រាជធានីភ្នំពេញ ៖ ទោះបីជាកំណើនយានយន្តបានកើនឡើងយ៉ាងគំហុកក្ដី ប៉ុន្តែការប្រើប្រាស់សេវាធានារ៉ាប់រងលើយានយន្ត នៅតែមានចំនួនតិចនៅឡើយ ។ យ៉ាងណាក៏ដោយអ្នកជំនាញមើលឃើញថា មានសញ្ញាវិជ្ជមាន និងទទួលបានកំណើនរាល់ឆ្នាំ ។
លោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជា បានឱ្យដឹងតាមទូរស័ព្ទថា ៖
« ចំពោះកម្ពុជា សេវាធានារ៉ាប់រងលើយានយន្ត នៅមិនទាន់មានចំនួនច្រើននោះទេ ព្រោះយើងនៅមានការយល់ដឹងតិចតួចលើសេវាកម្មមួយនេះ បើធៀបនឹងប្រទេសផ្សេងៗ ។ ម្យ៉ាងទៀត យើងមិនទាន់មានច្បាប់ដែលតម្រូវឱ្យយានយន្តទាំងអស់ ត្រូវទិញធានារ៉ាប់រងឡើយ » ។
យ៉ាងណាក៏ដោយ បើទោះបីជាកម្ពុជាមិនទាន់មានច្បាប់តម្រូវឱ្យពលរដ្ឋមានការតព្វកិច្ចទិញធានារ៉ាប់រងលើយានយន្តក្តី តែលោកមើលឃើញថា សេវាធានារ៉ាប់រងមួយនេះមានការកើនឡើងគួរឱ្យកត់សម្គាល់ពីមួយឆ្នាំទៅមួយឆ្នាំ ។
លោកបញ្ជាក់ថា ៖« ក្នុងឆ្នាំ២០១៦កន្លងទៅ បុព្វលាភលើយានយន្ត យើងសម្រេចបានចំនួន១០,២លានដុល្លារ កើនឡើងប្រហែល៩% ធៀបទៅនឹងឆ្នាំ២០១៥ ។ លើសពីនេះក្នុងត្រីមាសទី១ដើមឆ្នាំនេះ យើងមានបុព្វលាភពីធានារ៉ាប់រងលើយានយន្តមាប្រមាណ៣,៦លានដុល្លារ កើនឡើងជាង១០% ធៀបទៅនឹងគ្រាដូចគ្នាឆ្នាំមុន » ។
លោក យក់ ចំរើនឫទ្ធិ អគ្គនាយក្រុមហ៊ុន ធានារ៉ាប់រងហ្វតតេ យល់ឃើញថា បើទោះបីជាចំនួនយានយន្តកំពុងប្រើប្រាស់មានច្រើនក៏ដោយ ប៉ុន្តែមិនមែនរថយន្តទាំងអស់សុទ្ធតែមានធានារ៉ាប់រងទេ ។ បច្ចុប្បន្នយានយន្តដែលមានធានារ៉ាប់រងប្រហែល១០%ប៉ុណ្ណោះ ចំណែក៩០%ទៀតមិនទាន់មាននោះទេ ។
លោកបន្តថា ៖«ក្នុងឆ្នាំ២០១៦កន្លងទៅ ខ្ញុំមានបុព្វលាភ(ចំណូល)បានមកពីធានារ៉ាប់រងរថយន្តប្រហែល៤លានដុល្លារ កើនឡើងប្រហែល២០% បើប្រៀបធៀបនឹងឆ្នាំ២០១៥។ ដោយឡែក ក្នុងរយៈ៥ខែដើមឆ្នាំ២០១៧ ហ្វតតេ លក់ធានារ៉ាប់រងរថយន្តបានប្រមាណ២លានដុល្លារ កើនឡើងជិត២០% ធៀបនឹងគ្រាដូចគ្នាឆ្នាំមុន »។
រាជរដ្ឋាភិបាលកំពុងមានគម្រោងពង្រីកវិសាលភាពនៃកាតព្វកិច្ចធានារ៉ាប់រងលើយានយន្ដ ដោយតម្រូវឲ្យគ្រប់យានយន្ដទាំងអស់ មុននឹងចរាចរលើដងផ្លូវ ត្រូវតែមានប័ណ្ណធានារ៉ាប់រង ។ ទោះបីយ៉ាងណា គម្រោងនេះនៅមិនទាន់កំណត់ច្បាស់លាស់នៅឡើយ ហើយដល់ពេលនោះការប្រើប្រាស់សេវាធានារ៉ាប់រងលើយានយន្ដនឹងមានកំណើនខ្ពស់ ។ នេះបើតាមលោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជា បានបញ្ជាក់ ។
លោកបន្ដថា បច្ចុប្បន្ន ក្រុមហ៊ុនធានា រ៉ាប់រងលើយានយន្តដែលចូលជាសមាជិក សមាគមមានចំនួន៧ក្រុមហ៊ុន ដែលកំពុងផ្តល់សេវាធានារ៉ាប់រងលើយានយន្តជាទូទៅដូចជា ទី១-គ្របដណ្តប់លើគ្រោះថ្នាក់ដល់តតីជន, ទី២-ទៅលើទ្រព្យសម្បតិ្តខ្លួនឯង និងអ្នកផ្សេង, ទី៣-ទៅលើអ្នកដំណើរនៅលើយានយន្ត និងទី៤-លើការបាត់បង់រថយន្តដោយសារចោរកម្ម ៕
ចែករំលែកព័តមាននេះ