ខេត្តបាត់ដំបង ៖ រថយន្តមួយបាំងកន្លះម៉ាកតូយ៉ូតា តាកូម៉ា ពណ៌ស្លែ ដែលអ្នករកស៊ីផ្លូវភ្នំពេញ-ប៉ោយប៉ែត ដាក់ងារឱ្យថារថយន្តដឹកទំនិញផ្តាច់ព្រលឹងនោះកាលពីវេលាទៀបភ្លឺ ថ្ងៃទី២០ មីនា បានធ្លាក់ពីលើផ្លូវទៅបុកដាច់ដើមស្វាយមួយដើម និងជ្រុលទៅបុកជាប់ដើមអំពិលទឹក ខណៈពេលអ្នកបើកបរងងុយដេក ។ ហេតុការណ៍នោះកើតឡើងនៅភូមិព្រៃតូច ស្រុកមោង ប្ញស្សី ខេត្តបាត់ដំបង ។ នៅព្រឹកនោះគេឃើញព្រូឡានម្នាក់នៅដេកចាំរថយន្ត និងទំនិញ ខណៈអ្នកបើកបរទំនងជាទៅរករថយន្តផ្ទេរទំនិញ ។
ព្រូឡាននោះប្រាប់ថា អ្នកបើកបរងងុយដេកបានជាបាត់ម្ចាស់ការបណ្តាលឱ្យរថយន្តធ្លាក់ពីផ្លូវបុកដើមឈើបែបនេះ ។ រថយន្តនោះខូចខាតខ្ទេចមុខទាំងស្រុង ឯទំនិញធ្លាក់រាយប៉ាយក្បែរផ្លូវ ។ ព្រូឡានប្រាប់ថា ទំនិញទាំងអស់នោះត្រូវគេជួលដឹកពីភ្នំពេញឆ្ពោះទៅកាន់ក្រុងប៉ោយប៉ែត ។ រថយន្តដឹកទំនិញប្រភេទមួយបាំងកន្លះទាំងតូយ៉ូតាទាំងនីស្សាន់តែងតែបើកប្រជែងគ្នាឱ្យទាន់សភាពការណ៍ ព្រោះម៉ូយត្រូវការទំនិញលក់ដូរ ដូច្នេះហើយគេដាក់ងារឱ្យថា «រថយន្តដឹកទំនិញផ្តាច់ព្រលឹង» ៕
ចែករំលែកព័តមាននេះ