រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានផ្ញើលិខិតចំនួនពីរច្បាប់ដាច់ដោយឡែកពីគ្នា ទៅកាន់ប្រធានអង្គការពីរ ឱ្យបញ្ឈប់សកម្មភាពបន្ទប់ស្ថានការណ៍ជាបន្ទាប់ ព្រោះវាព្រោះផ្ទុយពីច្បាប់សមាគម និងអង្កការមិនមែនរដ្ឋាភិបាល។
យោងតាមលិខិតពីរដាច់ដោយឡែកពីគ្នារបស់សម្តេច ស ខេង ផ្ញើជូនលោកគល់ បញ្ញា នាយកប្រតិបត្តិអង្គការខុមហ្វ្រែល (COMFREL) និងលោកសំ គន្ធាមី ប្រធានអង្គការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរីនៅកម្ពុជា ហៅកាត់ថា (NICFEC) ចុះថ្ងៃថ្ងៃទី០៤ ខែកក្កដា ថាការបង្កើតបន្ទប់ស្ថានការណ៍ស្តីអំពីការបោះឆ្នោតជ្រើសរើសក្រុមប្រឹក្សាឃុំ-សង្កាត់ ឆ្នាំ២០១៧ ដោយមានការចូលរួមពីអង្គការ និងសមាគមប្រមាណចំនួន៤០ ជាសមាជិក «គឺអនុវត្តផ្ទុយទៅនឹងបទប្បញ្ញត្តិនៃច្បាប់ស្តីពីសមាគម និងអង្គការមិនមែនរដ្ឋាភិបាល» ។
លិខិតដែលមានន័យដូចគ្នាបានបញ្ជាក់ថា៖ «ចំពោះសេចក្តីថ្លែងការណ៍របស់បន្ទប់ស្ថានការណ៍ គឺមិនមានតម្លៃគតិយុត និងមិនបានឆ្លុះបញ្ចាំងពីអព្យាក្រឹត្យភាពដូចមានចែងក្នុងមាត្រា ២៤ នៃច្បាប់ស្តីអំពីសមាគម និងអង្គការមិនមែនរដ្ឋាភិបាល» ។
សម្តេច ស ខេង បានសង្កត់ធ្ងន់ក្នុងលិខិតទាំងពីរថា អង្គការទាំងពីរ «ត្រូវបញ្ឈប់សកម្មភាពខុសច្បាប់របស់បន្ទប់ស្ថានការណ៍ និងត្រូវអនុវត្តសកម្មភាពរបស់ខ្លួនឲ្យបានត្រឹមត្រូវ ស្របតាមច្បាប់ស្តីពីសមាគម និងអង្គការមិនមែនរដ្ឋាភិបាលច្បាប់ និងលិខិតបទដ្ឋានគតិយុត្តនានាជាធរមាន» ។
យោងតាមមាត្រា២៤នៃច្បាប់ ស្តីពីសមាគម និងអង្គការមិនមែនរដ្ឋាភិបាលចែងថា អង្គការមិនមែនរដ្ឋាភិបាលក្នុងស្រុក អង្គការមិនមែនរដ្ឋាភិបាលបរទេស ឬសមាគមបរទេស ត្រូវប្រកាន់ជំហរអព្យាក្រឹត្យ ចំពោះគ្រប់គណបក្សនយោបាយនៅព្រះរាជាណាចក្រកម្ពុជា ។
លិខិតដែលសម្តេច ស ខេង បានផ្ញើកាន់ប្រធានអង្កការទាំងនោះ ក្រោយពីមានការបញ្ជាដោយផ្ទាល់មាត់របស់សម្តេច តេជោ ហ៊ុនសែន នាយករដ្ឋមន្ត្រីឱ្យក្រសួងមហាផ្ទៃពិនិត្យតាមផ្លូវច្បាប់លើបណ្ដុំអង្គការសង្គមស៊ីវិល ធ្វើការងារទាក់ទងការងារបោះឆ្នោត ឬហៅថា បន្ទប់ស្ថានការណ៍ ព្រោះពួកគេបានធ្វើឲ្យបរិយាកាសនៃការបោះឆ្នោតមានលក្ខណៈអាប់អួរ ដូច្នេះ ត្រូវពិនិត្យផ្លូវច្បាប់ចំពោះបន្ទប់ស្ថានការណ៍ ដើម្បីចៀសវាងធ្វើឲ្យមានស្ថានការណ៍វឹកវរនៅក្នុងប្រទេសកម្ពុជា ។
សូមបញ្ជាក់ថា លិខិតរបស់សម្តេចក្រឡាហោម ស ខេង នៅពេលនេះ ជាការឆ្លើយតបទៅនឹងសេចក្ដីប្រកាសព័ត៌មានរបស់អង្គការ អង្គការសង្គមស៊ីវិលពីរ គឺអង្គការខុមហ្វ្រែល និងអង្គការនិចហ្វិក កាលចុងខែមិថុនា ដែលអះអាងថា បន្ទប់ស្ថានការណ៍ គឺជាវេទិកាអព្យាក្រឹត្យឥតលម្អៀង ។ ជាងនេះ បន្ទប់ស្ថានការណ៍នេះ បានវាយតម្លៃចំពោះដំណើរការបោះឆ្នោតឃុំ-សង្កាត់ មិនទាន់មានភាពល្អប្រសើរនៅឡើយនោះទេ ។
មន្ត្រីផ្នែកច្បាប់នៃអង្គការខុមហ្វ្រែល លោកយឿង សុធារ៉ា បានសរសេរក្នុងហ្វេសប៊ុករបស់លោកដោយលើកឡើងថា លិខិតរបស់ក្រសួង គឺរឹតត្បិតសិទ្ធិ និងសេរីភាព ។
លោកបានបញ្ជាក់ថា៖ «សម្រាប់ខ្ញុំ នេះគឺការរិតដ្បិតសិទ្ធិ និងសេរីភាពនៃការចូលរួម និងសិទ្ធិប្រមូលផ្តុំរបស់អង្គការសង្គមស៊ីវិលក្នុងការឃ្លាំមើលដំណើរការបោះឆ្នោតនៅកម្ពុជា និងសិទ្ធិចូលរួមក្នុងដំណើរការនៃការអនុវត្តលទ្ធិប្រជាធិបតេយ្យនៅកម្ពុជា ។ វាអាចនឹងធ្វើអោយជិះឥទ្ធិពលអវិជ្ជមានសម្រាប់លំហរប្រជាធិបតេយ្យនៅកម្ពុជា» ។
ចែករំលែកព័តមាននេះ