រដ្ឋាភិបាលយោធាថៃនិយាយថា ពួកគេនឹងពន្យារពេលការអនុម័តច្បាប់ពលកម្មថ្មី បន្ទាប់ពីមានពលករចំណាកស្រុករាប់ពាន់នាក់ចាកចេញពីថៃទៅកាន់ប្រទេសជិតខាងកាលពីសប្តាហ៍មុន ព្រោះខ្លាច
ទីក្រុងបាងកក ៖ រដ្ឋាភិបាលយោធាថៃនិយាយថា ពួកគេនឹងពន្យារពេលការអនុម័តច្បាប់ពលកម្មថ្មី បន្ទាប់ពីមានពលករចំណាកស្រុករាប់ពាន់នាក់ចាកចេញពីថៃទៅកាន់ប្រទេសជិតខាងកាលពីសប្តាហ៍មុន ព្រោះខ្លាចត្រូវចាប់ខ្លួន និងពិន័យប្រាក់ដ៏ធ្ងន់ធ្ងរនៅក្រោមវិធានការថ្មី ។
ភាពចលាចលនេះបង្កឡើងដោយប្រទេសថៃខិតខំប្រឹងប្រែងគ្រប់គ្រងលើពលករបរទេសរាប់លាននាក់ដែលចូលមកកាន់សេដ្ឋកិច្ចរបស់ខ្លួន តាមរយៈការងារក្នុងរោងចក្រ ទូកនេសាទ និងការងារមានប្រាក់បៀវត្សទាបជាច្រើនទៀត ។
រដ្ឋាភិបាលបានឆ្លើយតបដោយយុទ្ធនាការដែលមានគោលដៅចុះឈ្មោះពលករចំណាកស្រុកទាំងនោះ និងចេញវិធានការចុះចាប់ផ្លូវចំណាកស្រុកខុសច្បាប់ ប៉ុន្តែការខិតខំនេះភាគច្រើនមានតែមួយពេលៗ ។
ជាលទ្ធផល ពលករចំណាកស្រុកភាគច្រើនក្នុងប្រទេសនេះបន្តជាពលករខុសច្បាប់ ហើយអាចជួបប្រទះនឹងការធ្វើបាប ។
កាលពីថ្ងៃសុក្រកន្លងមក រដ្ឋាភិបាលនិយាយថា ពួកគេនឹងពន្យារពេលការអនុម័តផ្នែកមួយចំនួននៃច្បាប់ពលកម្មបរទេសថ្មីក្នុងរយៈពេល១២០ថ្ងៃ បន្ទាប់ពីវិធានការថ្មីនេះបង្កភាពចលាចលក្នុងចំណោមពលករចំណាកស្រុក ។
ការសម្រេចចិត្តនេះកើតមានឡើងបន្ទាប់ពីមានពលកររាប់ពាន់នាក់ចាកចេញពីថៃ ទៅកាន់ប្រទេសជិតខាងដូចជា មីយ៉ាន់ម៉ា និងកម្ពុជា ព្រោះតែខ្លាចថា ត្រូវចាប់ខ្លួន ហើយជួបប្រទះនឹងការពិន័យប្រាក់ក្រោមច្បាប់ថ្មី ។ ការពិន័យប្រាក់នេះអាចមានដល់ទៅ៣ពាន់ដុល្លារឯណោះសម្រាប់អ្នកគ្មានប័ណ្ណការងារ ។
នៅក្រោមច្បាប់ថ្មី និយោជកក៏អាចត្រូវបានពិន័យដល់ទៅ២ម៉ឺន៤ពាន់ដុល្លារឯណោះសម្រាប់ការជួលពលករខុសច្បាប់ម្នាក់ ។
ក្រុមការពារព្រមានថា អ្នករត់ពន្ធមនុស្សតែងទាញយកផលប្រយោជន៍ពីការចលាចលចាកចេញពីប្រទេសបែបនេះ ដោយអ្នករត់ពន្ធ និងភ្នាក់ងារតាមព្រំដែនទាមទារប្រាក់ពីពលករខុសច្បាប់ ដែលព្យាយាមស្វែងរកផ្លូវទៅផ្ទះវិញដោយសុវត្ថិភាព ។
មេប៉ូលិសម្នាក់ក្នុងរដ្ឋ Karen របស់ប្រទេសមីយ៉ាន់ម៉ានិយាយថា ពលករចំណាកស្រុកប្រមាណ៦ពាន់នាក់បានត្រឡប់ពីថៃ មកប្រទេសខ្លួនវិញកាលពីថ្ងៃព្រហស្បតិ៍ ។
ជាមួយគ្នានេះ លោក Benjapol Robsawad មន្ត្រីអន្តោប្រវេសន៍ថៃ និយាយថា នៅព្រំដែនកម្ពុជា ពលករចំណាកស្រុកកាន់តែច្រើនឡើងបានត្រឡប់មកវិញតាំងពីច្បាប់ថ្មីអនុម័ត ។
លោកប្រាប់ថា តាំងពីថ្ងៃពុធមក ពលករជិត២ពាន់នាក់បានឆ្លងព្រំប្រទល់មកកាន់កម្ពុជា តាមច្រកប៉ោយប៉ែត ៕
ចែករំលែកព័តមាននេះ