ខេត្តសៀមរាប ៖ រមណីយដ្ឋានទេសចរណ៍ធម្មជាតិមួយកន្លែងនៅក្នុងស្រុកប្រាសាទបាគង បានទាក់ទាញភ្ញៀវទេសចរជាតិ និងអន្តរជាតិទៅកម្សាន្ដជារៀងរាល់ថ្ងៃ ដែលផ្ដល់ប្រយោជន៍ដោយផ្ទាល់ និងប្រយោលដល់
ខេត្តសៀមរាប ៖ រមណីយដ្ឋានទេសចរណ៍ធម្មជាតិមួយកន្លែងនៅក្នុងស្រុកប្រាសាទបាគង បានទាក់ទាញភ្ញៀវទេសចរជាតិ និងអន្តរជាតិទៅកម្សាន្ដជារៀងរាល់ថ្ងៃ ដែលផ្ដល់ប្រយោជន៍ដោយផ្ទាល់ និងប្រយោលដល់ប្រជាពលរដ្ឋនៅតំបន់នេះប្រមាណជាង១ម៉ឺននាក់ ។
រមណីយដ្ឋានទើបបង្កើតឡើងនេះមានលក្ខណៈជាបឹង និងហ៊ុមព័ទ្ធដោយព្រៃឈើជុំវិញ តាមរយៈការបម្រើសេវាម្ហូបអាហារ និងសេវាកម្មទេសចរណ៍នានាជូនភ្ញៀវដែលមកសម្រាកកម្សាន្តនៅទីនេះ ។
លោក អ៊ូ បញ្ញា ប្រធានសហគមន៍រមណីយដ្ឋានទេសចរណ៍ធម្មជាតិត្រាវកុដ ស្ថិតនៅក្នុងឃុំបាល័ង្គ ស្រុកប្រាសាទបាគង និងជាស្ថាបនិករមណីយដ្ឋានទេសចរណ៍ធម្មជាតិមួយនេះ ឱ្យដឹងថា រមណីយដ្ឋាននេះកាលពីមុនមានតែតូប ឬខ្យូសពីរបីប៉ុណ្ណោះ ប៉ុន្តែក្រោយមក ដោយសារតំបន់នេះភ្ជាប់ទៅរមណីយដ្ឋានសំខាន់ៗក្នុងខេត្តសៀមរាប ជាពិសេស ភ្ជាប់ទៅរមណីយដ្ឋានភ្នំគូលែន បានធ្វើឱ្យភ្ញៀវទេសចរមកទស្សនាជាបន្តបន្ទាប់ រហូតដល់ប្រជាពលរដ្ឋក្នុងសហគមន៍ពង្រីកតូប ឬខ្យូស ព្រមជាមួយការរៀបចំឱ្យមានកន្លែងលេងទឹក និងកន្លែងកម្សាន្តផ្សេងទៀត ។
លោកថា ៖ « បច្ចុប្បន្ននេះ មានភ្ញៀវមកជាហូរហែសម្រាកលំហែនៅតំបន់រមណីយដ្ឋានមួយនេះ ក្នុងនោះ ថ្ងៃធម្មតាមានភ្ញៀវប្រមាណពី៤០០ ទៅ៥០០នាក់ តែបើនៅថ្ងៃសៅរ៍-អាទិត្យ ជាថ្ងៃឈប់សម្រាកមានភ្ញៀវមកទស្សនាជាង១ពាន់នាក់ ។ ដោយឡែក នៅថ្ងៃបុណ្យជាតិធំៗ ដូចជា បុណ្យភ្ជុំបិណ្ឌ ចូលឆ្នាំ និងបុណ្យផ្សេងទៀតដែលឈប់សម្រាកច្រើនថ្ងៃនោះ មានភ្ញៀវទេសចរមកលេងរហូតដល់៥ពាន់នាក់ ដែលធ្វើឱ្យពលរដ្ឋក្នុងសហគមន៍ទទួលបានចំណូលបន្ថែមពីការលក់ម្ហូបអាហារ និងសេវាកម្មទេសចរណ៍ផ្សេងទៀត » ។
លោកបន្តថា មិនត្រឹមតែពលរដ្ឋដែលលក់ម្ហូបអាហារ ឬសេវាកម្មទេសចរណ៍នៅទីនោះប៉ុណ្ណោះទេដែលទទួលផលប្រយោជន៍ ក៏ប៉ុន្តែប្រជាពលរដ្ឋផ្សេងទៀតនៅក្នុងសហគមន៍ ក៏បានអត្ថប្រយោជន៍ពីតំបន់ទេសចរណ៍នេះដែរ។ ជាក់ស្ដែង យោធិនពិការដែលរស់នៅជិតរមណីយដ្ឋាននោះបានដាំបន្លែ ចិញ្ចឹមមាន់ ទា ឬជ្រូកដើម្បីលក់ជូនម្ចាស់តូប ឬខ្យូសធ្វើជាម្ហូបជូនភ្ញៀវ ។
ម្យ៉ាងទៀត ដោយសារតែតំបន់រមណីយដ្ឋានទេសចរណ៍នេះ ក៏នៅជាប់គម្រោងអភិវឌ្ឍន៍ព្រលានយន្តហោះថ្មីក្នុងខេត្តសៀមរាប ទើបមានក្រុមហ៊ុនអចលនទ្រព្យ និងក្រុមហ៊ុនអភិវឌ្ឍន៍មួយចំនួនទៀតមកទិញដីត្រៀមសាងសង់ផ្ទះលំហែកាយ និងផ្ទះសំណាក់ សម្រាប់ទទួលភ្ញៀវទេសចរដែលចុះពីភ្នំគូលែន ឬ មកលេងនៅរមណីយដ្ឋានត្រាវកុដ បើសិនមិនចង់ត្រឡប់ទៅសម្រាកនៅទីក្រុងវិញ ។
លោកបន្ថែមថា ដោយមានបឹងព័ទ្ធជុំវិញជាង៥០ហិកតា មានមច្ឆជាតិជាច្រើនប្រភេទនៅក្នុងបឹងនោះ ហើយអ្វីដែលពិសេសសម្រាប់បឹងធម្មជាតិមួយនេះ គឺមានប្រភពទឹកពីជ្រោះភ្នំគូលែន ហូរកាត់លិង្គមួយពាន់របស់ព្រះសិវៈ ដែលពលរដ្ឋជាច្រើនមានជំនឿថា ជាទឹកស័ក្ដិសិទ្ធិ ប៉ុន្តែអ្វីជាឧបសគ្គសម្រាប់ទាក់ទាញភ្ញៀវទេសចរជាតិ និងអន្តរជាតិមកទស្សនា គឺគ្មានផ្លូវកាត់ពីរមណីយដ្ឋានតំបន់អង្គរ ឬពីទីក្រុងសៀមរាប ។ ដូចនេះ បើសិនជាអាជ្ញាធរដែនដីជួយសម្រួលសាងសង់ផ្លូវកាត់ពីអង្គរឃ្យូងយូ មកផ្លូវហាវ៉េ វានឹងធ្វើឲ្យភ្ញៀវមកទស្សនាកាន់តែច្រើន ។
លោកថា ៖ « បច្ចុប្បន្ន ផ្លូវចូលមកកាន់តំបន់រមណីយដ្ឋានត្រាវកុដ ជាផ្លូវវាងបន្តិចពីទីក្រុងសៀមរាប ដែលធ្វើឱ្យភ្ញៀវខ្លះស្ទាក់ស្ទើរក្នុងការមកទស្សនា តែបើសិនជាមានផ្លូវកាត់ដូចអ្វីដែលប្រជាសហគមន៍ចង់បាននោះ ភ្ញៀវនឹងមកច្រើន និងបន្ថែមចំណូលដល់ប្រជាសហគមន៍កាន់តែច្រើន » ៕
ចែករំលែកព័តមាននេះ