ខេត្តបន្ទាយមានជ័យ ៖ ពលករខ្មែររាប់រយនាក់ក្នុង១ថ្ងៃៗ បានវិលត្រឡប់ពីថៃ មកធ្វើលិខិតឆ្លងដែនប្រភេទការងារតម្រូវទៅតាមច្បាប់អន្តោប្រវេសន៍ថ្មីរបស់ថៃ ដែលមានការរឹតបន្តឹងចំពោះពលករខុសច្បាប់ ។ ជាមួយនឹងការវិលត្រឡប់មកធ្វើលិខិតឆ្លងដែនប្រភេទការងារនេះ ពលករខ្មែរទាំងនោះបានរអ៊ូរទាំថា តម្លៃលិខិតឆ្លងដែនថ្លៃម្ល៉េះ? ការលើកឡើងបែបនេះ គឺខណៈពួកគាត់ចុះពីរថយន្តទ្រុងរបស់ថៃ នៅទីតាំងទទួលពលករដែលបញ្ជូនពីថៃនៅក្នុងភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត នាព្រឹកថ្ងៃទី៣០ ខែមិថុនា ។
ពលករម្នាក់ឈ្មោះ សេន ចាន់ថុល ភេទប្រុស អាយុ៤៦ឆ្នាំ ជាកម្មករសំណង់ធ្វើការនៅខេត្តសារ៉ាក់បូរី និងមានទីលំនៅភូមិអូរធំ ឃុំបន្ទាយនាង ស្រុកមង្គលបុរី និយាយថា គាត់បានវិលត្រឡប់ពីថៃជាមួយពលករធ្វើការជាមួយគ្នាសរុប១៣៥នាក់ ដើម្បីមកធ្វើលិខិតឆ្លងដែនប្រភេទការងារ ។ លិខិតឆ្លងដែនប្រភេទការងារនោះមានសុពលភាពរយៈពេល១០ឆ្នាំ និងមានទិដ្ឋាការរយៈពេល២ឆ្នាំ តម្លៃ៣១.០០០បាត(ប្រាក់ថៃ) បើគិតជាប្រាក់ខ្មែរគឺជាង៣លានរៀល ។
ពលកររូបនេះនិយាយទៀតថា ពលករគ្រប់រូបមិនមានប្រាក់ផ្ទាល់ខ្លួនធ្វើទេ គឺថៅកែថៃជាអ្នកចេញជំនួស ប៉ុន្តែគេនឹងកាត់ប្រាក់រាល់ខែពេលពួកគាត់វិលត្រឡប់ទៅធ្វើការនៅទឹកដីថៃវិញ ។ មិនមែនមានតែពលករម្នាក់ទេដែលចង់និយាយពីបញ្ហាផ្សេងៗប្រាប់អ្នកកាសែតនោះ ប៉ុន្តែនៅកន្លែងធ្វើលិខិតឆ្លងដែនការងារ ហាក់មានអ្នករារាំងខ្សឹបខ្សៀវ មិនឱ្យពលករនិយាយជាមួយអ្នកកាសែតទេ មិនតែប៉ុណ្ណោះថែមទាំងព្យាយាមនាំពលករចេញបញ្ចៀសពីការសួរនាំទៀតផង ។
ពលករម្នាក់សុំមិនបញ្ចេញឈ្មោះ ដែលវិលត្រឡប់ពីថៃតាមច្រកទ្វារអន្តរជាតិដូង ក្នុងស្រុកកំរៀង ខេត្តបាត់ដំបង និយាយថា គាត់បានទៅធ្វើលិខិតឆ្លងដែនការងារ នៅរាជធានីភ្នំពេញរួចហើយតាមរយៈក្រុមហ៊ុនខ្មែរមួយអស់់៣០.០០០បាត(ប្រាក់ថៃ) បើគិតជាប្រាក់ខ្មែរជាង៣លានរៀល ។
ពលកររូបនេះអះអាងថា គាត់ពុំមានប្រាក់ធ្វើលិខិតឆ្លងដែនទេ គឺថៅកែថៃជាអ្នកចេញប្រាក់ធ្វើលិខិតឆ្លងដែនឱ្យដូចគ្នា ប៉ុន្តែសោហ៊ុយចុះឡើងស្នាក់នៅ និងការចាយវាយជាប្រាក់ខ្លួនឯងដូចពលករទាំងអស់ដែរ ។ នៅពេលក្រុមពលករចុះពីរថយន្តនៅទីតាំងទទួលពលករក្នុងក្រុងប៉ោយប៉ែត គេឃេីញមានអ្នកចាំទទួលដឹកតាមរថយន្តផ្សេងៗដើម្បីយកទៅធ្វើលិខិតឆ្លងដែននៅរាជធានីភ្នំពេញ ប៉ុន្តែពេលឃើញអ្នកកាសែតថតរូបភាព ឬសាកសួរអ្នកចាំទទួលពលករ ពួកគេបែរជាបដិសេធថា ខ្លួនគ្រាន់តែជួយរករថយន្តឱ្យពលករជិះទៅភ្នំពេញប៉ុណ្ណោះ ។
ក្រុមពលករបានរអ៊ូរទាំថា ថ្វីដ្បិតតែប្រាក់ធ្វើលិខិតឆ្លងដែនគឺថៅកែថៃជាអ្នកចេញជំនួស ប៉ុន្តែតម្លៃនេះថ្លៃណាស់សម្រាប់ពួកគាត់ជាអ្នកក្រីក្រព្រោះពេលវិលត្រឡប់ទៅធ្វើការឱ្យថៃវិញ គេនឹងកាត់ប្រាក់ខែរហូត អាចប៉ះពាល់ដល់ជីវភាពគ្រួសារពួកគាត់ដែលនៅស្រុកខ្មែរជាក់ជាមិនខាន ។ បើគិតពីតម្លៃធ្វើលិខិតឆ្លងដែនការងារគិតជាប្រាក់រៀលនិងប្រាក់ដុល្លារឃើញថាថ្លៃណាស់រហូតជាង៣លានរៀល គឺប្រមាណ៨០០ដុល្លារទៅហើយ ។
ក្រុមពលករខ្មែរទាំងនេះ បានអំពាវនាវដល់ស្ថាប័នជាតិដែលបម្រើឱ្យការធ្វើលិខិតឆ្លងដែននេះ តើពិតជាយកតម្លៃដូចនេះមែនឬក៏អត់ តាមរយៈអ្នករត់ការដែលទៅទទួលពួកគាត់តាំងពីមាត់ច្រកទ្វារព្រំដែននោះ ។ ពួកគាត់សំណូមពររាជរដ្ឋាភិបាល ប្រកាសជាសារាចរលើតម្លៃធ្វើលិខិតឆ្លងដែនការងារនេះឱ្យបានដឹងជាទូទៅផងដើម្បីពួកគាត់ក៏ដូចជាពលករផ្សេងៗទៀតរាប់ពាន់នាក់ ដែលនឹងត្រូវវិលត្រឡប់ពីថៃមកធ្វេីនាពេលខាងមុខ ឲ្យមានការកក់ក្តៅក្នុងចិត្ត ។
គួរបញ្ជាក់ថា មួយរយៈចុងក្រោយនេះពោលគឺក្រោយពីព្រះមហាក្សត្រថៃ បានចេញព្រះរាជក្រឹត្យដល់ក្រសួងពាក់ព័ន្ធដែលធ្វើការងារលើពលករបរទេស ផ្សព្វផ្សាយច្បាប់់ថ្មី៨ចំណុចដោយមានការដាក់ទោសទណ្ឌធ្ងន់ធ្ងរលើពលរដ្ឋថៃណាដែលទទួលពលករបរទេសធ្វើការខុសច្បាប់ និងត្រូវពិន័យពី៤សែនបាតដល់៨សែនបាត និងមានទោសជាប់ពន្ធនាគារផងនោះ ក្រុមពលករខ្មែរដែលចូលទៅធ្វើការដោយខុសច្បាប់នៅតាមរោងចក្រ ឬសហគ្រាសតូចធំ ពិសេសកម្មករសំណង់តាមបណ្តាខេត្តក្នុងប្រទេសថៃ បាននាំគ្នាវិលត្រឡប់មកកម្ពុជាវិញជាបន្តបន្ទាប់ ដើម្បីធ្វើលិខិតឆ្លងដែនការងារ ។ ប៉ុន្តែពេលមកដល់ស្រុកអារញ្ញ ត្រូវបានតម្រួតថៃឱ្យចុះពីរថយន្តធម្មតាឡើងជិះរថយន្តទ្រុងវិញ បន្ទាប់មកគេដឹកមកប្រគល់ឱ្យអាជ្ញាធរនិងសមត្ថកិច្ចកម្ពុជានៅទីតាំងបញ្ជូនពលករពីថៃក្នុងក្រុងប៉ោយប៉ែត(សម្រាប់ច្រកទ្វារអន្តរជាតិប៉ោយប៉ែត) ។
ជុំវិញករណីខាងលើនេះ គេពុំដឹងថាតម្លៃលិខិតឆ្លងដែនការងារនៅនាយកដ្ឋានលិខិតឆ្លងដែនពិតប្រាកដប៉ុន្មាននោះទេ ព្រោះមិនស្គាល់លេខទូរស័ព្ទដើម្បីសុំការបំភ្លឺ ឬអាចជារឿងអស់លោកខាងក្រុមហ៊ុនជាអ្នកទារពីពលករតាមតែអំពើចិត្ត ។រឿងពលករខ្មែរដែលថៃបញ្ជូនមកឱ្យធ្វើលិខិតឆ្លងដែនថ្មីនេះសង្ស័យចូលដល់រឿងចុះទឹកក្រពើឡើងលើខ្លាទៀតហើយទេដឹង ?
ចែករំលែកព័តមាននេះ