រាជធានីភ្នំពេញ ៖ ក្រសួងទេសចរណ៍ នឹងប្រកាសដាក់ឲ្យដំណើរការនូវផែនការយុទ្ធសាស្ត្រអភិវឌ្ឍន៍ធនធានមនុស្ស ផ្នែកជំនាញវិជ្ជាជីវៈទេសចរណ៍នៅសប្តាហ៍ក្រោយនេះ ។
រដ្ឋមន្ត្រីក្រសួងទេសចរណ៍លោក ថោង ខុនបាន មានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៣ កក្កដា ថា ផែនការយុទ្ធសាស្ត្រនេះនឹងប្រកាសដំណើរការនៅថ្ងៃទី១០ កក្កដា ខាងមុខ ព្រោះនៅឆ្នាំ២០២០ កម្ពុជាត្រូវការធនធានមនុស្សក្នុងវិស័យនេះរហូតដល់៨០ម៉ឺននាក់ ខណៈដែលបច្ចុប្បន្នមានត្រឹម៦២ម៉ឺននាក់ប៉ុណ្ណោះ ។ ហេតុនេះកម្ពុជាត្រូវការធនធានមនុស្ស៥ម៉ឺននាក់ក្នុង១ឆ្នាំចាប់ពីឆ្នាំនេះតទៅ ហើយបច្ចុប្បន្នមានតែសាលាបង្រៀនធ្វើម្ហូបស្វ៊ីស និងសាលាឯកជនមួយចំនួនទៀត ប៉ុន្តែមិនទាន់គ្រប់តម្រូវការទេ ។ លោកថ្លែងថា ៖
« យើងត្រូវការរៀបចំឲ្យមានវគ្គសិក្សាបន្ថែមទៀត ហើយក្រសួងការងារមានផែនការ មានគោល នយោបាយ ប៉ុន្តែក្រសួងទេសចរណ៍ធ្វើតាមជំនាញរបស់ខ្លួន ព្រោះ ជំនាញទេសចរណ៍ត្រូវធ្វើខុសគេ មិនអាចប្រើមនុស្សគ្មានជំនាញទេ » ។
លោកបន្តថា ធនធានមនុស្សក្នុងវិស័យនេះនៅតាមបណ្តាខេត្តនៅមានបញ្ហាច្រើន ខុសពីស្រុកគេ គឺគេមានសាលាបណ្តុះបណ្តាលនៅតាមខេត្ត ប៉ុន្តែថ្នាក់ដឹកនាំខេត្តនីមួយៗនៅកម្ពុជា មិនបានគិតគូរពីបញ្ហានេះនោះទេ ។
លោករដ្ឋមន្ត្រីបានបន្តថា បច្ចុប្បន្នកម្ពុជា មានអ្នកធ្វើការងារក្នុងវិស័យទេសចរណ៍ និងវិស័យដឹកជញ្ជូនពាក់ព័ន្ធក្នុងវិស័យនេះជាង១លាននាក់ ដោយមិនទាន់គិតអ្នកដែលទទួលបានផលប្រយោជន៍ និងធ្វើការងារដោយប្រយោលក្នុងវិស័យនេះនៅឡើយ ។ លោកបន្តថា អ្នកខ្លះធ្វើការងារក្នុងវិស័យនេះមិនមានជំនាញនោះទេ ប៉ុន្តែក្រសួងនឹងរៀបចំឲ្យមានការវាយតម្លៃទទួលស្គាល់ និងប្រគល់វិញ្ញាបនបត្រជូនពួកគេ និងដាក់ឲ្យគណៈកម្មការវាយតម្លៃថ្នាក់ជាតិបញ្ជាក់ពីគុណវុឌ្ឍិពួកគេមួយជំហានទៀត ទើបពួកគេអាចធ្វើការងារក្នុងអាស៊ានបាន ។
សហប្រធានក្រុមការងារទេសចរណ៍ផ្នែកឯកជនលោក លូ ម៉េង បានថ្លែងថា កម្ពុជាពិតជាកំពុងប្រឈមបញ្ហាកង្វះធនធានមនុស្សក្នុងវិស័យនេះ រាប់ទាំងផ្នែកចុងភៅ អ្នកធ្វើការងារផ្នែកបដិសណ្ឋារកិច្ច មគ្គុទេសក៍ទេសចរណ៍ជាដើម ដែលទាមទារឲ្យមានការបណ្តុះបណ្តាលបន្ថែមទៀត ដើម្បីឆ្លើយតបតម្រូវការទីផ្សារការងារដែលកាន់តែកើនឡើង ។ លោកបន្តថា ជំនាញចុងភៅ ក៏ជាជំនាញមួយមានការខ្វះខាតធនធានមនុស្សច្រើនដែរ ហើយជំនាញនេះទទួលបានប្រាក់ខែច្រើន ប៉ុន្តែមិនសូវមានយុវជនកម្ពុជាចាប់អារម្មណ៍ច្រើននោះទេ ។
ទោះជាយ៉ាងណាក៏ដោយ លោកថា ធនធានមនុស្សក្នុងវិស័យនេះ កាន់តែមានគុណភាពជាងមុន បើទោះបីជាមានការខ្វះខាតមួយចំនួនក៏ដោយ ។ លោកបន្តថា ៖« សេវាកម្មបដិសណ្ឋារកិច្ចរបស់កម្ពុជា គុណភាពនៃសេវាស្នាក់នៅរបស់កម្ពុជា ក៏មានភាពប្រសើរជាងមុនផងដែរ និងអាចធៀបបានជាមួយបណ្តាប្រទេសក្នុងតំបន់អាស៊ាន » ។
គួរបញ្ជាក់ថា ផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍ គឺផ្ដោតសំខាន់បណ្តុះបណ្តាលធនធានមនុស្សផ្នែកជំនាញវិជ្ជាជីវៈឲ្យបាន៥ម៉ឺននាក់ក្នុង១ឆ្នាំ ដោយកំណត់ចក្ខុវិស័យច្បាស់លាស់ចាប់ពីឆ្នាំ២០១៧-២០២៥ ។
ផ្អែកតាមផែនការយុទ្ធសាស្ត្រនេះ ក្រសួងនឹងដាក់ចេញយន្តការចម្បងតាមរយៈការបង្កើតមូលនិធិអភិវឌ្ឍន៍ទេសចរណ៍ និងនីតិវិធីចាត់ចែងប្រើប្រាស់មូលនិធិកម្មវិធីកម្ចីនិស្សិត ។ ក្នុងនោះ ក៏ជាឱកាសផ្តល់លទ្ធភាពដល់និស្សិតក្រីក្រអាចទទួលបានការអប់រំវិជ្ជាជីវៈជំនាញ និងប្រព័ន្ធធានាការងារជូននិស្សិត តាមរយៈកិច្ចសហប្រតិបត្តិការត្រីភាគីរវាងសាលាមូលដ្ឋានអាជីវកម្ម សណ្ឋាគារ និងគ្រឹះស្ថានហិរញ្ញវត្ថុ ដើម្បីគាំទ្រលើផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍ ឆ្នាំ២០១៧-២០២៥ នេះផងដែរ ។
យោងតាមរបាយការណ៍អង្គការទេស-ចរណ៍ ពិភពលោក(UNWTO)និងក្រុមប្រឹក្សាទេសចរណ៍ និងធ្វើដំណើរពិភពលោក(WTTC) ឆ្នាំ២០១៦ វិស័យទេសចរណ៍ និងការធ្វើដំណើរកម្ពុជា បានបង្កើតការងារដោយផ្ទាល់ និងប្រយោលសរុបប្រមាណ២,៣លាននាក់ ស្មើនឹង២៧%នៃការងារសរុប ក្នុងនោះការងារផ្ទាល់មានប្រមាណ១,២លាននាក់ ស្មើនឹង១៤%នៃការងារសរុប ដែលការងារផ្ទាល់ក្នុងវិស័យទេសចរណ៍មានប្រមាណ៦២ម៉ឺននាក់ ៕
ចែករំលែកព័តមាននេះ