រាជធានីភ្នំពេញ ៖ ដូនជីម្នាក់ដែលស្ថិតក្នុងស្ថានភាពជរា និងមានជំងឺស្លាប់មួយចំហៀងខ្លួន ស្នាក់នៅក្នុងវត្ដឧត្ដរាវតី សង្កាត់ឫស្សីកែវ ខណ្ឌឫស្សីកែវ បានត្រូវជនអគតិ៥នាក់ចូលទៅចាប់រំលោភសេពសន្ថវៈម្នាក់ម្ដងៗ រហូតបានសំរេចគ្រប់គ្នា ខណៈពេលដូនជីរូបនោះសំរាន្ដនៅក្នុងតូបរៀនធម៌ក្នុងវត្ដតែម្នាក់ឯង និងគ្មានលទ្ធភាពការពារខ្លួន សូម្បីតែរើបំរះនោះ ។ ហេតុការណ៍ដែលមិននឹកស្មានដល់ និងគួរឱ្យថ្កោលទោសនេះ បានបង្កឱ្យមានការភ្ញាក់ ផ្អើលកាលពីវេលាម៉ោង៦ និង៣០នាទីព្រឹក ថ្ងៃទី១១ ឧសភា នៅពេលដែលស្ដ្រីម្នាក់ទៅដាំបបរឱ្យលោកយាយក៏ប្រទះឃើញ លោកយាយដេកក្នុងស្ថានភាពអាក្រាតននលគក ហើយសារុងរបស់គាត់ត្រូវក្រុមជនដៃ ដល់បោះចោលនៅមុខតូបសំណាក់ ។ ដូនជីដែលរងគ្រោះដោយក្រុមជនអន្ធពាលចាប់រំលោភនេះឈ្មោះលី លៀង អាយុ៧៨ឆ្នាំ ស្នាក់នៅរៀនធម៌ក្នុងតូបមួយនៅផ្នែកខាងជើងបរិវេណវត្ដឧត្ដរាវតី ។
ដូនជីរូបនោះ ពិការមួយចំហៀងខ្លួន ដោយជំងឺលើសឈាម និងពុំអាចនិយាយរៀបរាប់អ្វីកើតក្រៅតែ ពីធ្វើកាយវិការពីហេតុការណ៍នេះឡើយ។ អ្វីដែលគួរឱ្យអាណោចអាធ័មសំរាប់លោកយាយ គឺបន្ទាប់ពីទទួលរងនូវការរំលោភ សេពសន្ថវៈ គាត់គិតតែពីយំ និងរៀបរាប់ ដោយធ្វើដៃបញ្ជាក់ពីសកម្មភាពជនចំនួន៥នាក់ បានចូលមកខ្ទប់មាត់គាត់ និងរំលោភសេពសន្ថវៈយ៉ាងព្រៃផ្សៃបំផុត។ ជាមួយនឹងសកម្មភាពចាប់រំលោភនេះ ដែរក្រុមជនដៃដល់បានលួចយកកង្ហារមួយគ្រឿង និងបានដើរលក់ឱ្យប្រជាពលរដ្ឋទៀតផង ។ តាមរយៈការដើរលក់កង្ហារនេះត្រូវបានគេស្គាល់សមាសភាពជនដៃដល់ហើយ គឺជាអ្នករស់នៅក្នុងភូមិមិត្ដភាព សង្កាត់ទឹកថ្លា ខណ្ឌឫស្សីកែវ ។ តាមស្ដ្រីម្នាក់ឈ្មោះអឿន រ៉ា អាយុ៤១ឆ្នាំ ដែលជាអ្នកជួយមើលថែដូនជីរូបនេះ បានឱ្យដឹងថា នៅវេលាម៉ោង៦ និង៣០នាទី ព្រឹកថ្ងៃទី១១ ឧសភា នោះខណៈរូបគាត់ទៅដាំបបរឱ្យដូនជីដូចសព្វមួយដង ស្រាប់តែប្រទះឃើញដូនជីដែលត្រូវគេចាប់រំលោភនេះដេកស្ដូកស្ដឹងទាំងខ្លួនប្រាណអាក្រាតក្រៅមុងនៅយ៉មុខតូប ។
គាត់បន្ដថា នៅក្បែរពាងទឹកមុខតូបគាត់ ក៏ឃើញសារុងរបស់ដូនជី ដែលត្រូវជនដៃដល់សំរាតបោះចោលធ្លាក់នៅទីនោះ ។ អំពើដ៏លាមកថោកទាបនេះបាន ធ្វើឱ្យមានការភ្ញាក់ផ្អើលដល់ព្រះសង្ឃ និងដូនជីផ្សេងទៀតបាននាំគ្នាទៅមើល និងសួរនាំពីសកម្មភាពចាប់រំលោភយ៉ាងឃោរឃៅនេះ ។ តាមប្រភពព័ត៌មានបានបង្ហាញថា ក្រុមជនអគតិទាំងនោះជាក្មេងស្ទាវ និងបានចាប់រំលោភដូនជីនៅចន្លោះពីម៉ោង១ទៅម៉ោង២ រំលងអធ្រាត្រឈានចូលថ្ងៃទី១១ ខែឧសភា នៅពេលដូនជីរូបនេះសំរាន្ដក្នុងមុងនៅ យ៉មុខតូប ។ បន្ទាប់ពីធ្វើសកម្មភាពរំលោភម្នាក់ម្ដងៗហើយ ក្រុមជននេះក៏បានធ្វើសកម្មភាពលួចយកកង្ហារមួយគ្រឿងរបស់គាត់ទៅបាត់ទៀត ។ តាមការរៀបរាប់របស់អ្នកជិតខាងបាន ឱ្យដឹងថាដូនជី លី លៀង បានស្នាក់នៅរៀនធម៌ក្នុងវត្ដនេះរយៈពេលប្រមាណជាង១០ឆ្នាំមកហើយ ដោយលោកយាយពុំមានកូនចៅឡើយ មានតែក្មួយ និងអ្នកភូមិដែលចេញចូលមើលថែរក្សា បន្ទាប់ពីមានជំងឺ លើសឈាមស្លាប់មួយចំហៀងខ្លួនកាលពីខែ តុលា ឆ្នាំ២០០៩កន្លងមក ។
ប្រជាពលរដ្ឋជាពុទ្ធបរិស័ទចំណុះជើងវត្ដ និងព្រះសង្ឃបាន សំណូមពរដល់សមត្ថកិច្ចគ្រប់ជាន់ថ្នាក់ សូមជួយធ្វើអន្ដរាគមន៍ស្រាវជ្រាវចាប់ជនដៃដល់មកកាត់ទោសតាមច្បាប់ឱ្យខាងតែបាន ។ តាមសមត្ថកិច្ចមូលដ្ឋានបានឱ្យដឹងថា មានការអះអាងថា មានករណីចាប់រំលោភសេពសន្ថវៈនេះពិតប្រាកដមែន តែពុំទាន់មានបងប្អូន ឬបុគ្គលរូបណាមួយទៅដាក់ពាក្យបណ្ដឹងនៅឡើយទេ ទោះបីជាបែបណាសមត្ថកិច្ចមិនព្រងើយកន្ដើយនោះឡើយ ។
ចែករំលែកព័តមាននេះ