រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជា លោកសុខ ឥសាន បានបញ្ជាក់នៅព្រឹកថ្ងៃទី០៤ មិថុនា នេះថា រាល់ការតែងតាំងមន្ត្រីក្នុងជួររាជរដ្ឋាភិបាល និងការដាក់បេក្ខភាពស្ត្រី ក្នុងការប្រកួតប្រជែងការបោះឆ្នោត គឺត្រូវធ្វើឡើងដោយមានការពិចារណាលើគុណភាព និងសមត្ថភាពរបស់ស្ត្រីផងដែរ ។
លោកបានបញ្ជាក់ថា គ្មានអ្នកណាម្នាក់អាចបញ្ជាគណបក្សនយោបាយណាមួយ ឲ្យតែងតាំងបេក្ខភាពតាមការចង់បានរបស់គេនោះទេ ព្រោះវាជាសិទ្ធិរបស់គណបក្សនយោបាយ ។ ការលើកឡើងបែបនេះ បន្ទាប់ពីមានអង្គការក្នុងស្រុកមួយចំនួនបានទិទៀនថា ចំនួនស្ត្រីជាប់ឆ្នោតក្នុងការបោះឆ្នោតក្រុមប្រឹក្សាឃុំ-សង្កាត់ឆ្នាំ២០១៧នេះមានចំនួនតិច ហើយស្នើទាមទាឲ្យរដ្ឋាភិបាល ណែនាំឲ្យគណបក្សនយោបាយដាក់បេក្ខភាពជាស្ត្រីឲ្យបានច្រើន ។
លោកសុខ ឥសាន្ត បានពន្យល់ថា៖ «គណបក្សនយោបាយនីមួយៗមានឯករាជ្យភាពរបស់ខ្លួន ។ ការដាក់បេក្ខជនយ៉ាងណា អាស្រ័យលើសិទ្ធិរបស់គណបក្សនយោបាយនីមួយៗ ។ រាជរដ្ឋាភិបាល មិនមានសិទ្ធិបង្គាប់បញ្ជាឲ្យគណបក្សនយោបាយធ្វើតាមទេ» ។
មន្ត្រីជាន់ខ្ពស់របស់គណបក្សប្រជាជនរូបនេះ បានបន្ថែមទៀតថា៖ «ដោយឡែក ចំពោះការតែងតាំងមន្ត្រី អាស្រ័យលើលក្ខណៈសម្បត្តិរបស់មន្ត្រីម្នាក់ៗដែរ មិនមែនចង់បានស្ត្រីច្រើន ហើយឲ្យតែឃើញស្ត្រីចេះតែតែងតាំងនោះទេ ចាំបាច់ផ្តល់អាទិភាពជូនស្ត្រី តែក៏ត្រូវគិតគូរពីគុណភាព និងសមត្ថភាពផងដែរ» ។
កន្លងទៅ រាជរដ្ឋាភិបាលបានយកចិត្តទុក្ខដាក់ក្នុងការតែងតាំង និងតម្លើងថ្នាក់មន្ត្រីជាស្ត្រីតាមស្ថាប័ន អង្គភាពជាបន្តបន្ទាប់ បានច្រើនគួរឲ្យកត់សម្គាល់ផងដែរ ។
លោក សុខ ឥសាន្ត បានបន្ថែម «ប៉ុន្តែទោះជាយ៉ាងណាក៏ដោយ នៅតែចៀសមិនផុត ពីការរិះគន់ពីមជ្ឈដ្ឋានមួយចំនួន មិនបានដែរ ឧទាហរណ៍ដូចជាការតែងតាំងនារី មិថុនា ភូថង ជាអភិបាលខេត្តកោះកុងជាដើម ក៏មានការទិទៀនថា តែងតាំងខ្សែស្រឡាយឯកឧត្តម សាយ ភូថង ដែរ ។ តើឱ្យធ្វើម៉េចបានត្រូវចិត្តអស់លោក អ្នកតែងតែទិទៀននោះ? មានតែផ្លូវម្យ៉ាង គឺអ្នកទិទៀននោះបង្កើតគណបក្សទៅចូលរូមប្រកួតប្រជែង ហើយបើឈ្នះឆ្នោតចង់ដាក់ស្ត្រីតាំងពីលើដល់ក្រោមទៅ ជាសិទ្ធិសម្រេចរបស់គណបក្សឈ្នះឆ្នោតនោះហើយ» ។
អង្គការសង្គមស៊ីវិលចំនួន២៦ ថ្មីៗនេះបានរិះគន់ថា ផែនការយុទ្ធសាស្ដ្រថ្នាក់ជាតិ ដែលរដ្ឋាភិបាលកំណត់ថា នឹងបង្កើនចំនួនក្រុមប្រឹក្សាឃុំ-សង្កាត់ជាស្ដ្រីឱ្យបាន២៥ភាគរយ នៅឆ្នាំ២០១៨ គឺបានទទួលបរាជ័យដោយសារចំនួនស្ដ្រី ដែលជាប់ជាមេឃុំ-ចៅសង្កាត់មានការថយចុះពីចំនួន២.០៣៨នាក់ ស្មើនឹង១៧,៧៨ភាគរយ នៅឆ្នាំ២០១២ មកនៅត្រឹម១.៩៤០នាក់ ស្មើ១៦,៧៦ភាគរយ នៅឆ្នាំ២០១៧ ។
ចែករំលែកព័តមាននេះ