ខេត្តព្រះវិហារ ៖ កាលពីព្រឹកថ្ងៃទី១៩ កុម្ភៈ កន្លងទៅនេះ ស្ថាប័នចំនួន៦បាននាំយកអំណោយជាគ្រឿងឧបភោគបរិភោគ សំភារប្រើប្រាស់ និងថវិកាមួយចំនួនធំទៅផ្ដល់ជូនកងកម្លាំង ដែលកំពុងឈរជើងការពារបូរណភាពទឹកដីក្នុងតំបន់ប្រាសាទព្រះវិហារ។ ស្ថាប័នទាំង៦នេះរួមមាន ១-ក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ដឹកនាំដោយលោកជំទាវរដ្ឋមន្ដ្រីសោម គឹមសួគ៌ ២-អាជ្ញាធរខេត្ដកំពង់ឆ្នាំង ដឹកនាំដោយលោកទូច ម៉ារីម អភិបាលខេត្ដ ៣-សមាគមក្មេងវត្ដដឹកនាំដោយលោកឈឹម សៅគី អនុរដ្ឋលេខាធិការទីស្ដីការគណៈរដ្ឋមន្ដ្រី ជាប្រធានសមាគម ៤-គណៈមេធាវីនៃព្រះរាជាណាចក្រកម្ពុជាដឹកនាំដោយលោកជីវ សុងហាក់ ប្រធានគណៈមេធាវី ៥-អាជ្ញាធរខេត្ដកំពតដឹកនាំដោយលោកខូយ ឃុនហួ៊រ អភិបាលខេត្ដ និង៦-អាជ្ញាធរខេត្ដបន្ទាយមានជ័យ ដឹកនាំដោយលោកអ៊ុង អឿន អភិបាលខេត្ដ។
ប្រតិភូទាំង៦ក្រុមដែលនាំយកអំណោយទៅផ្តល់ជូនកងទ័ពនៅតំបន់ប្រាសាទព្រះវិហារ នាថ្ងៃនោះ គឺធ្វើឡើងនៅបញ្ជាការដ្ឋានកងអង្គរក្សស្ថិតនៅចំណុចទួល៩៥ក្បែរតំបន់ប្រាសាទព្រះវិហារក្រោមអធិបតីភាពលោកនាយឧត្ដមសេនីយ៍ផ្កាយមាស៤ ហ៊ីង ប៊ុនហៀង អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការបញ្ជាការដ្ឋានកងអង្គរក្ស និងជាអនុប្រធានគណៈបញ្ជាការឯកភាព សមរភូមិទិសយោធភូមិភាគទី៤។ បើតាមមន្ដ្រីយោធានៅទីនោះថា ដោយសារតែស្ថានការណ៍នៅតំបន់នោះមិនអាចធានាសន្ដិសុខបានដូចពេលមុន ដូច្នេះទើបការធ្វើបដិសណ្ឋារកិច្ចរវាងប្រតិភូនិងកងកម្លាំងបានតែបន្ដិចបន្ដួចប៉ុណ្ណោះ ដោយមួយក្រុមៗស្ថិតក្នុងការប្រុងប្រយ័ត្នខ្ពស់ ព្រោះពួកចោរសៀមមិនអាចជឿទុកចិត្ដបានទេ។
លោកនាយឧត្ដសេនីយ៍ហ៊ីង ប៊ុនហៀង ជំនួសមុខឱ្យនាយទាហាន នាយទាហានរង និងពលទាហានទាំងអស់ ដែលកំពុងឈរជើងនៅសមរភូមិមុខបានមានមតិស្វាគមន៍ដល់គណៈប្រតិភូ និងថ្លែងអំណរគុណយ៉ាងជ្រាលជ្រៅដល់ប្រតិភូ ដែលបានយកចិត្ដទុកដាក់ដល់ការរស់នៅរបស់កងទ័ពនៅសមរភូមិមុខ។ លោកនាយឧត្ដមសេនីយ៍ក៏បានលើកឡើងនូវស្ថានការណ៍យោធាដ៏ក្ដៅគគុកនៅតំបន់ប្រាសាទព្រះវិហារដែលយោធាខ្មែរដ៏អង់អាចក្លាហានបានទប់ទល់ នឹងទាហានសៀមឈ្លានពានកាលពីថ្ងៃទី៤ដល់ថ្ងៃទី៧ កុម្ភៈ កន្លងទៅនេះ។ លោកនាយឧត្ដមសេនីយ៍ ហ៊ីង ប៊ុនហៀង បានបញ្ជាក់ថា ភាពអង់អាចក្លាហានរបស់វីរកងទ័ពនេះ ក៏អាស្រ័យដោយទទួលបានបទបញ្ជាដ៏មានប្រសិទ្ធភាពរបស់សម្ដេចនាយឧត្ដមសេនីយ៍ផុតលេខផ្កាយមាស៥ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ក្នុងសិទ្ធិស្វ័យការពារទឹកដីមិនឱ្យបាត់បង់សូម្បីតែមួយមីល្លីម៉ែត្រ។
តំណាងប្រតិភូបានថ្លែងនូវការកោតសរសើរដល់វីរកងទ័ពទាំងអស់ដែលបានបូជាសាច់ស្រស់ ឈាមស្រស់ក្នុងបុព្វហេតុការពារទឹកដីដ៏អង់អាចក្លាហានមិនចុះញ៉មនឹងសត្រូវសៀមឈ្លានពាន តស៊ូការពារបានយ៉ាងរឹងមាំនូវអធិបតេយ្យភាពជាតិធ្វើឱ្យប្រជាជាតិ ខ្មែរទាំងអស់មានជំនឿជឿជាក់យ៉ាងមុតមាំទៅលើវីរភាពដ៏ក្លាហានរបស់វីរយុទ្ធជនយើង។ ជាមួយនេះប្រតិភូក៏បានសន្យាថា នឹងនៅតែបន្ដអនុវត្ដជានិច្ច នូវវប្បធម៌សមរភូមិក្រោយជួយឧបត្ថម្ភគាំទ្រដល់សមរភូមិមុខ៕
ចែករំលែកព័តមាននេះ