រាជធានីភ្នំពេញ ៖ ជនសង្ស័យម្នាក់ក្នុងចំណោមបក្សពួក២នាក់ត្រូវបានសមត្ថកិច្ចឃាត់ខ្លួនយកទៅសាកសួរនៅប៉ុស្តិ៍នគរបាលបឹងទំពុនបន្ទាប់ពីជនសង្ស័យរូបនោះបានធ្វើសកម្មភាពឆក់កាបូបស្ពាយពីស្ដ្រីជាគ្រូបង្រៀន
រាជធានីភ្នំពេញ ៖ ជនសង្ស័យម្នាក់ក្នុងចំណោមបក្សពួក២នាក់ត្រូវបានសមត្ថកិច្ចឃាត់ខ្លួនយកទៅសាកសួរនៅប៉ុស្តិ៍នគរបាលបឹងទំពុនបន្ទាប់ពីជនសង្ស័យរូបនោះបានធ្វើសកម្មភាពឆក់កាបូបស្ពាយពីស្ដ្រីជាគ្រូបង្រៀនរបស់គេបានសម្រេច ហេតុការណ៍នេះកើតឡើងនៅវេលាម៉ោង៨និង១០នាទីយប់ ថ្ងៃទី២៨ ខែមិថុនា ឆ្នាំ២០១៧ ទល់មុខនឹងច្រកចូលវត្តសន្សំកុសល ផ្លូវ២៧១ សង្កាត់បឹងទំពុន ខណ្ឌមានជ័យ ។
ជនសង្ស័យមានឈ្មោះ ដា រ៉ាវុធ ភេទប្រុស អាយុ១៥ មុខរបរសិស្សនៅសាលាជាស៊ីមផ្សារដើមថ្កូវ ស្នាក់នៅសង្កាត់បឹងទំពុន ខណ្ឌមានជ័យ ជិះម៉ូតូម៉ាកនិច ពណ៌ខ្មៅលាយក្រហម ពាក់ស្លាកលេខ ភ្នំពេញ 1FW-0772 ។ ចំណែកជនរងគ្រោះសុំមិនបញ្ចេញឈ្មោះតែគ្រាន់ឱ្យដឹងថា ជាអ្នកគ្រូបង្រៀននៅសាលាប៊ែលធីអន្តរជាតិ ហើយរបស់ដែលបាត់បង់នៅក្នុងកាបូបមានលុយមួយចំនួន និងឯកសាររបស់សាលាមួយចំនួនតែប៉ុណ្ណោះ ។
តាមសម្ដីស្ត្រីជនរងគ្រោះបានឱ្យដឹងថា មុនពេលកើតហេតុរូបគាត់បានជិះម៉ូតូឌុបចេញពីបង្រៀនសិស្សគោលបំណងត្រលប់ទៅផ្ទះវិញនៅសង្កាត់បឹងទំពុន ខណ្ឌមានជ័យ បានធ្វើដំណើរតាមផ្លូវ២៧១ ក្នុងទិសដៅពីជើងទៅត្បូង ខណៈមកដល់ចំណុចកើតហេតុមុខខ្លោងទ្វារវត្តសន្សំកុសលស្រាប់តែមានជនសង្ស័យ២នាក់បានធ្វើសកម្មភាពឆក់យកកាបូបស្ពាយពីរូបគាត់បានសំរេច ហើយភ្លាមៗនោះជនសង្ស័យបានបន្ថែមល្បឿនរត់ក៏ជ្រុលទៅបុកនឹងម៉ូតូមួយគ្រឿងទៀតបណ្ដាលឲ្យដួលម៉ូតូទើបបានប្រជាពលរដ្ឋដែលឃើញហេតុការណ៍ឃាត់ខ្លួនបានម្នាក់ជាអ្នកឌុប ចំណែកអ្នកអង្គុយខាងក្រោយដែលជាអ្នកឆក់កាបូបបានរត់គេចខ្លួនបាត់ព្រមទាំងយកកាបូបរបស់ជនរងគ្រោះយកទៅបាត់ ។
នៅចំពោះមុខសមត្ថកិច្ចជនសង្ស័យបានសារភាពថា ពួកគេពិតជាបានធ្វើសកម្មភាពឆក់កាបូបពីជនរងគ្រោះពិតប្រាកដមែនហើយគេក៏មិនបានដឹងថា ជនរងគ្រោះជាអ្នកគ្រូបង្រៀនរបស់គេទេ ទាល់តែមិត្តភក្តិរបស់គេឆក់ហើយទើបគេដឹងថា ជាគ្រូបង្រៀនដែលធ្លាប់បង្រៀនគេនៅសាលាប៊ែលធី ។ ក្រោយពេលកើតហេតុបន្ទាប់ពីសាកសួររួចជនរងគ្រោះបានមកដាក់ពាក្យបណ្តឹងនៅប៉ុស្តិ៍នគរបាលបឹងទំពុន ចំណែកជនសង្ស័យត្រូវសមត្ថកិច្ចកសាងសំណុំរឿងបញ្ជូនខ្លួនទៅកាន់ស្នងការដ្ឋានខណ្ឌមានជ័យ ៕
ចែករំលែកព័តមាននេះ