រាជធានីភ្នំពេញ ៖ បើគ្មានអ្វីកែប្រែនោះទេ សមាជិកសភាគណបក្សប្រជាជនកម្ពុជានឹងលើកដៃធ្វើវិសោនកម្មច្បាប់ស្តីពីគណបក្សនយោបាយនៅពេលខាងមុនដ៏ខ្លីនេះ ដើម្បីបញ្ចប់ជីវិតនយោបាយរបស់លោកសម រង្ស៊ី អតីតប្រធានគណបក្សសង្គ្រោះជាតិ ដែលតែងតែជួយដល់គណបក្សប្រឆាំងនេះដោយប្រយោល ។ នេះបើតាម លោកឡេង ប៉េងឡុង អ្នកនាំពាក្យរដ្ឋសភា ។
លោកបានបញ្ជាក់ថា៖ «ច្បាប់នេះ មកដល់រដ្ឋសភាហើយយើងកំពុងតែរៀបចំប្រជុំគណៈកម្មាធិការអចិន្ត្រៃយ៍រដ្ឋសភា ដើម្បីប្រជុំពិនិត្យសេចក្តីស្នើសុំច្បាប់នេះ។ យើងនឹងប្រជុំថ្ងៃស្អែក (ទី៦ កក្កដា) ប្រជុំគណៈអចិន្ត្រៃយ៍ ដើម្បីដាក់ទៅគណៈកម្មការជំនាញដើម្បីគណៈកម្មការជំនាញសិក្សាស្រាវជ្រាវធ្វើសេចក្តីសន្និដ្ឋានទៅគណៈអចិន្ត្រៃយ៍វិញថា គួរដាក់ក្នុងរបៀបវារៈនៃសម័យប្រជុំពេញរដ្ឋសភា ឬយ៉ាងណា» ។
ចំពោះសេចក្តីស្នើវិសោនកម្មច្បាប់ ដែលមានបំណងកំចាត់លោកសម រង្ស៊ី អតីតប្រធានគណបក្សសង្គ្រោះជាតិ កុំឲ្យមកលូកដៃឬផ្តល់យោបល់ដល់គណបក្សសង្គ្រោះជាតិនោះ ត្រូវបានលោកឡេង ប៉េងឡុង អះអាងថា សមាជិកសភាគណបក្សប្រជាជនកម្ពុជានឹងលើកដៃអនុម័តហើយ ព្រោះមានប្រយោជន៍ និងមានការប្រញាប់ ។
អ្នកនាំពាក្យរដ្ឋសភារូបនេះបានគូសបញ្ជាក់ថា៖ «គេនឹងអនុម័តហើយ ព្រោះខ្ញុំថារដ្ឋសភា និងអនុម័តនៅថ្ងៃខាងមុខនេះហើយ ។ អនុម័តក្នុងពេលឆាប់ៗនេះ ព្រោះថាច្បាប់នេះ ជាការប្រញាប់រដ្ឋសភាធ្វើនីតិវិធីប្រញាប់ អីចឹងយើងធ្វើភ្លាមៗ អត់មានពន្យាពេលទេ»។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានលើកឡើងថា លោកសម រង្ស៊ី បានបញ្ចប់ជីវិតនយោបាយដោយខ្លួនឯង ។
លោកបានបញ្ជាក់ថា៖ «នៅថ្ងៃទី១១ កុម្ភៈ សម រង្ស៊ី ស្រាប់តែដាក់ពាក្យសុំឈប់ពីតំណែងប្រធានគណបក្សសាង្គ្រោះជាតិ និងពីសមាជិកគណបក្សផង ដោយមូលហេតុផ្ទាល់ខ្លួន ធ្វើឲ្យមានការភ្ញាក់ផ្អើលដល់សាធារណៈមតិទូទៅ ។ ដូច្នេះ នៅមិននៅ សម រង្ស៊ី បានយកកាំបិតអារ.កសម្លាប់ជីវិតនយោបាយខ្លួនឯងដោយផ្ទាល់ មិនបាច់អ្នកណាច្រាន ឬបង្ខិតបង្ខំអ្វីទេ» ។
ទាក់ទិនវិសោធនកម្មច្បាប់គណបក្សនយោបាយនេះដែរ អ្នកនាំពាក្យគណបក្សសង្គ្រោះជាតិ លោកយ៉ែម បុញ្ញាឬទ្ធិ ធ្លាប់អះអាងថាលោកនឹងចូលរួមពិនិត្យ និងពិភាក្សាលើកស្នើសំណើរវិសោនកម្មច្បាប់នេះ ។ នៅថ្ងៃនេះដែរ កោះសន្តិភាពមិនអាចសុំការអត្ថាធិប្បាយពីលោកយ៉ែម បុញ្ញាឬទ្ធិបានទេ ដោយទូរស័ព្ទរបស់លោកគ្មានអ្នកទទួល។
សូមរំលឹកថា សម្តេចតេជោ ហ៊ុន សែន នាយករដ្ឋមន្ត្រី កាលពីថ្ងៃទី២៨ មិថុនា ក្នុងខួបលើកទី៦៦ឆ្នាំនៃថ្ងៃបង្កើតគណបក្សប្រជាជនកម្ពុជា បានប្រកាសស្នើធ្វើវិសោធនកម្មច្បាប់ស្ដីពីគណបក្សនយោបាយបន្ថែមទៀត ដែលសម្តេចថា ដើម្បីរារាំងកុំឱ្យទណ្ឌិតលូកលាន់កិច្ចការរបស់គណបក្សនយោបាយ ។
ចែករំលែកព័តមាននេះ