កម្ពស់បាតរថយន្ត (Ground Clearance) គឺអាចហៅបានថា ជាចន្លោះកម្ពស់របស់បាតរថយន្តជាមួយផ្ទៃផ្លូវនៅក្រោមវា ។ ចំពោះកង់រថយន្ត គេមិនចាត់ទុកក្នុងនិយមន័យនេះទេ ព្រោះថា គេធ្វើវាឡើងដើម្បីឲ្យប៉ះជាមួយផ្ទៃផ្លូវស្រាប់ ។
កម្ពស់បាតរថយន្តនេះ មិនមែនសម្រាប់ឲ្យយើងយកម៉ែត្រទៅវាស់នោះទេ ពោលគឺវាត្រូវបានបញ្ជាក់មកជាស្រេចពីរោងចក្ររបស់រថយន្ត ។
គួរបញ្ជាក់ថា កម្ពស់នេះអាចប្រែប្រួលអាស្រ័យទៅនឹងទម្ងន់ដែលបានដាក់ក្នុងរថយន្ត ដូចជា ចំនួនមនុស្ស ចំណុះសាំង និងរបស់របរជាដើម ។
រថយន្តមានកម្ពស់បាតខ្ពស់ ៖
រថយន្តមានកម្ពស់បាតខ្ពស់ គឺមានសមត្ថភាពបើកបរនៅលើផ្លូវគ្រលុក Off Road បាន មានន័យថា កម្ពស់បាតកាន់តែខ្ពស់ ចុះគ្រលុកកាន់តែងាយស្រួល ។ ជាមួយគ្នានេះ រថយន្តប្រភេទ SUV (Lexus RX300, Lexus RX330…) រថយន្តប្រភេទភីកអាប់ (Ford Ranger, Hilux Vigo…) និងរថយន្តវែងធុនតូច (Toyota Alphard, Toyota Sienna) អាចមានកម្ពស់បាតខ្ពស់គ្រាន់បើដែរ ។
ដោយមានកម្ពស់បាតខ្ពស់ធៀបនឹងផ្លូវ រថយន្តប្រភេទទាំងនេះមានសមត្ថភាពដឹករបស់របរច្រើនជាងធម្មតា និងអាចបើកបរលើផ្លូវគ្រលុកដោយមិនកល់ជាមួយថ្នល់ ។ ប៉ុន្តែចំពោះគុណវិបត្តិវិញ គឺកាលណាកម្ពស់បាតរថយន្តកាន់តែខ្ពស់ ការទាញទំនាញចង្កូតកាន់តែខ្លាំង ដែលធ្វើឲ្យពិបាកទប់ពេលកាច់ចង្កូត ។
រថយន្តមានកម្ពស់បាតទាប ៖
រថយន្តមានកម្ពស់បាតទាបធៀបនឹងថ្នល់ គឺអាចធ្វើឲ្យអ្នកបើកបរងាយស្រួលរក្សាលំនឹងពេលកាច់ចង្កូត មានន័យថា កម្ពស់បាតរថយន្តកាន់តែទាប ការកាច់ចង្កូត និងល្បឿនកាន់តែល្អប្រសើរ ប៉ុន្តែកុំភ្លេចថា កម្ពស់បាតទាប គឺជិះចូលគ្រលុកមិនបាន ព្រោះថា វាអាចកល់ជាប់នឹងផ្លូវ ។
ដោយសារតែគេចង់ឲ្យរថយន្តកាន់តែងាយស្រួលក្នុងការបើកបរ រោងចក្រមួយចំនួនបានផលិតរថយន្តមានសមត្ថភាពទម្លាក់បូម ដំឡើងបូមទៅតាមស្ថានភាពផ្លូវ និងចំណង់ចំណូលចិត្តរបស់អ្នកបើកបរ ៕
ចែករំលែកព័តមាននេះ