការជួញដូរ ការចែកចាយនិងការប្រើប្រាស់ ដែលជាសំណូមពរ និងកង្វល់របស់ប្រជាពលរដ្ឋ ចំពោះបញ្ហាសន្តិសុខ រួមមានករណីឆក់ ប្លន់ អភិបាលរាជធានីបានដាក់វិធានការឲ្យអាជ្ញាធរពាក់ព័ន្ធត្រូវយកចិត្តទុកដាក់បង្ក្រាបឲ្យបានទាន់ពេលវេលា ជាពិសេសការឆែកអាវុធជាតិផ្ទុះ ដែលត្រូវចាប់ផ្តើមអនុវត្តសារជាថ្មី ល្បែងស៊ីសង ដែលជ្រកនៅក្រោមស្លាកសញ្ញាផ្សេងៗ ដែលការលេងល្បែងអាចជាកត្តានាំឲ្យកើតមាន បទល្មើសផ្សេងៗ។
អ្នកនាំពាក្យរដ្ឋបាលរាជធានីភ្នំពេញ បានបញ្ជាក់ថា ចំពោះបញ្ហាចរាចរណ៍ អភិបាលរាជធានីភ្នំពេញបានស្នើឲ្យស្នងការនគរបាលរាជធានី បន្ថែមកម្លាំងសមត្ថកិច្ចដើម្បីធ្វើចរាចរណ៍ទៅតាមគោលដៅកកស្ទះ និងនៅតាមស្តុបក្នុងរាជធានី ព្រមទាំងបានសំណូមពរឲ្យធ្វើការពិនិត្យមើលអាជីវកម្មហាងផឹកស៊ីមួយចំនួនដែលបង្កការរំខានដល់ប្រជាពលរដ្ឋរស់នៅក្បែរខាង ដោយសំណូមពរឲ្យមន្ទីរទេសចរណ៍ ដែលចេញច្បាប់អនុញ្ញាតអាជីវកម្មត្រូវចុះពិនិត្យឲ្យបានទៀងទាត់។ គួរបញ្ជាក់ថា កិច្ចប្រជុំនេះ គឺជាលើកដំបូងបន្ទាប់ពី លោក ឃួង ស្រេង ត្រូវបានប្រកាសតែងតាំងជាអភិបាលនៃគណៈអភិបាលរាជធានីភ្នំពេញ កាលពីថ្ងៃទី២៨កន្លងមកថ្មីៗនេះ ជាមួយអភិបាលរងរាជអភិបាលធានីភ្នំពេញចំនួន៦រូបទៀត ដោយមានការចូលរួមពី ស្នងការរាជធានី តំណាងកងរាជអាវុធហត្ថរាជធានី អភិបាលខណ្ឌទាំង១២ មន្ទីរក្រោមឱវាទ មន្ត្រីពាក់ពន្ធ័សំខាន់ៗជាច្រើនរូបទៀត៕
ចែករំលែកព័តមាននេះ