រាជធានីផ្នំពេញ ៖ កីឡាករជើងខ្លាំង សៀវ ង៉ុយ ដែលត្រូវគេស្គាល់ថា ជាម្ចាស់ខ្សែក្រវាត់៣ស្ថាប័នផ្សេងគ្នាបានអះអាងថា លោកបានជួបគ្រោះថ្នាក់ចរាចរណ៍ ដោយបែករយះក្បាល ចំណែកកូនស្រីលោកបាក់ភ្លៅ និងស្នងជើងខាងស្ដាំ ។ លោកថា មិនមានលទ្ធភាពចំណាយលើការព្យាបាលនោះទេ ដោយសារតែម្ចាស់រថយន្ដ ដែលសងសំណងលោកត្រឹមតែ១,០០០ដុល្លារ គ្រាន់តែលោកដេរក្បាល និងវះកាត់ជើងកូនស្រី កាលពីព្រឹកថ្ងៃទី០៤ កក្កដា គឺចង់អស់ហើយ។
កីឡាករសៀវ ង៉ុយ និយាយថា ហេតុការណ៍ប៉ះគ្នាមួយទំហឹង បណ្ដាលឱ្យលោកនិងកូនស្រី ព្រមទាំងភរិយាជួបគ្រោះថ្នាក់ចរាចរណ៍នោះ គឺបានកើតឡើងកាលពីល្ងាចថ្ងៃទី០៣ កក្កដា នៅជិតរោងកុនលុច្យ ក្នុងពេលដែលលោក និងកូន ព្រមទាំងភរិយាជិះម៉ូតូរួមគ្នា ។
យ៉ាងណាមិញ លោកថាភរិយារបស់លោក មានរបួសតិចតួចប៉ុណ្ណោះ ដោយអ្នកធ្ងន់ គឺតែកូនស្រីលោកទេ។ លោកថា មកទល់ម៉ោងនេះ លោកបានសម្រេចបញ្ជូនកូនស្រីរបស់លោកមានវ័យ៦ឆ្នាំរបួសបាក់ភ្លៅ និងបាក់ស្នងជើងធ្ងន់ធ្ងរនោះ បន្តទៅព្យាបាលនៅមន្ទីរពេទ្យគន្ធបុប្ផា ដោយលោកទើបដេររបួសបែកក្បាលបានចេញពីពេទ្យហើយ ដើម្បីឆ្លាស់គ្នាជាមួយភរិយាមើលថែកូនស្រី ។
លោកបានទទូចសុំការអំពាវនាវដោយថា ថវិកាដែលទទួលបានពីសំណងរបស់ម្ចាស់រថយន្ត មិនអាចឱ្យលោក និងកូនស្រី ដែលមានរបួសធ្ងន់ធ្ងរនាពេលនេះបានទេ ។ លោកថា លុយដែលបានពីសំណងនោះ គ្រាន់តែគិតគូររឿងដោះស្រាយ និងចេញ-ចូលពេទ្យក្រោយគ្រោះថ្នាក់ គឺចង់អស់ទៅហើយ ក្នុងពេលដែលលោកមានការភ័យបារម្ភថា បើអស់លុយទៅ តើបានលុយពីណាមកព្យាបាលខ្លួន និងកូនស្រីបន្ត ។
សូមធ្វើការផ្ដល់ជំនួយដោយផ្ទាល់ដល់កីឡាករសៀវ ង៉ុយ តាមរយៈលេខ087 727 899 ។
ចែករំលែកព័តមាននេះ