ស្នងការនគរបាលខេត្ត ព្រមានដល់អ្នកបើកលេងល្បែងស៊ីសង
ខេត្តសៀមរាប ៖ ស្នងការនគរបាលខេត្តសៀមរាប ដែលទើបឡើងកាន់តំណែងថ្មី លោក ឧត្តមសេនីយត្រី ហ៊ូ វ៉ាន់នី បានព្រមានដល់អ្នកបើកល្បែងស៊ីសងទាំងអស់នៅទូទាំងខេត្តនេះ
ខេត្តសៀមរាប ៖ ស្នងការនគរបាលខេត្តសៀមរាប ដែលទើបឡើងកាន់តំណែងថ្មី លោក ឧត្តមសេនីយត្រី ហ៊ូ វ៉ាន់នី បានព្រមានដល់អ្នកបើកល្បែងស៊ីសងទាំងអស់នៅទូទាំងខេត្តនេះ
ខេត្តសៀមរាប ៖ ស្នងការនគរបាលខេត្តសៀមរាប ដែលទើបឡើងកាន់តំណែងថ្មី លោក ឧត្តមសេនីយត្រី ហ៊ូ វ៉ាន់នី បានព្រមានដល់អ្នកបើកល្បែងស៊ីសងទាំងអស់នៅទូទាំងខេត្តនេះឲ្យបញ្ឈប់សកម្មភាពល្មើសរបស់ខ្លួនជាបន្ទាន់ បើពុំដូច្នេះនឹងត្រូវប្រឈមនឹងផ្លូវច្បាប់ជាកំហិត។ ការថ្លែងព្រមាននេះធ្វើឡើងនៅក្នុងបទសម្ភាសន៍តាមទូរស័ព្ទកាលពីរសៀលថ្ងៃទី២៧ មិថុនា ២០១៧ បន្ទាប់ពីកម្លាំងការិយាល័យព្រហ្មទណ្ឌកម្រិតស្រាល បានបើកប្រតិបត្តិការក្តៅបង្គ្រាបទៅលើក្រុមអ្នកកត់ឆ្នោត (កន្ទុយលេខ) ដោយចាប់ខ្លួនជនពាក់ពន្ធ័ចំនួន៥នាក់បញ្ជូនទៅតុលាការ កាលពីថ្ងៃទី ២៦ កន្លងទៅថ្មីៗ។ ក្រុមមន្ត្រីសង្គមស៊ីវិលដែលធ្វើកិច្ចការសង្គម បានសម្តែងនូវការសាទរចំពោះចំណាត់ការខាងលើ ប៉ុន្តែពួកគេទទូចឲ្យមានការអនុវត្តឲ្យដូចភ្លៀងរលឹម ចៀសវាងអនុវត្តយុទ្ធសាស្ត្រ គោះទឹកបង្អើលត្រី ឬវាយស្មៅបង្អើលពស់ជាដើម នៅគ្រាដែលខេត្តទេសចរណ៍មួយនេះត្រូវបានគេរាយការណ៍ថា មានល្បែងស៊ីសង ដូចជាអាប៉ោងបៀ ជល់មាន់ ចាក់បាល់ រួមទាំងល្បែងផ្សាយផ្ទាល់ពីកាស៊ីណូ កំពុងរីកដុះដាលដូចផ្សិតដើមរដូវវស្សា។
លោកឧត្តមសេនីយមានប្រសាសន៍យ៉ាងដូច្នេះថា«យើងមិនអាចបន្តឲ្យបទល្មើស រួមមានល្បែងស៊ីសងគ្រប់រូបភាព រួមទាំងបទល្មើសផ្សេងៗទៀត បន្តគម្រាមគំហែងសន្តិសុខ សណ្តាប់ធ្នាប់ សង្គមយើងទៀតទេ ដូច្នេះសូមព្រមានដល់ជនដែលប្រព្រឹត្ត និងអ្នកពាក់ពន្ធ័ទាំងអស់ដកខ្លួនចេញឲ្យឆ្ងាយ បើចង់ចូលគុក »។ លោកស្នងការបានបញ្ចាក់ថា៖ ចាប់តាំងពីក្រោយពេលបោះឆ្នោតឃុំ-សង្កាត់ មកនេះ កម្លាំងរបស់លោកបានបង្ក្រាបបទល្មើសបានជិត២០ករណីហើយ ក្នុងនោះរាប់ចាប់ពីល្បែងជល់មាន់ គ្រឿងញៀន សេវាបម្រើផ្លូវភេទ រួមទាំងឆ្នោតកន្ទុយលេខផងដែរ។ ជនប្រព្រឹត្ត និងជនពាក់ព័ន្ធក៏ត្រូវបានបញ្ជូនខ្លួនទៅតុលាការ ដើម្បីចាត់ការទៅតាមនីតិវិធីរួចហើយដែរ។ គួរំលឹកថា កាលថ្ងៃទី២៦ មិថុនា ២០១៧ កន្លងទៅនេះ កម្លាំងការិយាល័យព្រហ្មទណ្ឌកម្រិតស្រាល នៃស្នងការនគរបាលខេត្តសៀមរាប បានបើកប្រតិបត្តិការ ជាបីមុខព្រួញផ្សេងគ្នា ក្នុងពេលតែមួយ បង្ក្រាបមុខសញ្ញាកត់ឆ្នោត (កន្ទុយលេខ ) នៅតាមទីប្រជុំជនក្នុងក្រុងសៀមរាប រួមមាន ទីប្រជុំជនស្ទឹងថ្មី ក្នុងសង្កាត់ស្វាយដង្គំ ផ្សារលើធំថ្មី និងផ្សារត្រាំនាគ ក្នុងសង្កាត់ស្លក្រាម ក្រុងសៀមរាប ផងដែរ។
នៅក្នុងប្រតិបត្តិការដ៏ក្តៅគគុកនោះ កម្លាំងសមត្ថកិច្ចបានចាប់ខ្លួន ជនពាក់ព័ន្ធស្រីប្រុសចំនួន៥នាក់ ដោយក្នុងចំណោមនោះ មានម្នាក់ត្រូវបានរាយការណ៍ថា ជាប់សែស្រឡាយមន្ត្រីជាន់ខ្ពស់ខេត្តនេះផងដែរ នេះបើតាមការបង្ហើបប្រាប់ពីមន្ត្រីនគរបាលមួយរូបដែលសុំលាក់ឈ្មោះ។ មន្ត្រីដដែលនោះធ្លាប់បានបង្ហើបថា កន្លងមកកាលពីសម័យលោកស្នងការចាស់ (ស៊ត ណាឌី) គេក៏ធ្លាប់បានបង្ក្រាប និងចាប់ខ្លួនមេឆ្នោតជាច្រើនករណីដែរ ប៉ុន្តែប៉ះចំបងប្អូនសែស្រឡាយមន្ត្រីជាន់ខ្ពស់ក្នុងខេត្ត ក៏បង្ខំចិត្តដោះលែងទៅវិញជាហូរហែ។ ថ្វីបើយ៉ាងនេះក្តី លោកស្នងការបានបញ្ជាក់ថា ជនស្រីប្រុសទាំង៥នាក់ដែលត្រូវបានចាប់ខ្លួននៅក្នុង ប្រតិបត្តិការ បង្ក្រាបសកម្មភាពកត់ឆ្នោត(កន្ទុយលេខ)ខាងលើ ត្រូវបានកម្លាំងរបស់លោកបញ្ជូនខ្លួនទៅតុលាការតាំងពីរសៀលម្សិលមិញមកម្លេះ ដើម្បីចាត់ការទៅតាមនីតិវិធី ហើយក៏មិនមែនអ្នកណាមកសុំអន្តរាគមន៍ដោះលែងជនសង្ស័យទាំងនោះដែរ។ ជាមួយគ្នាដែរព្រះរាជអាជ្ញាអមសាលាដំបូងខេត្តសៀមរាប លោក កើត សុវណ្ណារ៉េត បានមានប្រសាសន៍នៅរសៀលថ្ងៃទី២៧ មិថុនា ថាជនទាំង០៥នាក់ដែលកម្លាំងសមត្ថកិច្ចចាប់ខ្លួនខាងលើ ត្រូវបានតំណាងអយ្យការ បើកការចោទប្រកាន់រួចរាល់ហើយដែរ។
ទោះបីជាយ៉ាងណា លោកមិនបានប្រាប់ពីបទចោទ ឬមាត្រា ដែលបានចោទប្រកាន់ប្រឆាំងទៅលើជនទាំង០៥នាក់ខាងលើនោះទេ គ្រាន់តែអះអាងថា សំណុំរឿងនេះបានរំកិលដល់ដៃចៅក្រមស៊ើបសួររួចហើយ ។
ដោយឡែកអ្នកនាំពាក្យសាលាដំបូងខេត្តសៀមរាប លោក យិន ស្រាង បានមានប្រសាសន៍ដែរថា៖ ជនជាប់ចោទស្រីប្រុសទាំង០៥នាក់នោះ ត្រូវបានចៅក្រមស៊ើបសួរចេញដីកា ឃុំខ្លួនក្នុងពន្ធធនាគារបណ្តោះអាសន្នរួចហើយ នៅព្រឹកថ្ងៃនេះ ដើម្បីរង់ចាំសវនាការផ្តន្ទាទោសនៅពេលខាងមុខ។ ថ្វីបើបែបនេះក្តីមន្ត្រីពន្ធធនាគារមួយរូបបានបង្ហើបថា៖ គិតមកទល់រសៀលថ្ងៃទី២៧ មិថុនា ពុំមានជនជាប់ចោទពាក់ពន្ធ័នឹងល្បែងស៊ីសងណាម្នាក់ត្រូវបានកត់ត្រានៅក្នុងសៀវភៅចេញចូលពន្ធធនាគារខេត្តនោះទេ ដែលការអះអាងនេះនាំឲ្យមានមន្ទិលក្នុងសំណុំរឿងព្រហ្មទណ្ឌមួយនេះ។ លោក សួស ណារិន មន្ត្រីស៊ើបអង្កេតសមាគមសិទ្ធិមនុស្សអាដហុក ប្រចាំខេត្តសៀមរាប បានថ្លែងស្វាគមន៍ចំពោះចំណាត់ការ និងការព្រមានរបស់លោកស្នងការនគរបាលខេត្ត លោក ហ៊ូ វ៉ាន់នី ប៉ុន្តែលោកទទូចឲ្យសមត្ថកិច្ចមានចំណាត់ការនោះធ្វើជាប្រចាំ ដើម្បីរក្សាសន្តិសុខ សណ្តាប់ធ្នាប់សង្គម ជាពិសេសខេត្តទេសចរណ៍មួយនេះតែម្តង។ លោកថ្លែងយ៉ាងដូច្នេះថា«ខេត្តសៀមរាបគឺជាខេត្តទេសចរណ៍ដ៏សំខាន់របស់កម្ពុជា ដូច្នេះសមត្ថកិច្ចមិនអាចបណ្តែតបណ្តោយឲ្យមានបទល្មើសល្បែងស៊ីសង និងសេវាផ្លូវភេទ គ្រឿងញៀន យ៉ាងផុសផុល បែបហ្នឹងទេ »។
ក្រុមអ្នកតាមដានសង្គមបានបង្ហើបថា៖ ក្រៅពីល្បែងឆ្នោត (កន្ទុយលេខ ) និងល្បែងបៀអាប៉ោង ជល់មាន់ ក្រុងសៀមរាបនៅមានល្បែងទំនើបមួយប្រភេទទៀតគឺល្បែងកាស៊ីណូ តាមអនឡាញជាច្រើនកន្លែងទៀតជ្រកនៅក្រោមស្លាកអ៊ីនធឺណែត ដែលរង់ចាំឲ្យសមត្ថកិច្ចបង្ក្រាប។ ល្បែងប្រភេទថ្មី និងទំនើបនេះ កំពុងតែពង្វក់ពលរដ្ឋខ្មែរមិនចាញ់ល្បែងឆ្នោតយួនដែលគេនិយមហៅថាកន្ទុយលេខនោះទេ។
យោងតាមសេចក្តីរាយការណ៍បានឲ្យដឹងថា៖ យ៉ាងហោចណាស់មានទីតាំងបម្រើសេវាអ៊ីនធឺណែត ប្រមាណចាប់ពី ២០ទៅ៣០ទីតាំង នៅកណ្តាលបេះដូងក្រុងទេសចរណ៍សៀមរាប ត្រូវបានប្រើប្រាស់ជាភ្នាក់ងារ ឬសាខាល្បែងស៊ីសង ដែលមានការភ្ជាប់បណ្តាញផ្សាយផ្ទាល់ពីកាស៊ីណូនានានៅតាមព្រំដែនខ្មែរ ទាំងថៃ និងវៀតណាម។ សេចក្តីរាយការណ៍ដដែលបានបន្តដោយដាក់មន្ទិលថា៖ ល្បែងតាមប្រព័ន្ធអ៊ីនធឺណែតទាំងហ្នឹងអាចដំណើរការទៅបានយ៉ាងរអិលបែបហ្នឹង ក៏ដោយសារតែមានការប្រព្រឹត្តអំពើពុករលួយជាប្រព័ន្ធ រវាងសមត្ថកិច្ចអាជ្ញាធរពាក់ពន្ធ័ និងម្ចាស់ទីតាំងជាថ្នូរមិនបង្គ្រាប។
ហេតុដែលហ៊ានមន្ទិលបែបហ្នឹងដោយសារតែគេឃើញល្បែងប្រភេទហ្នឹងដំណើរការយូខែឆ្នាំមកហើយតែគ្មានការបង្ក្រាបជាដុំកំភួនម្តងណាឡើយ។សកម្មភាពបើកឲ្យមានការលេងល្បែងស៊ីសងតាមគ្រប់រូបភាព ជាពិសេសតាមប្រពន្ធ័អនឡាញ ដែលកំពុងរីកស្គុសស្គាយដូចរដូវផ្ការីក នៅកណ្តាលបេះដូងក្រុងទេសចរណ៍សៀមរាបហ្នឹង ត្រូវបានក្រុមអ្នកតាមដានបញ្ហាសង្គមអះអាងថា កំពុងតែដើរបញ្ច្រាសទិស នៃលក្ខណៈភូមិឃុំមានសុវត្ថិភាព ច្បាប់ស្តីពីការបង្គ្រាបល្បែងស៊ីសង រួមទាំងបម្រាមរបស់សម្តេចនាយករដ្ឋមន្ត្រី ហ៊ុន សែន ដែលហាមមិនឲ្យជនជាតិខ្មែរចូលទៅលេងល្បែងក្នុងកាស៊ីណូផងដែរ។ ទាក់ទិននឹងល្បែងអនឡាញជ្រកក្រោមស្លាក បម្រើសេវាអ៊ីធឺណែត ដែលកំពុងរីករាលដាលដូចជំងឺមហារីកទៅនោះ ត្រូវលោកស្នងការនគរបាល ហ៊ូ វ៉ាន់នី សន្យាថានឹងធ្វើសេចក្តីប្រកាសរួមមួយក្នុងនាមអាជ្ញាធរខេត្តក្នុងពេលឆាប់ៗខាងមុខ ដើម្បីឲ្យពួកអ្នកប្រព្រឹតល្មើសទាំងនោះបញ្ឈប់សកម្មភាពរបស់ខ្លួនជាបន្ទាន់ តែបើពួកគេមិនមិនបញ្ឈប់ លោកនឹងបើកការបោសសម្អាតឲ្យអស់មិនអាចទុកបានទេ។ ដូច្នេះគេចាំមើលថានេះជាការប្តាជ្ញាចេញពីបេះដូងពិត របស់លោកស្នងការ ឬក៏ជាល្បិចវាយស្មៅបង្អើលពស់៕
ចែករំលែកព័តមាននេះ