ខេត្តរតនគិរី ៖ ដើមនាងនួន ធ្នង់ និងដើមបេង នៅតាមព្រៃសហគមន៍ទេសចរណ៍ តំបន់រមណីយដ្ឋានធម្មជាតិជាច្រើនកន្លែង ត្រូវបានជនខិលខូច លួចកាប់ជាបន្តបន្ទាប់ ក៏ប៉ុន្តែជនប្រព្រឹត្តទាំងនោះ មិនត្រូវបានស្ថាបនជំនាញពាក់ព័ន្ធ ចាប់យកមកផ្ដន្ទាទោសឡើយ ។ ជាពិសេស គឺនៅតំបន់រមណីយដ្ឋានវាលថ្មរំប្លង់ ។ គេសង្ស័យថា ហាក់ដូចជាមានការត្រូវរូវគ្នា ពីជំនាញរដ្ឋបាលព្រៃឈើផ្នែកអូរជុំ ឬអាចមានសម្អាងអ្វីមួយ ទើបហ៊ានប្រព្រឹត្តម្ដងហើយម្ដងទៀត ។
ជាក់ស្ដែងឈើធ្នង់១ដើម ដែលគេលួចកាប់ថ្មីៗ ពុះច្រៀករួចបម្រុងដឹកចេញ ត្រូវបានកម្លាំងនគរបាលអធិការដ្ឋាន សហការណ៍ជាមួយកម្លាំងអាវុធហត្ថស្រុកអូរជុំ និងកម្លាំងជំនាញរដ្ឋបាលព្រៃឈើផ្នែកវើនសៃ ចុះបង្ក្រាបចុះរឹបអូស កាលពីថ្ងៃទី២៧ ខែមិថុនា ឆ្នាំ២០១៧ ស្ថិតក្នុងភូមិតងក្រម៉ាល់ ឃុំអូរជុំ ស្រុកអូរជុំ ត្រង់ចំណុចតំបន់រមណីយដ្ឋានវាលថ្មរំប្លង់ ។ តាមការឲ្យដឹងពីលោក ហុង គឹមសេង អធិការនគរបាលស្រុកអូរជុំថា ការចុះបង្ក្រាបនេះ គឺខាងជំនាញរដ្ឋបាលព្រៃឈើសុំកម្លាំងសហការណ៍ រឹបអូសបានឈើធ្នង់ចំនួន៨កំណាត់ ក្នុងមួយកំណាត់មានប្រវែង ១.២០ម៉ែត្រ តែលោកមិនបានបញ្ជាក់ពីមុខកាត់ឈើនោះទេ ។ លោកបានបន្តថា ឈើធ្នង់ទាំង៨កំណាត់នោះ ត្រូវបានជំនាញយកទៅរក្សាទុកនៅខណ្ឌរដ្ឋបាលព្រៃឈើខេត្តហើយ ។ ចំណែកសមត្ថកិច្ចស្រុកអូរជុំ ក៏បានលួចបង្ហើបថា ជនប្រព្រឹត្តត្រូវគេស្គាល់ឈ្មោះហើយ ក៏ប៉ុន្តែខាងជំនាញរដ្ឋបាលព្រៃឈើថា មិនមានភស្ដុតាងអ្វីសម្រាប់ចាប់ខ្លួនជននោះទេ ។
សង្ស័យចោរក្នុង ចោរស្រុកឲ្យដៃ ទើបចោរព្រៃថ្លើមពាសមេយបែបនេះ ។ ចាំមើលតើអាជ្ញាធរហ៊ានវែកមុខចោរក្នុងបានទេ?
ចែករំលែកព័តមាននេះ