ខេត្តកំពត ៖ ប្រជាកសិករខ្លះនិយាយថា ការប្រមូលផលស្រូវឆ្នាំ២០១០នេះ គឺមានការធ្លាក់ចុះយ៉ាងខ្លាំង ដោយសារតែពួកគាត់មិនបានស្ទូងស្រូវពីដើមរដូវ ព្រោះម្នាក់ៗរង់ចាំតែទឹកភ្លៀងធ្លាក់ ដូច្នេះហើយធ្វើឱ្យការបង្កបង្កើនស្រូវក្នុងរដូវវស្សាមានការយឺតយ៉ាវ។ ប្រជាកសិករកាន់តែយល់ថា ធ្វើស្រែប្រវាស់នឹងមេឃពិតជាមិនអាចទៅរួចទៀតទេសំរាប់ស្ថានភាពបរិយាកាសនាពេលបច្ចុប្បន្ន។ ប្រជាពលរដ្ឋម្នាក់ឈ្មោះណុប ឌឿង ភេទប្រុស អាយុ៤៧ឆ្នាំ នៅភូមិដំណាក់ត្រយឹងឃុំខ្ជាយ ស្រុកដងទង់បាននិយាយថា ការប្រមូលផលឆ្នាំនេះគឺបាត់ស្ទើរតែពាក់កណ្តាល។ រាល់ឆ្នាំបានផល៦០បាវ ឥឡូវនៅសល់តែ៣០បាវប៉ុណ្ណោះ។ មូលហេតុនៃការប្រមូលផលបានតិចតួច មកពីគាត់មិនបានស្ទូងពីដើមរដូវ។
ទោះបីជាយ៉ាងណាក្តី លោកមួង ឈុត អភិបាលស្រុកដងទង់ប្រាប់ថា ផ្ទៃដីបង្កបង្កើនផលស្រូវរបស់កសិករនៅស្រុកដងទង់ គឺមិនមានចោលរាប់ហិកតាទេ គឺមានផ្ទៃដីតិចតួចបំផុតដែលប្រជាពលរដ្ឋមិនបានធ្វើស្រែ។ លោកអភិបាលស្រុកមានប្រសាសន៍ថា ឆ្នាំនេះដ្បិតតែកសិករជួបនឹងភាពរាំងស្ងួតមែនប៉ុន្តែផលស្រូវមិនបាត់គួរឱ្យព្រួយបារម្ភទេ។ ប្រជាពលរដ្ឋនៅស្រុកដងទង់និយាយថា ការជួលម៉ាស៊ីនច្រូតស្រូវ និងបោកស្រូវតាមបែបទំនើបក្នុងផ្ទៃដី១ហិកតា ឈ្នួលច្រូតកាត់ និងបោកគឺ៤៧ម៉ឺនរៀល៕
ចែករំលែកព័តមាននេះ