វិភាគ ៖ គេឮសំឡេងស្រែកដង្ហោយហៅរកជំនួយពីលើអគារ ដែលកំពុងតែឆេះពេញបន្ទុក សម្រែកនៃសេចក្តីឈឺចាប់ ដោយការរលាក និងរបួសបាក់ដៃ បាក់ជើង ព្រមទាំងការស្លា.ប់ជាច្រើននាក់ ដែលបង្កឡើងគ្រោះមហន្តរាយអគ្គិភ័យដ៏ធំបំផុតនៅកម្ពុជានាចុងឆ្នាំ២០២២…
វិភាគ ៖ គេឮសំឡេងស្រែកដង្ហោយហៅរកជំនួយពីលើអគារ ដែលកំពុងតែឆេះពេញបន្ទុក សម្រែកនៃសេចក្តីឈឺចាប់ ដោយការរលាក និងរបួសបាក់ដៃ បាក់ជើង ព្រមទាំងការស្លា.ប់ជាច្រើននាក់ ដែលបង្កឡើងគ្រោះមហន្តរាយអគ្គិភ័យដ៏ធំបំផុតនៅកម្ពុជានាចុងឆ្នាំ២០២២ ។
គ្រោះអគ្គិភ័យនៅកាស៊ីណូ នៅទីក្រុងប៉ោយប៉ែត ខេត្តបន្ទាយមានជ័យ គឺជាសក្ខីភាពមួយ ដែលសរបញ្ជាក់ និងពញ្ញាក់ស្មារតីបណ្តាគម្រោងសាងសង់អគារ រោងចក្រ និងអគារខ្ពស់ៗ នានា និងអ្នកដែលពាក់ព័ន្ធឲ្យយកចិត្តទុកដាក់ចំពោះបញ្ហាបង្ការ និងការពារគ្រោះអគ្គិភ័យ ដែលអាចនឹងកើតឡើងជាយថាហេតុ ។
នៅពេល ដែលឃើញរូបភាព និងវីដេអូ ដែលគេបានបង្ហោះតាមបណ្តាញសង្គម ក៏ដូចជាតាមសារព័ត៌មានានា គ្រោះអគ្គិភ័យដែលបានកើតមានតាំងពីវេលាម៉ោង១១និង៣០នាទីយប់ថ្ងៃទី២៨ រហូតដល់ព្រឹកថ្ងៃទី២៩ ខែធ្នូ ឆ្នាំ២០២២ មិនទាន់រលត់ អាចសន្មត ហៅថា គឺជាគ្រោះអគ្គិភ័យធំបំផុតមួយនៅកម្ពុជា ខណៈដែលគេដឹងថា ទីកន្លែងកើតអគ្គិភ័យនេះ មានបុគ្គលិកបម្រើការរហូតដល់ទៅ ៤០០នាក់ និងមានភ្ញៀវចេញចូលជាប្រចាំ ។
គ្រោះអគ្គិភ័យនោះ បានសម្លា.ប់មនុស្ស ២៦នាក់ និងបង្កអោយរងរបួស ៥៧ នាក់ ។
យើងសូមចូលរួមរំលែកទុក្ខ ជាមួយនឹងក្រុមគ្រួសារជនរងគ្រោះទាំងអស់ ប៉ុន្តែទន្ទឹមនឹងនោះ ក៏សូមផ្តាំផ្ញើទៅអស់អ្នកដែលសម្រេចចិត្តនៅក្នុងវិស័យសំណង់ ក៏ដូចជាអ្នកវិនិយោគ អ្នកបច្ចេកទេសសាងសង់ វិស្វករ ស្ថាបត្យករ ក៏ដូចជាអាជ្ញាធរមូលដ្ឋានសូមយកចិត្តទុកដាក់ នឹងស្តង់ដាការពារ និងបង្ការគ្រោះអគ្គិភ័យ ជាអាទិភាពសំខាន់បំផុត បន្ទាប់មក ក៏ត្រូវរិះគិត អំពីច្រកសុវត្ថិភាពនៅតាមសំណង់អគារ ក៏ដូចជាគម្រោងរបស់ខ្លួន។ រឿងនេះ មិនមែនជារឿងលេងសើច ទេ ។
សូមកុំស្តាយលុយ ស្តាយពេលវេលា ស្តាយធនធានមនុស្ស នៅក្នុងការយកចិត្តទុកដាក់ នឹងបញ្ហាអគ្គិភ័យនេះ ។ ការវិនិយោគ និងសាងសង់គម្រោងនានា ដែលរិះគិត និងយកចិត្តទុកដាក់នៅលើបញ្ហាបង្ការ និងការពារអគ្គិភ័យនេះ សំខាន់ណាស់ ។
យោងតាមរបាយការណ៍របស់ក្រសួងរៀបចំដែនដី នគររូបនីយកម្ម និងសំណង់ បានឱ្យដឹងថា គិតពីឆ្នាំ២០០០ ដល់ខែវិច្ឆិកា ឆ្នាំ ២០២២ នៅកម្ពុជាមានគម្រោងអគារខ្ពស់ៗ ចាប់ពី ៥ជាន់ឡើងរហូតដល់ ២,៥៣៤អគារ នៅក្នុងនោះនៅរាជធានីភ្នំពេញ មាន ១,៦៧៥អគារ ខេត្តព្រះសីហនុ ៦៨៥អគារ, បន្ទាយមានជ័យ ១៣១អគារ និងខេត្តផ្សេងៗចំនួន ៤៣អគារ។ ក្រៅពីនោះនៅមានគម្រោងកសាងបុរី និងលំនៅដ្ឋានជាច្រើន ពាន់គម្រោងបន្ថែមទៀត ។
មកដល់ពេលនេះ គម្រោងខ្លះ បានគិតគូរអំពីស្តង់ដា បង្ការ និងការពារគ្រោះអគ្គិភ័យនេះ ប៉ុន្តែគម្រោងខ្លះនៅតែធ្វេសប្រហែស ហើយមន្ត្រី ដែលចុះទៅត្រួតពិនិត្យ ក៏ហាក់មិនសូវយកចិត្តទុកដាក់ករណីនេះទៀត។ ដូច្នេះហើយ វាគឺជាហានិភ័យមួយ ។
ដើម្បីបង្ការនិងការពារគ្រោះដ៏កំណាចនេះ មិនឲ្យមាននៅក្នុងគម្រោងរបស់ខ្លួន សូមប្រញាប់កែខៃស្ថានការណ៍ ។ ប្រសិនបើមិនទាន់បញ្ចប់ គួរប្រញាប់កែប្លង់កសាង ប៉ុន្តែប្រសិនបើបានជាសាងសង់ហើយ សូមរិះគិតបំពាក់ឧបករណ៍ការពារ និងបង្ការ ក៏ដូចជារៀបចំបន្ថែមឲ្យហើយ ដើម្បីកុំអោយគ្រោះមហន្តរាយកើតមានអាក្រក់ជាងគ្រោះមហន្តរាយដូចនៅកាស៊ីណូក្រុងប៉ោយប៉ែតជាថ្មី ។
ស្តង់ដាសម្រាប់ការពារ និងបង្ការអគ្គិភ័យនៅតាមអគារ និងសំណង់ធំៗ គួររិះគិតអំពីច្រក និងជណ្តើរគ្រាអាសន្ន ដែលមានសុវត្ថិភាព, ច្រកសម្រាប់រថយន្តពន្លត់អគ្គិភ័យចេញចូលបានងាយស្រួល ហើយនៅតាមអគារ គឺត្រូវមានម៉ូទ័របូម និងជំរុញសំពាធទឹក សម្រាប់ប្រព័ន្ធពន្លត់អគ្គិភ័យ សំភារបង្ការ និងពន្លត់អគ្គិភ័យខ្នាតតូច ឲ្យបានច្រើនកន្លែង ។ល។
សរុបមកវិញ កុំមើលស្រាលស្ថានការណ៍គ្រោះអគ្គិភ័យ គឺជាគ្រោះដែលមើលមិនឃើញ ដូច្នេះមានតែការបង្ការ និងការពារ ហើយយកចិត្តទុកដាក់ បំពាក់ប្រព័ន្ធសុវត្ថិភាពគ្រប់គ្រាន់ទេ ទើបអាចកាត់បន្ថយហានិភ័យ ដោយសារតែគ្រោះដ៏កំណាចនេះបាន ។ ការប្រហែស គឺមានតែគ្រោះមហន្តរាយធ្ងន់ធ្ងរប៉ុណ្ណោះ ។ គ្រោះអគ្គិភ័យមិនមែនជាបញ្ហាលេងសើចឡើយ វាគឺជាបញ្ហាស្លា.ប់រស់របស់សំណង់ និងគម្រោង នានា ៕
ដោយ៖ ហេង ចេស្តារ
ចែករំលែកព័តមាននេះ