រាជធានីភ្នំពេញ ៖ ចាប់ពីថ្ងៃទី១ ខែសីហា ឆ្នាំ២០១៧ខាងមុខ រាល់បារីដែលបិទតែមចាស់ នឹងមិនអនុញ្ញាតឲ្យចរាចរណ៍លក់នៅក្នុងទីផ្សារឡើយ។ ក្នុងករណីមិនគោរពតាម ត្រូវចាត់ទុកជាការគេចវេះពន្ធ និងអំពើរាំងស្ទះ ហើយអ្នកពាក់ព័ន្ធ ត្រូវរងការផ្តន្ទាទោសច្បាប់ស្តីពីសារពើពន្ធ ដោយត្រូវទទួលពិន័យជាប្រាក់ ឬជាប់ពន្ធនាគារឬត្រូវទទួលទោសទាំងពីរ ។ នេះបើយោងតាមមន្ត្រីជាន់ខ្ពស់អគ្គនាយកដ្ឋានពន្ធដារ ។
ប្រតិភូរាជរដ្ឋាភិបាលទទួលបន្ទុកអគ្គនាយក នៃអគ្គនាយកដ្ឋានពន្ធដារ លោក គង់ វិបុល បានថ្លែងក្នុងឱកាសចុះពិនិត្យការផលិតបារីនៅក្រុមហ៊ុន ប្រ៊ីធីស អឺមើរីខិន ថឺប៊ែកខូ ខេមបូឌា(British American Tobacco Cambodia)នាព្រឹកថ្ងៃទី៣ កក្កដា កន្លងមកថា ការចុះនាពេលនេះ គឺដើម្បីពិនិត្យមើលការអនុវត្តតែមបារីឬតែមសារពើពន្ធថ្មី ដែលក្រសួងសេដ្ឋកិច្ច និងហិរញ្ញវត្ថុបានចេញសេចកី្តប្រកាសកាលពីខែធ្នូ ឆ្នាំ២០១៦កន្លមកមក ហើយអគ្គនាយកដ្ឋានពន្ធបានចេញនូវសារាចរណ៍ណែនាំមួយ ស្តីពីការអនុវត្តតែមបារីនៅក្នុងខែមករា ឆ្នាំ២០១៧ គឺមានន័យថា ចាប់ពីខែសីហាខាងមុខ គ្រប់សហគ្រាសដែលផលិតបារីក្នុងស្រុក និងទាំងនាំចូល គឺត្រូវមកទិញសន្លឹកតែមថ្មីយកទៅបិទ ដែលហៅថា អនុវត្តនូវសន្លឹកតែមថ្មី ។ ចំណែក សន្លឹកតែមចាស់ គឺពិនិត្យឃើញថា គុណភាពនៃសន្លឹកតែមអាចក្លែងបន្លំបាន និងងាយស្រួលក្នុងការថតចម្លង ហើយការដាក់ឲ្យអនុវត្តកន្លងទៅនេះ ឃើញថា អត់សូវមានប្រសិទ្ធភាពទេ ។ ដូច្នេះបានជាក្រសួងសេដ្ឋកិច្ច និងហិរញ្ញវត្ថុ ធ្វើការកែទម្រង់ ក៏ដូចជាអគ្គនាយកដ្ឋានពន្ធដារកែទម្រង់នូវការបោះពុម្ពសន្លឹកតែម ដើម្បីឲ្យសហគ្រាស និងរោងចក្រទាំងអស់ដែលផលិតបារីនៅក្នុងស្រុក ក៏ដូចជានាំចូល ត្រូវតែអនុវត្តទិញសន្លឹកតែមថ្មីនេះ ។
លក្ខណៈពិសេសនៃសន្លឹកតែមអាករប្រភេទថ្មី មានដូចជា គុណភាពខ្ពស់ ត្រូវបានកែសម្រួលទាំងរូបភាព និងគុណភាព សុវត្ថិភាពខ្ពស់ បច្ចេកវិទ្យាទំនើប មិនងាយក្នុងការផលិតក្លែងក្លាយ និងមានរំលេចនូវ QRcode ខុសពីសន្លឹកតែមអាករប្រភេទចាស់ ។
សម្រាប់បារីផលិតក្នុងស្រុក អគ្គនាយកដ្ឋានពន្ធដារបានផលិតសន្លឹកតែមអាករដែលសម្គាល់ដោយ Serial Number និងលេខរៀងខុសៗគ្នាសម្រាប់ក្រុមហ៊ុននីមួយៗ ដែលជាមូលដ្ឋានងាយស្រួលក្នុងការគ្រប់គ្រង និងត្រួតពិនិត្យ ។
ក្នុងឱកាសនោះ លោក គង់ វិបុល ក៏បានអំពាវនាវ និងជូនដំណឹងដល់ម្ចាស់សហគ្រាសផលិតផលបារីក្នុងស្រុក ក៏ដូចជាម្ចាស់សហគ្រាសនាំបារីចូល ម្ចាស់ដេប៉ូបារីចែកចាយបន្ត ម្ចាស់ស្តង់លក់បារីក្នុងផ្សារ ម្ចាស់ផ្សារទំនើបទាំងឡាយ សូមមេត្តាចូលរួមក្នុងការបំពេញកាតព្វកិច្ចសារពើពន្ធឲ្យបានត្រឹមត្រូវ ជៀសវាងការលក់បារីទាំងឡាយដែលពុំមានបិទតែមអាករថ្មី ។ ក្នុងករណីមិនគោរពតាម ត្រូវចាត់ទុកជាការគេចវេះពន្ធ និងអំពើរាំងស្ទះ ហើយអ្នកពាក់ព័ន្ធត្រូវរងការផ្តន្ទាទោសតាមមាត្រា១៣៣ មាត្រា១៣៥ និងមាត្រា១៣៦ នៃច្បាប់ស្តីពីសារពើពន្ធ ដោយត្រូវទទួលពិន័យជាប្រាក់ពី១០លានរៀល ឬជាប់ពន្ធនាគារពី១ឆ្នាំដល់៥ឆ្នាំ ឬត្រូវទទួលទោសទាំងពីរ ។
តំណាងក្រុមហ៊ុន ប្រ៊ីធីស អឺមើរីខិន ថឺប៊ែកខូ ខេមបូឌា លីមីតធីត លោករតនា បានបញ្ជាក់ថា ៖ « សន្លឹកតែមថ្មីនេះមានគុណភាពប្រសើរជាងមុនឆ្ងាយណាស់ ។ ដូច្នេះ មិនអាចមានក្រុមហ៊ុនណាអាចក្លែងបន្លំបានទេ » ។
ការចុះពិនិត្យរោងចក្រផលិតបារីខាងលើនេះ ធ្វើឡើងក្នុងគោលបំណងពង្រឹងការគ្រប់គ្រង និងប្រមូលចំណូលពន្ធ ក៏ដូចជាទប់ស្កាត់ការគេចវេះ និងបន្លំពន្ធ បន្ទាប់ពីក្រសួងសេដ្ឋកិច្ច និងហិរញ្ញវត្ថុ បានចេញសារាចរណ៍ណែនាំសី្តពីការអនុវត្តការប្រើប្រាស់តែមអាករប្រភេទថ្មី សម្រាប់ការបង់អាករ ពិសេសលើកញ្ចប់បារី ។
លោកវេជ្ជបណ្ឌិត មុំ គង់ ប្រធានអង្គការចលនាដើម្បីសុខភាព បានថ្លែងថា អគ្គនាយកដ្ឋានពន្ធដារសម្រេចបែបនេះ ជាការធ្វើឡើង ដើម្បីងាយសម្គាល់ពីបារីដែលមានចរាចរណ៍លើទីផ្សារ ហើយនេះជំហានដ៏ល្អ ប៉ុន្តែលោកស្នើសុំឲ្យគ្រប់បារីនាំចូលទាំងអស់ទាំងពីប្រទេសចិន និងកូរ៉េ បិទស្លាកសញ្ញាព្រមានសុខភាពផងដែរ ព្រោះលោកសង្កេតឃើញបារីនាំចូលពីបណ្តាប្រទេសទាំងនោះ ធ្វើឡើងដោយសេរីមិនមានបិទស្លាកសញ្ញាព្រមានសុខភាពនោះទេ ។
ជាមួយគ្នានេះលោកថា ៖« រាជរដ្ឋាភិបាលគួរដំឡើងពន្ធលើបារីនាំចូល និងបារីផលិតក្នុងស្រុកផងដែរ ព្រោះការដំឡើងពន្ធបារី ជានយោបាយឈ្នះឈ្នះ គឺរាជរដ្ឋាភិបាលប្រមូលពន្ធបានកាន់តែច្រើន និងកាត់បន្ថយអត្រាឈឺ និងស្លាប់ដោយសារបារីនៅកម្ពុជាកាន់តែច្រើន » ។
យោងតាមរបាយការណ៍អង្គការសុខភាពពិភពលោកបានរកឃើញថា ក្នុង១ឆ្នាំកម្ពុជាមានមនុស្សស្លាប់ប្រមាណជាង១ម៉ឺននាក់ដោយសារបារី ហើយបើគិតជា១ថ្ងៃ គឺមានមនុស្សស្លាប់៣០នាក់ ។ លោកវេជ្ជបណ្ឌិត មុំ គង់ បានបន្តថា តាមអនុសាសន៍របស់ធនាគារពិភពលោក បានជំរុញឲ្យរដ្ឋាភិបាលនីមួយៗយកពន្ធបារី៧០%នៃតម្លៃដើមលើតម្លៃបារីលក់រាយនៅក្នុងទីផ្សារ ហើយវិធានការនេះបានអនុវត្តរួចហើយដែរនៅប្រទេសថៃ និងសិង្ហបុរី ប៉ុន្តែនៅកម្ពុជាការយកពន្ធលើថ្នាំជក់គឺនៅតែទាប ធៀបជាមួយបណ្តាប្រទេសក្នុងតំបន់អាស៊ាន ។
រាជរដ្ឋាភិបាលបច្ចុប្បន្នយកពន្ធលើបារីជិត៣០%នៃតម្លៃមូលដ្ឋាន សម្រាប់បារីផលិតក្នុង ស្រុក និងជាង៣០%សម្រាប់បារីនាំចូលពី បរទេស ៕
ចែករំលែកព័តមាននេះ