រាជធានីភ្នំពេញ ៖ អគ្គនាយកក្រុមហ៊ុនសណ្ឋាគារ និងកាស៊ីណូ ហ្វ័រជូណា ជនជាតិកូរ៉េម្នាក់ កាលពីព្រឹកថ្ងៃទី៤ កក្កដា ២០១៧នេះ ត្រូវបានចៅក្រមស៊ើបសួរសាលាដំបូងរាជធានីភ្នំពេញ
រាជធានីភ្នំពេញ ៖ អគ្គនាយកក្រុមហ៊ុនសណ្ឋាគារ និងកាស៊ីណូ ហ្វ័រជូណា ជនជាតិកូរ៉េម្នាក់ កាលពីព្រឹកថ្ងៃទី៤ កក្កដា ២០១៧នេះ ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនដាក់ពន្ធនាគារក្រោមការចោទប្រកាន់ពីបទ កំហែងយក និងបទរំលោភលើទំនុកចិត្ត។ ជនសង្ស័យឈ្មោះ ស៊ុន សាងស៊ុក ភេទប្រុស អាយុ៥៧ឆ្នាំ ជនជាតិកូរ៉េ មុខងារជាអគ្គនាយកក្រុមហ៊ុន សណ្ឋាគារ និងកាស៊ីណូ ហ្វ័រជូណា ដែលមានទីតាំងនៅខេត្តព្រះសីហនុ។
ដើមចមនៃការឃុំខ្លួនជនសង្ស័យរូបនេះ ត្រូវបានប្រភពធ្លាយចេញពីសាលាដំបូងរាជធានីភ្នំពេញ ឲ្យដឹងថា ក្រុមហ៊ុនសណ្ឋាគារ និងកាស៊ីណូ ហ្វ័រជូណា កន្លងមកមានអគ្គនាយក៣នាក់ហើយ ក្នុងភាគហ៊ុនរកស៊ីជាមួយគ្នា។ ដំណាក់កាលចុងក្រោយមានឈ្មោះ ស៊ុន សាងស៊ុក ជាអគ្គនាយក្រុមហ៊ុន ចាប់ពីអំឡុងឆ្នាំ២០១៦ មក។ រយៈពេល២ទៅ៣ខែដើមឆ្នាំ២០១៧នេះ លោកស៊ុន សាងស៊ុក មិនបានចែកផលចំណេញឲ្យទៅភាគីភាគហ៊ុននោះទេ ហើយថែមទាំងបាននិងសម្លុតគំរាមកំហែងឲ្យសមាជិកដទៃទៀតផ្ទរភាគហ៊ុនឲ្យរូបគេកាន់កាប់ម្នាក់ឯង បើមិនដូច្នេះគេនឹងសម្លាប់ចោល។ ដោយសារតែមានពាក្យលេចឮ ប្រមាថគំរាមកំហែងថា និងសម្លាប់ រួមទាំងការមិនចែកផលចំណេញក្នុងភាកហ៊ុនផងនោះ ជនជាតិកូរ៉េម្នាក់ផ្សេងទៀតបានចេញមុខធ្វើជាដើមបណ្តឹង ប្តឹងចូលសាលាដំបូងរាជធានីភ្នំពេញ ដើម្បីឲ្យចាត់ការលើអគ្គនាយកក្រុមហ៊ុននេះ។
នៅថ្ងៃទី៣ ខែកក្កដា ឆ្នាំ ២០១៧ កញ្ញា វ៉ា សក្តា ព្រះរាជអាជ្ញារងអមសាលាដំបូង បានចេញដីកាបញ្ជាឲ្យលោក ស៊ុន សាងស៊ុក ចូលខ្លួនដើម្បីសាកសួរលើពាក្យបណ្តឹង របស់ភាគីម្ខាងទៀតនោះ។ ក្រោយពីសាកសួរហើយកញ្ញា វ៉ា សក្តា បានឲ្យនគរបាលព្រហ្មទណ្ឌកម្រិតសាលជាធានីភ្នំពេញ ឃាត់ខ្លួនបណ្តោះអាសន្ន។ លុះព្រឹកថ្ងៃទី៤ខែកក្កដា តំណាងអយ្យការបានចោទប្រកាន់ជាផ្លូវការពីបទកំហែងយក និងបទរំលោភលើទំនុកចិត្ត។ ក្រោយពីតំណាងអយ្យការចោទប្រកាន់ហើយ សំណុំរឿងនោះត្រូវបានចាត់បញ្ជូនទៅលោក ឌុច សុខសារិន ចៅក្រមស៊ើបសួរ សម្រេចឃុំខ្លួនជនសង្ស័យដាក់ពន្ធនាគារជាបណ្តោះអាសន្ន៕
ចែករំលែកព័តមាននេះ