កិច្ចសហការរួមគ្នាកម្ពុជា-វៀតណាម ចាប់ខ្លួនជនសង្ស័យគ្រឿងញៀ.នជាង៣,០០០នាក់ ក្នុងឆ្នាំ២០២២
ទីក្រុងហូជីមិញ ៖ លោកឧត្តមសេនីយ៍ត្រី ង្វៀន វ៉ាន់វៀន ប្រធាននាយកដ្ឋាននគរបាលស៊ើបអង្កេតបទល្មើសគ្រឿងញៀន, លោក វរសេនីយ៍ឯក ដូ ង៉ុកកាញ់…
ទីក្រុងហូជីមិញ ៖ លោកឧត្តមសេនីយ៍ត្រី ង្វៀន វ៉ាន់វៀន ប្រធាននាយកដ្ឋាននគរបាលស៊ើបអង្កេតបទល្មើសគ្រឿងញៀន, លោក វរសេនីយ៍ឯក ដូ ង៉ុកកាញ់…
ទីក្រុងហូជីមិញ ៖ លោកឧត្តមសេនីយ៍ត្រី ង្វៀន វ៉ាន់វៀន ប្រធាននាយកដ្ឋាននគរបាលស៊ើបអង្កេតបទល្មើសគ្រឿងញៀន, លោក វរសេនីយ៍ឯក ដូ ង៉ុកកាញ់ ប្រធាននាយកដ្ឋានបង្ការ និងប្រឆាំងគ្រឿងញៀន បញ្ជាការដ្ឋានកងទ័ពការពារព្រំដែន នៃសាធារណៈរដ្ឋសង្គមនិយមវៀតណាម និងលោកឧត្តមសេនីយ៍ទោ ឃឹង សារ៉ាត់ ប្រធានមន្ទីរប្រឆាំងគ្រឿងញៀន អគ្គស្នងការដ្ឋាននគរបាលជាតិ ក្រសួងមហាផ្ទៃ នៃព្រះរាជាណាចក្រកម្ពុជា ធ្វើជាសហប្រធាន ក្នុងកិច្ចប្រជុំទ្វេភាគី “កម្ពុជា-វៀតណាម” លើកទី០៣ នៅទីក្រុងហូជីមិញ ចាប់ពីថ្ងៃទី០៤ ដល់ទី០៧ ខែមករា ឆ្នាំ២០២៣ ។
កិច្ចប្រជុំលើកទី០៣នេះ ធ្វើឡើងក្នុងបរិយាកាស នៃសាមគ្គីភាព មិត្តភាព ពិសេសកិច្ចសហប្រតិបត្តិការ និងការយោគយល់គ្នាទៅវិញទៅមក ដែលបង្ហាញពីការខិតខំប្រឹងប្រែង និងការប្តេជ្ញាចិត្តខ្ពស់របស់ភាគីទាំង២ ក្នុងការប្រយុទ្ធប្រឆាំងនឹងបទល្មើសគ្រឿងញៀនឆ្លងដែន ដើម្បីរក្សាស្ថិរភាព សន្តិសុខសណ្តាប់ធ្នាប់នៅតាមព្រំដែន រួមចំណែកអភិវឌ្ឍន៍សេដ្ឋកិច្ច នៃប្រទេសទាំងពីរ ។
យោងតាមសារព័ត៌មាន Vietnamnews ចុះផ្សាយនៅថ្ងៃទី០៦ ខែមករានេះថា របាយការណ៍ដែលបង្ហាញក្នុងសន្និសីទលើកទី៣ រវាងកងកម្លាំងនគរបាលវៀតណាម និងកម្ពុជា ប្រឆាំងបទល្មើសគ្រឿងញៀន កិច្ចសហប្រតិបត្តិការរបស់ប្រទេសទាំង២ លើការប្រយុទ្ធប្រឆាំងរួមគ្នា បង្ក្រាបបានជាង ២,០០០ករណី និងចាប់ខ្លួនជនសង្ស័យជាង ៣,០០០នាក់ ក្នុងឆ្នាំ២០២២ ។
កម្លាំងនគរបាលវៀតណាម និងកម្ពុជា បំបែកសំណុំរឿងធំៗចំនួន ០៤ករណី និងបានឃាត់ខ្លួនឧក្រិដ្ឋជន ០២នាក់ ជាមេខ្លោងជួញដូរគ្រឿងញៀនដ៏ធំបំផុត ។ តាមការស៊ើបអង្កេតបឋមបង្ហាញថា ពួកគេបានដឹកជញ្ជូនគ្រឿងញៀនរាប់តោន ចូលប្រទេសវៀតណាម ។
ឧត្តមសេនីយ៍ត្រី ង្វៀន វ៉ាន់វៀន ប្រធាននាយកដ្ឋាននគរបាលស៊ើបអង្កេតគ្រឿងញៀន ហៅកាត់ថា C04 បាននិយាយនៅក្នុងកិច្ចប្រជុំនេះថា “ប្រសិនបើ មិនមានការសម្របសម្រួលដោយរលូនរវាងភាគីទាំងពីរ និងការប្តេជ្ញាចិត្តខ្ពស់របស់ប៉ូលិសកម្ពុជាទេ នោះការចាប់ខ្លួនឧក្រិដ្ឋជនគ្រឿងញៀន នឹងពិបាកខ្លាំងណាស់” ។
ឧត្តមសេនីយ៍ទោ ឃឹង សារ៉ាត់ ប្រធានមន្ទីរប្រឆាំងគ្រឿងញៀន ក្រសួងមហាផ្ទៃ មានប្រសាសន៍ថា ការផ្លាស់ប្តូរព័ត៌មានរវាងប្រទេសទាំងពីរ នៅថ្នាក់ជាតិ និងថ្នាក់មូលដ្ឋានមានប្រសិទ្ធភាព ដែលបានរួមចំណែកដល់ប្រតិបត្តិការបង្ក្រាបគ្រឿងញៀន ប្រកបដោយជោគជ័យរបស់អាជ្ញាធរកម្ពុជា ។
លោកបានបន្ថែមថា កម្ពុជានឹងបន្តពន្លឿនការស៊ើបអង្កេតលើករណីធំៗ ដើម្បីស្រាវជ្រាវរកខ្សែរយៈបណ្តាញមេខ្លោងជួញដូរគ្រឿងញៀន និងបង្ក្រាបឲ្យដល់ឫសគល់ ព្រមទាំងបន្តពន្លាតនីតិវិធីឈានដល់ការបង្ក្រាបបទល្មើសសម្អាតប្រាក់ ដែលជាផល នៃបទល្មើសគ្រឿងញៀន ដោយត្រូវពង្រឹងកិច្ចសហប្រតិបត្តិការ ក្នុងក្របខណ្ឌតំបន់ និងអន្តរជាតិផងដែរ ។
អាជ្ញាធរជាតិប្រយុទ្ធប្រឆាំងគ្រឿងញៀន ក៏នឹងពង្រឹងការគ្រប់គ្រងការនាំចូលសារធាតុគីមី ដើម្បីទប់ស្កាត់ការផលិត ដែលអាចផ្សំជាគ្រឿងញៀន របស់ក្រុមឧក្រិដ្ឋជន ។
ឧត្តមសេនីយ៍ត្រី ង្វៀន វ៉ាន់វៀន បានឲ្យដឹងថា កងកម្លាំងនគរបាលទាំងពីរ នឹងបន្តផ្លាស់ប្តូរព័ត៌មានតាមរយៈបណ្តាញទូរសព្ទបន្ទាន់ ដែលបានបង្កើតឡើង នៅតាមការិយាល័យទំនាក់ទំនងព្រំដែន ប្រទេសទាំង២ ។
នាយកដ្ឋាននគរបាលទាំងពីរ ក៏នឹងសហការគ្នាបន្តទៀត ដើម្បីបង្ក្រាបបទល្មើសឆ្លងដែន ពិសេសបទល្មើសគ្រឿងញៀន ។ លោកឧត្តមសេនីយ៍ត្រី បន្តថា នៅមានមេខ្លោងគ្រឿងញៀន ត្រូវតាមចាប់ខ្លួនប្រមាណ ១៦នាក់ទៀត ដែលពេលនេះ ត្រូវបានគេសង្ស័យថា កំពុងលាក់ខ្លួននៅកម្ពុជា ។
ទាក់ទិននឹងស្ថានការណ៍នៅទីក្រុងហូជីមិញ លោកវរសេនីយ៍ឯក Hoàng Tâm Hiếu នាយករង C04 បាននិយាយថា គ្រឿងញៀនភាគច្រើនមានប្រភពចេញពីតំបន់ “ត្រីកោណមាស” ដែលជាតំបន់ព្រំដែនរវាងប្រទេសថៃ ឡាវ និងមីយ៉ាន់ម៉ា ឆ្លងកាត់ប្រទេសកម្ពុជា និងចូលប្រទេសវៀតណាម ។
ការនាំចូលមួយចំនួន ត្រូវបានចែកចាយ និងប្រើប្រាស់ក្នុងប្រទេសវៀតណាម ជាពិសេសនៅទីក្រុងហូជីមិញ ដែលជាទីផ្សារដ៏ធំ ខណៈដែលនៅសល់ ត្រូវបានដឹកជញ្ជូនទៅកាន់ប្រទេសផ្សេងទៀត នៅក្នុងតំបន់ ។
ថ្មីៗនេះ ទីក្រុងហូជីមិញ រកឃើញជាច្រើនករណី ដែលជនបរទេសចូលមកក្នុងប្រទេសវៀតណាម ជ្រោកក្រោមវិស័យទេសចរណ៍ ឬអាជីវកម្ម និងបង្កើតក្រុមហ៊ុន ដើម្បីលួចលាក់ជួញដូរគ្រឿងញៀនខុសច្បាប់ ។
កិច្ចប្រជុំទ្វេភាគី កម្ពុជា-វៀតណាម នឹងបន្តរហូតដល់ថ្ងៃទី៧ ខែមករា ឆ្នាំ២០២៣ ៕
ចែករំលែកព័តមាននេះ