គ្រូពេទ្យបរទេសមកព្យាបាលជំងឺដោយឥតគិតថ្លៃ(មានវីដេអូ)
ខេត្តពោធិ៍សាត់ ៖ ជារៀងរាល់ឆ្នាំរោងចក្រកាត់ដេរ តៃអ៊ីហ្ស៊ី នៅស្រុកក្រគរ
ខេត្តពោធិ៍សាត់ ៖ ជារៀងរាល់ឆ្នាំរោងចក្រកាត់ដេរ តៃអ៊ីហ្ស៊ី នៅស្រុកក្រគរ
ខេត្តពោធិ៍សាត់ ៖ ជារៀងរាល់ឆ្នាំរោងចក្រកាត់ដេរ តៃអ៊ីហ្ស៊ី នៅស្រុកក្រគរដែលមានលោកឧកញ៉ាលឹម ជា ជានាយកក្រុមហ៊ុននោះតែងតែនាំយកគ្រូពេទ្យពីបរទេសមកព្យាបាលជូនកម្មករ កម្មការិនី និងប្រជាពលរដ្ឋដោយឥតគិតថ្លៃ ។ ជាក់ស្ដែងឆ្នាំ២០១៧នេះរោងចក្របាននាំគ្រូពេទ្យស្ម័គ្រចិត្តខ្មែរចំនួន៤៦រូប និងគ្រូពេទ្យចិនតៃវ៉ាន់៨៥រូបមកពិនិត្យ និងព្យាបាលជំងឺជូនកម្មករ កម្មការិនី និងបងប្អូនប្រជាពលរដ្ឋទាំងក្មេងចាស់ប្រុសស្រីដោយឥតគិតថ្លៃ ។
តំណាងក្រុមហ៊ុនរោងចក្រកាត់ដេរតៃអ៊ីហ្ស៊ីបានជំរាបជូនថា ដោយយល់ឃើញសុខភាពជាកត្តាចំបងហើយពេលឈឺម្ដងៗបងប្អូនខ្វះខាតថវិការក្នុងការព្យាបាលជំងឺនោះ ក្រុមហ៊ុនបានជួលគ្រូពេទ្យបរទេសមកពិនិត្យ និងព្យាបាលជំងឺជូនបងប្អូនដោយឥតគិតថ្លៃជារៀងរាល់ឆ្នាំ ហើយនេះគឺជាលើកទី០៦ហើយ ។ ការព្យាបាលមានរយៈពេល០៣ថ្ងៃគឺថ្ងៃទី០៤-០៥និងទី០៦ ខែកក្កដា ឆ្នាំ២០១៧ លើជំងឺជាច្រើនប្រភេទមានដូចជា ជំងឺសរសៃ ជំងឺមាត់ធ្មេញ ភ្នែក ជំងឺគ្រឿងក្នុង សន្លាក់ ព្យាបាលបែបចលនានិងចាក់ម្ជុលវិទ្យាសាស្ត្រជាដើម ។
លោក ប៊ិន វណ្ណា អភិបាលស្រុកក្រគរបានថ្លែងអំណរគុណចំពោះលោកឧកញ៉ា លឹម ជា នាយកក្រុមហ៊ុនរោងចក្រកាត់ដេរតៃអ៊ីហ្ស៊ីដែលបាននាំយកគ្រូពេទ្យខ្មែរ និងបរទេសសុទ្ធតែមានបទពិសោធន៍ និងជំនាញច្បាស់លាស់មកពិនិត្យ និងព្យាបាលជំងឺជូនដល់កម្មករ កម្មការិនី និងបងប្អូនប្រជាពលរដ្ឋនៅក្នុងស្រុកក្រគរនាពេលនេះ ។ សូមបញ្ជាក់ថា ក្នុងមួយថ្ងៃក្រុមគ្រូពេទ្យព្យាបាលជំងឺជូនប្រជាពលរដ្ឋបានចំនួន២.០០០នាក់ ដូច្នេះរយៈពេល៣ថ្ងៃនេះគឺបាន៦.០០០នាក់ ។ បន្ទាប់ពីបញ្ចប់ការព្យាបាលជំងឺនៅរោងចក្រកាត់ដេរក្នុងស្រុកក្រគរខេត្តពោធិ៍សាត់នេះ ក្រុមគ្រួពេទ្យទាំងអស់នឹងបានទៅទស្សនាប្រាសាទអង្គរវត្តឆ្នេរសមុទ្រ និងរមណីដ្ឋានធម្មជាតិសំខាន់ៗមួយចំនួនទៀតក្នុងប្រទេសកម្ពុជាយើងផងដែរ ៕
ចែករំលែកព័តមាននេះ