ខេត្តសៀមរាប ៖ ភ្ញៀវទេសចរចិនដែលមកទស្សនានៅកម្ពុជា បានជាប់ចំណាត់ថ្នាក់លេខ១ ខណៈខេត្តសៀមរាបជាតំបន់ទេសចរណ៍ប្រវត្តិសាស្ត្រ និងវប្បធម៌ដ៏សម្បូរបែបនោះ ក៏សម្បូរជនជាតិចិនមកទស្សនាដែរ ។ ទន្ទឹមនឹងនេះ អ្នកប្រកបអាជីវកម្មវិស័យទេសចរណ៍ក្នុងខេត្តនេះលើកឡើងថា បើគ្មានភ្ញៀវចិនទេ ផ្ទះសំណាក់ សណ្ឋាគារ និងអាជីវកម្មពាក់ព័ន្ធវិស័យទេសចរណ៍ អាចនឹងជួបបញ្ហាដួលរលំ និងខាតបង់មិនខាន ។
លោក កាំង តាំងសុង មគ្គុទ្ទេសក៍នាំភ្ញៀវទស្សនានៅតំបន់អង្គរ ឱ្យដឹងថា បច្ចុប្បន្ននេះ កំណើនភ្ញៀវទេសចរចិនមកទស្សនានៅតំបន់អង្គរ និងតំបន់ទេសចរណ៍នានាក្នុងខេត្តមានច្រើនណាស់ និងអាចនិយាយបានថា ជនជាតិចិនមកទស្សនាខេត្តនេះ ជាប់ចំណាត់ថ្នាក់លេខ១ ព្រោះក្នុងមួយថ្ងៃៗ ឬមួយខែៗ ពួកគេមកទស្សនានៅក្នុងតំបន់អង្គរ និងតំបន់នានាយ៉ាងច្រើនទាំងចាស់ទាំងក្មេង ។
លោកបន្តថា ការមកទស្សនានៅក្នុងតំបន់អង្គររបស់ជនជាតិចិន ដោយសារតែគោលនយោបាយរបស់កម្ពុជា និងចិនមានទំនាក់ទំនងល្អ ព្រោះកន្លងមក ប្រទេសទាំងពីរជាមហាមិត្តនឹងគ្នា ហើយមួយរយៈពេលចុងក្រោយនេះដែរឃើញថា រាជរដ្ឋាភិបាលកម្ពុជាបានផ្សព្វផ្សាយពីវប្បធម៌ និងទេសចរណ៍របស់យើងដល់ប្រទេសចិន ហើយចិនប្រកាសប្រាប់ពលរដ្ឋខ្លួនឲ្យមកទស្សនាតំបន់ប្រវត្តិសាស្ត្ររបស់កម្ពុជា ធ្វើឱ្យមានកំណើនជនជាតិចិនមកទស្សនានៅកម្ពុជា ជាពិសេស តំបន់អង្គរ ។
លោកបន្ថែមថា បច្ចុប្បន្ន ជារដូវកាលវិស្សមកាលរបស់សិស្ស-និស្សិតចិន ពលរដ្ឋចិនមួយចំនួនទៀតក៏បាននាំក្រុមគ្រួសារដើរកម្សាន្ត ហើយតំបន់អង្គរ ក៏ជាគោលដៅទេសចរណ៍មួយរបស់ពួកគេ ក៏ព្រោះតែបច្ចុប្បន្នជើងហោះហើរត្រង់ពីចិនមកកាន់កម្ពុជា ក៏ដូចជាអាកាសយានដ្ឋានអន្តរជាតិសៀមរាបមានច្រើនជើងក្នុងមួយថ្ងៃៗ ។ លោកថា ៖ «ភ្ញៀវទេសចរចិនមកទស្សនានៅតំបន់អង្គរ ខេត្តសៀមរាប គឺជាគោលដៅរបស់ពួកគេតែម្ដង ព្រោះបើតាមខ្ញុំដឹង ភ្ញៀវទាំងអស់នោះហោះមកត្រង់ពីប្រទេសចិន មកកាន់ព្រលានអន្តរជាតិរបស់កម្ពុជា ហើយបន្ទាប់ពីទស្សនារយៈពេល៤ទៅ៥ថ្ងៃហើយ ពួកគាត់នឹងហោះត្រឡប់ទៅប្រទេសចិនវិញ ដោយមិនទៅកាន់ប្រទេសទីបីទៀតទេ » ។
ម្ចាស់សណ្ឋាគារស៊ីធី អង្គរ នៅខេត្តសៀមរាប និងជាពាណិជ្ជករល្បីឈ្មោះមួយរូប ឱ្យដឹងថា សព្វថ្ងៃនេះ នៅខេត្តសៀមរាប បើអត់មានភ្ញៀវទេសចរចិនទេ អ្នករកទទួលទានលើវិស័យទេសចរណ៍មួយចំនួននឹងជួបបញ្ហា ។ ជាក់ស្ដែង នៅតាមផ្សារ និងកន្លែងកម្សាន្តនានាក្នុងខេត្តភាគច្រើនជាជនជាតិចិន ។
មគ្គុទ្ទេសក៍ផ្សេងទៀតក៏បានលើកឡើងដែរថា បើគ្មានជនជាតិចិនទេ តំបន់ទេសចរណ៍មួយចំនួននឹងស្ងាត់ និងមិនសូវសម្បូរភ្ញៀវមកទស្សនាដូចពេលនេះទេ ព្រោះភ្ញៀវអឺរ៉ុប ឬភ្ញៀវផ្សេងទៀតហាក់ស្ងាត់បន្តិច ក៏ព្រោះតែភ្ញៀវទាំងនោះមានរដូវកាលមកទស្សនា ។
ម្ចាស់សណ្ឋាគារខាងលើបន្តថា ៖ « ការមកទស្សនារបស់ភ្ញៀវទេសចរអន្តរជាតិនៅក្នុងខេត្តសៀមរាបនេះដែរ បើសិនជាប្រទេសកម្ពុជាយើងគ្មានសន្តិសុខ គ្មានស្ថិរភាព ប្រហែលជាគេមិនមកទេ គេនឹងបង្វែរទិសដៅទៅកាន់ប្រទេសផ្សេងៗ ហើយពេលនោះ ប្រជាជនកម្ពុជាយើងដែលជាអ្នករកស៊ី នឹងបាត់បង់ចំណូលជាក់ជាមិនខាន » ។
ដោយឡែក អាជីវករមួយចំនួនទៀតនៅក្នុងផ្សាររាត្រីផាប់ស្ទ្រីត (Pub Street) ក៏បានឱ្យដឹងថា បច្ចុប្បន្ន ភ្ញៀវអឺរ៉ុបធ្លាក់ចុះបន្តិច ប៉ុន្តែភ្ញៀវចិន និងវៀតណាមមានច្រើន ហើយការចំណាយរបស់ជនជាតិចិនទាំងនោះក៏ច្រើនដែរទៅលើសេវាកម្មទេសចរណ៍នានា ៕
ចែករំលែកព័តមាននេះ