ហ្វ៊ីលីពីន ៖ កងទ័ពហ្វ៊ីលីពីនប្រកាសនាថ្ងៃទី២៨ មិថុនា ថា បានរកឃើញសាកសពជនស៊ីវិល៥នាក់ត្រូវកាត់ក្បាលនៅទីក្រុង MARAWI ភាគខាងត្បូងប្រទេស ដែលនៅ កាន់កាប់មួយផ្នែកដោយពួកឧទ្ទាមអ៊ិស្លាមនិយមដើរតាមគន្លងក្រុមរដ្ឋអ៊ិស្លាមចាប់តាំងពីជាង៥សប្តាហ៍មកហើយ ។
ការរកឃើញសាកសពជនស៊ីវិល១៧នាក់ ក្នុងនោះ៥នាក់ត្រូវកាត់ក្បាលគឺដូចការអះអាងរបស់អ្នកអាចរត់គេចខ្លួន រួចមួយចំនួនចេញពីទីក្រុងនេះ ដែលរៀបរាប់ថា បានឃើញសាកសពមនុស្សដាច់ក្បាលទាំងឡាយ ។
សមាជិកក្រុមសង្គ្រោះម្នាក់គូសបញ្ជាក់ប្រាប់រ៉យទ័រថា បណ្តាសាកសពមនុស្សត្រូវកាត់ក្បាលពិតជារកឃើញ ។
ពួកឧទ្ទាមអ៊ិស្លាមនិយមជ្រុលជាច្រើនរយនាក់បានលុកលុយចូលទីក្រុង MARAWI កាលពីថ្ងៃទី២៣ ឧសភា បន្ទាប់ពីបរាជ័យនៃប្រតិបត្តិការយោធាមួយដែលសំដៅចាប់ខ្លួនប្រមុខក្រុមនេះឈ្មោះ ISNILON HAPILON ។ ការប្រយុទ្ធគ្នាបណ្តាលឱ្យមនុស្សស្លាប់៧១នាក់ ហើយក្នុងជួរកងម្លាំងសន្តិសុខហ្វ៊ីលីពីន ហើយពួកបះបោរក្រុម MAUTE ដើរតាមគន្លងក្រុមរដ្ឋអ៊ិស្លាមស្លាប់២៩៩នាក់ ។ ប្រធានាធិបតីហ្វ៊ីលីពីន លោក RODRIGO DUTERTE ប្រកាសថា ប្រទេសកំពុងស្ថិតក្នុងគ្រោះថ្នាក់យ៉ាងធំ ហើយសន្យាកម្ទេចពួកអ៊ិស្លាមនិយមដែលនៅកាន់កាប់មួយផ្នែកនៃក្រុង MARAWI ។
ក្នុងឱកាសនៃកិច្ចប្រជុំមួយ ប្រធានាធិបតីហ្វ៊ីលីពីនប្រកាសថា ពួកនេះពុំគិតអ្វីក្រៅពីការសម្លាប់ និងការបំផ្លាញយ៉ាងព្រៃផ្សៃឡើយ ។ លោកអះអាងថា បានទទួលកាំភ្លើងវាយលុកជាច្រើនរយដើម ហើយបញ្ជាក់ថា ជាកាំភ្លើងរបស់ចិន ដើម្បីជួយកងទ័ពរដ្ឋាភិបាលប្រឆាំងពួកជីហាដ ៕
ចែករំលែកព័តមាននេះ