រាជធានីភ្នំពេញ ៖ រថយន្តធុនយក្សចំនួន៣គ្រឿង បានបុកបន្តកន្ទុយគ្នា ហើយបានធ្វើឲ្យរថយន្តដែលបើកក្រោយគេ រងការខូចខាតយ៉ាងដំណំ និងកៀបជើងអ្នកបើកបរជាប់ ប៉ុន្តែមិនបានបណ្ដាលឲ្យរងរបួសធ្ងន់ធ្ងរឡើយ គ្រាន់តែរបួសស្រាលតែប៉ុណ្ណោះ បន្ទាប់មកត្រូវបានគេជួយគាស់យកចេញភ្លាមៗផងដែរ ហើយគាត់បានដើររួចជាធម្មតាទេគ្មានបញ្ហាអ្វីឡើយ ។
ឧបទ្ទវហេតុគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង០១និង៣០នាទីរសៀល ថ្ងៃទី២៩ ខែមិថុនា ឆ្នាំ២០១៧ នៅត្រង់ចំណុចខាងជើងរោងចក្រកាត់ដេរ ប៊ឺរី ស្ថិតនៅក្នុងភូមិជម្ពូវ័ន្ត សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។ រថយន្តដែលបានបុកបន្តកន្ទុយគ្នានោះ មួយគ្រឿងដែលបើកមុខគេនោះម៉ាក ហ៊ីណូ ពណ៍ខៀវពាក់ស្លាកលេខ ព្រះសីហនុ ៣A-០៩៤៣ សណ្ដោងកន្ទុយរ៉ឺម៉កដឹកទំនិញ ចំណែករថយន្តបើកបន្ទាប់ម៉ាក ហ៊ីណូ ពណ៍ខៀវ សណ្ដោងកន្ទុយរ៉ឺម៉កដឹកទំនិញដូចគ្នា ពាក់ស្លាកលេខ ភ្នំពេញ ៤A-០៦៧៦ និងរថយន្តដែលបើកក្រោយគេ ហើយរងការខូចខាតខ្លាំងជាងគេនោះម៉ាក នីស្សាន់ ពណ៏ស ពាក់ស្លាកលេខ ភ្នំពេញ ៣B-៧៨០៩ ជាប្រភេទរថយន្តបែនដឹកដី ។ តាមប្រភពព័ត៌មានបានឲ្យដឹងថា នៅមុនពេលកើតហេតុ រថយន្តទាំង៣គ្រឿងនោះ បានធ្វើដំណើរស្របគ្នា ក្នុងទិសដៅពីជើងទៅត្បូង ក្នុងល្បឿនលឿនប្រដេញគ្នា ដោយមិនបានគិតដល់ពីសុវត្ថិភាពអ្នកដំណើរតាម ដងផ្លូវនោះឡើយ លុះពេលទៅដល់ត្រង់ចំណុចកើតហេតុខាងលើ រថយន្តដែលបើកមុខគេនោះបានវាក់អើ ជាមួយរថយន្តមួយគ្រឿងផ្សេងទៀត អ្នកបើកបរបានជាន់ហ្វ្រាំងឈប់យ៉ាងប្រថុចញ៉ុចបំផុត ។ ពេលនោះរថយន្តទីពីរ ដែលបើកបន្ទាប់ពីក្រោយ បានជាន់ហ្វ្រាំងឈប់យ៉ាងតក់ក្រហល់ដូចគ្នាដែរ ប៉ុន្តែក៏បានជ្រុលទៅបុកពីក្រោយរថយន្តខាងមុខនោះ បណ្ដាលឲ្យរងការខូចខាត ប៉ុន្តែមិនធ្ងន់ធ្ងរឡើយ ។ ដោយឡែករថយន្តបែនដឹកដី បានវាក់ជាន់ហ្វ្រាំងឈប់មិនទាន់ ក៏បានជ្រុលទៅបុកពីក្រោយរថយន្តទីពីរ ពេញទំហឹងបណ្ដាលឲ្យរងការ ខូច ខាតក្រពឹតមុខ និងកៀបជើងអ្នកបើកបរជាប់នៅក្នុងកាប៊ីនតែម្ដង ប៉ុន្តែសំណាងល្អរងរបួសស្រាលតែប៉ុណ្ណោះ ។
ប្រភពដដែលបានបន្តទៀតថា ក្រោយពេលកើតហេតុ រថយន្តអ្នកបើកបររថយន្តពីរគ្រឿងខាងមុខបានរត់ គេចខ្លួនបាត់ ទៅតាមទម្លាប់របស់ពួកគេ ដែលពួកគេតែងតែគេចខ្លួនបែបនេះ ។ នៅក្រោយពេលមានបញ្ហាកើត ព្រោះស្មានថាអ្នកបើករថយន្តបែនដឹកដីស្លាប់ បន្ទាប់មកនគរបាលបានចុះទៅកាន់កន្លែងកើតហេតុ ហើយបានគាស់យកអ្នកបើករថយន្តបែនដឹកដីចេញ និងធ្វើការវាស់វែង ប៉ុន្តែខណៈនោះ តំណាងរថយន្តទាំងនោះបានសុំធ្វើការសម្រុះសម្រួលគ្នា បញ្ចប់រឿងនៅកន្លែងកើតហេតុនោះតែម្ដង ៕
ចែករំលែកព័តមាននេះ