រាជធានីភ្នំពេញ ៖ ការវិវឌ្ឍនៃបច្ចេក វិទ្យាកាន់តែទំនើប បានផ្តល់ភាពងាយស្រួលដល់មនុស្សកាន់តែប្រសើរឡើងទាំងការទំនាក់ទំនង ការបំពេញការងារ ការសិក្សាស្រាវជ្រាវ កម្សាន្ដ និងតាមដានព័ត៌មានថ្មីៗដែលកើតឡើងជុំវិញពិភពលោក ។ និន្នាការនេះ បានធ្វើឲ្យអ្នកប្រើប្រាស់ស្មាតហ្វូនងាកមកចំណាយប្រាក់ទៅលើការប្រើប្រាស់អីុនធើរណេត ជាជាងការបញ្ចូលប្រាក់គ្រាន់តែទូរស័ព្ទរកគ្នា ដែលខុសពី៥ឬ១០ឆ្នាំមុន ។ ទោះបីយ៉ាងណា ដើម្បីប្រើស្មាតហ្វូនឲ្យអស់ពីលទ្ធភាព ក៏ត្រូវមានចំណេះដឹងខាងបច្ចេកវិទ្យា និងចេះភាសាបរទេសខ្លះៗដែរ ។
លោក ម៉ៅ សំណាង បុគ្គលិកបម្រើការនៅក្រុមហ៊ុនឯកជនមួយ បានឱ្យដឹងថា រាល់ថ្ងៃ ការប្រើប្រាស់ស្មាតហ្វូនមានសារសំខាន់ណាស់ ជាពិសេសសម្រាប់ការងារ ព្រោះថា ស្មាតហ្វូនមានកម្មវិធីច្រើន អាចប្រើប្រាស់បានទាន់ពេលវេលា គ្រាន់តែភ្ជាប់សេវាអីុនធើរណេត គឺអាចស្វែងរកព័ត៌មានដែលយើងចង់ដឹង អាចផ្ញើឯកសារ តាមដានព័ត៌មាននានា និងចែករំលែកព័ត៌មានទៅកាន់ក្រុមគ្រួសារ និងមិត្តភក្តិយ៉ាងងាយស្រួល ។
លោកបញ្ជាក់ថា ៖« រៀងរាល់ខែ ខ្ញុំបានចំណាយប្រាក់លើការប្រើប្រាស់ទូរស័ព្ទយ៉ាងហោចណាស់ពី១០ ទៅ១២ដុល្លារដែរ ក្នុងនោះ៧០%ចំណាយទៅលើការប្រើអីុនធើរណេតច្រើនជាងការហៅទូរស័ព្ទរកគ្នា ដែលខុសពីឆ្នាំមុនៗ ពេលមិនទាន់មានស្មាតហ្វូន ខ្ញុំបញ្ចូលលុយសម្រាប់តែទំនាក់ទំនងគ្នាប៉ុណ្ណោះ » ។
ដូចគ្នានេះ លោក ហ៊ី បូរិន ដែលធ្វើការនៅក្រុមហ៊ុនឯកជនមួយ និងបានប្រើស្មាតហ្វូនរយៈពេល៥ឆ្នាំមកហើយនោះ និយាយថា ក្នុង១ខែ លោកបានបញ្ចូលប្រាក់ប្រមាណ១០ដុល្លារទៅលើទូរស័ព្ទ សម្រាប់ហៅចេញ និងអីុនធើរណេត ក្នុងនោះប្រហែល៣៥%ទៅលើការនិយាយ ក្រៅពីនេះលើអុីនណេត ព្រោះវាផ្តល់ប្រយោជន៍ច្រើនសម្រាប់ការងារ ជាពិសេស ឆែកអីុម៉ែល និងទំនាក់ទំនងតាមបណ្ដាញសង្គម តាមរយៈកម្មវិធី Line, WhatsApp និងកម្មវិធីផ្សេងទៀងដែលមានភាពងាយស្រួល និងលឿនរហ័ស ។
ការប្រើស្មាតហ្វូនដែលភ្ជាប់អីុនធើរណេត គឺអាចស្តាប់ចម្រៀង មើលភាពយន្ដតាម Yotube និងទាក់ទងគ្នាតាម Telegram, Line, Viber, WhatsApp និង WeChat ជាដើម ។
យោងតាមមន្ត្រីក្រសួងប្រៃសណីយ និងទូរគមនាគមន៍ តម្រូវការប្រើប្រាស់អីុនធើរណេតជាទិន្នន័យរួមគ្នា ដូចជា Facebook, WhatsApp និង WeChat ឃើញថា កើនឡើង ជាពិសេស សេវាទិន្នន័យបានកើនឡើងជាគំហុក។
ជាក់ស្តែង ទំហំទិន្នន័យចេញ-ចូលក្នុងប្រទេសទៅក្រៅប្រទេស នៅក្នុងឆ្នាំ២០១៧នេះ ត្រូវបានប៉ាន់ប្រមាណថា មានទំហំ២៥០ជីហ្គាប៊ីតក្នុង១វិនាទី ហើយកំណើនកើនឡើងជាមធ្យមប្រមាណ៧២%ពីមួយឆ្នាំទៅមួយឆ្នាំ ។
លោក ខូវ មករា អនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ ធ្លាប់មានប្រសាសន៍ថា កំណើននៃការប្រើប្រាស់ទិន្នន័យនៅស្រុកខ្មែរមានចំនួនច្រើន ជាពិសេស អ្នកប្រើប្រាស់ទូរស័ព្ទមានដល់១៣០%នៃចំនួនប្រជាពលរដ្ឋសរុប មានន័យថា ពលរដ្ឋម្នាក់មានទូរស័ព្ទប្រើពី១ទៅ៣គ្រឿង ហើយអ្នកប្រាស់ទូរស័ព្ទ១០០នាក់ មាន៤៥នាក់ប្រើប្រាស់អីុនធើរណេត ។
យោងតាមរដ្ឋមន្ត្រីក្រសួងប្រៃសណីយ៍ និងទូរគមនាគមន៍ អ្នកប្រើប្រាស់អីុនធើរណេតសព្វថ្ងៃ មានជិត៨លាននាក់ ហើយអ្នកប្រើទូរស័ព្ទមានស៊ីមកាត មានរហូតដល់១៩,៦លានស៊ីមកាត ដែលលើសពីចំនួនប្រជាពលរដ្ឋសរុបនៅទូទាំងប្រទេស ។
បើតាមលោករដ្ឋមន្ត្រី ត្រាំ អីុវតឹក កម្ពុជាព្យាករណ៍ថា នៅឆ្នាំ២០២០ អ្នកប្រើទូរស័ព្ទនៅទីប្រជុំជន នឹងអាចប្រើប្រាស់អីុនធើរណេតបាន១០០% ហើយនៅជនបទ ប្រមាណ៨០% ស្របតាមគោលនយោបាយថា ក្នុង១ឆ្នាំៗនឹងមានអ្នកប្រើប្រាស់អីុនធើរណេតកើនឡើង១លាននាក់ ខណៈដែលបច្ចុប្បន្ន មានក្រុមហ៊ុនផ្គត់ផ្គង់អីុនធើរណេតខ្នាតតូចប្រមាណ៣០ និងខ្នាតធំចំនួន៣ ។
តាមរបាយការណ៍ស្រាវជ្រាវទលើអ្នកប្រើទូរស័ព្ទ និងអីុនធើរណេតនៅកម្ពុជាក្នុងឆ្នាំ២០១៦ របស់វិទ្យាស្ថាន Open Instutue ដែលបានសម្ភាសន៍ជាមួយពលរដ្ឋខ្មែរមានអាយុចន្លោះពី១៥ដល់៦៥ឆ្នាំ បង្ហាញថា ពលរដ្ឋកម្ពុជាជាង៩៦% ចង់មានទូរស័ព្ទផ្ទាល់ខ្លួន ។
ក្នុងនោះ ពលរដ្ឋកម្ពុជា៤៨%មានស្មាតហ្វូនប្រើយ៉ាងហោច១គ្រឿង កើនឡើង២១% ធៀបនឹងឆ្នាំ២០១៥ ។ ក្នុងចំណោមពលរដ្ឋទាំង៤៨%នេះ ពួកគេប្រើដើម្បីលេងហ្វេសប៊ុក កើនឡើង៣៩%បើធៀបនឹងឆ្នាំ២០១៥ និង១០៦%ធៀបនឹងឆ្នាំ២០១៤ ហើយកើនឡើង២០០% ធៀបនឹងឆ្នាំ២០១៣ ក្នុងនោះបុរសប្រើហ្វេសប៊ុកច្រើនជាងនារី ។
របាយការណ៍ដដែលបញ្ជាក់ថា ប្រជាជនខ្មែរជាង៣៧%ដែលមានអាយុចាប់ពី១៥ដល់៦៥ឆ្នាំ ចង់ប្រើប្រាស់អីុនធើរណេត ឬធ្លាប់ប្រើ បើធៀបនឹងឆ្នាំ២០១៥កើនឡើង១៥% និងកើនឡើង៧២%ធៀបនឹងឆ្នាំ២០១៤ បើធៀបនឹងឆ្នាំ២០១៣ កើនឡើង៨២% ក្នុងនោះបុរសមានចំនួន៤៨% និងនារីមានចំនួនត្រឹមតែ២៦% ប៉ុណ្ណោះ ខណៈអ្នកនៅទីក្រុងមានចំនួន៤៨% និងនៅជនបទមាន៣១% ។ អ្នកប្រើប្រាស់អីុនធើរណេតទាំងនោះ ភាគច្រើនតាមរយៈទូរស័ព្ទដៃដែលស្រាវជ្រាវលើការសិក្សា ។ ក្នុងនោះ៩០%នៃពួកគេជានិស្សិតនៅមហាវិទ្យាល័យ និងបញ្ចប់ថ្នាក់ឧត្តមសិក្សា ៕
ចែករំលែកព័តមាននេះ