ខេត្តក្រចេះ ៖ ជម្លោះដីធ្លីនៅចំណុចដីឧបសម្ព័ន្ធរវាងស្រុកព្រែកប្រសព្វ ខេត្តក្រចេះ និងស្រុកសន្ទុក ខេត្តកំពង់ធំ បានឈានឱ្យមានការប៉ះទង្គិច នៅពេលដែលអាជ្ញាធរភូមិ-ឃុំចុះទៅដោះស្រាយជាមួយមនុស្សមួយក្រុមប្រដាប់ដោយអាវុធមកពីខេត្តកំពង់ធំ រហូតលោកមេភូមិស្រវ៉ាយកបានកាំភ្លើងខ្លីមួយដើម ដែលបម្រុងបាញ់គំរាមនៅពេលប៉ះទង្គិចគ្នានោះ ។
ទំនាស់ដីជាប់ព្រំប្រទល់ខាងក្រោយស្រុកព្រែកប្រសព្វ និងស្រុកសន្ទុក ត្រូវបានគេនិយាយថា បានកើតមានឥតឈប់ឈរ ខណៈដែលដីព្រៃនៅតំបន់នោះ កំពុងតែត្រូវជនមានអំណាចមកពីខេត្តកំពង់ធំ បានរំលោភយកធ្វើឲ្យប៉ះពាល់ដីចម្ការរបស់អ្នកភូមិនៅស្រុកព្រែកប្រសព្វ ។ ការចុះដោះស្រាយករណីវិវាទដីធ្លារវាងពលរដ្ឋរស់នៅចំណុចដីឧបសម្ព័ន្ធខាងក្រោយឃុំសោប ស្រុកព្រែកប្រសព្វ បានធ្វើឡើងជាថ្មីម្តងទៀត កាលពីរសៀលថ្ងៃទី៣ កក្កដា ។
មេភូមិស៊ីទែន ឃុំសោប ស្រុកព្រែកប្រសព្វ លោកសាយ ខេន ដែលបានចុះទៅដោះស្រាយ និងជួបហេតុការណ៍ប៉ះទង្គិចគ្នានោះ បានបញ្ជាក់ថា នៅពេលដែលអាជ្ញាធរចុះទៅដោះស្រាយ ក៏ស្រាប់តែមានមនុស្សមួយក្រុមស្លៀកពាក់ឯកសណ្ឋានប៉េអឹម២នាក់ និង ស្លៀកពាក់ស៊ីវិលពីរនាក់ប្រដាប់ដោយអាវុធ ។ មនុស្ស៤នាក់នេះ ត្រូវបានពលរដ្ឋសន្និដ្ឋានថា ជាក្រុមមនុស្សដែលអ្នកមានអំណាចជួលមកកាង និងមើលការខុសត្រូវដីនៅចំណុចនេះ ដែលគេបានរំលោភយក ។
មេភូមិស៊ីទែនលោកសាយ ខេន បានឲ្យដឹងទៀតថា នៅពេលកំពុងតែចុះទៅដោះស្រាយ ស្រាប់តែមានការប៉ះទង្គិចរវាងពលរដ្ឋ ជាមួយនិងក្រុមមនុស្ស៤នាក់នោះ ។ ភ្លាមៗនោះក្រុមមនុស្ស៤នាក់ ដែលមានស្លៀកស៊ីវិល និងឯកសណ្ឋាន បានព្យាយាមចាប់ពលរដ្ឋដែលតវ៉ាដាក់ខ្នោះ តែក៏ត្រូវបានរើបំរះ និងក៏មានការប្រតាយប្រតប់គ្នា ដោយក្រុមជនទាំងនោះព្យាយាមដកកាំភ្លើងភ្ជង់បាញ់គំរាមទៀត ។ តែមិនអាចធ្វើបានដោយសារតែពលរដ្ឋច្រើននាក់ ឈានឲ្យមានការប្រតាយប្រតប់ ហើយលោកក៏កញ្ឆក់បានកាំភ្លើងខ្លី១ដើម ដែលពួកគេបំរុងបាញ់ ។ បន្ទាប់ពីឃើញស្ថានភាពបែបនេះ ក្រុមមនុស្ស៤នាក់នោះបានរត់គេចខ្លួន ពីការដេញវាយពីសំណាក់ពលរដ្ឋ ។
អធិការនគរបាលស្រុកព្រែកប្រសព្វ លោកវរសេនីយ៍ទោ ចាន់ សុផល្លា បានបញ្ជាក់ ថា អាជ្ញាធរឃុំសោប បានយកកាំភ្លើងខ្លីម៉ាកការ៥៤មួយដើម ដែលពួកគាត់ដណ្តើមយក បានពីក្រុមជន៤នាក់នោះ មកប្រគល់ឲ្យនគរបាលស្រុក ។ ក្នុងរឿងវិវាទដីធ្លី នៅល្ងាចមេះ គឺមិនបង្កឲ្យមានគ្រោះថ្នាក់ដល់អាយុជីវិតនោះទេ ក្រៅពីបានផ្ទុះការប៉ះទង្គិចគ្នាមួយប្រាវរួចមក ។ លោកថា ខាង នគរបាលកំពុងតែស៊ើបអង្កេតរកម្ចាស់កាំភ្លើងខ្លីមួយដើមនេះ ៕
ចែករំលែកព័តមាននេះ