ខេត្តកណ្ដាល ៖ ជនសង្ស័យ២នាក់ត្រូវនគរបាលស្រុកអង្គស្នួលសហការជាមួយកម្លាំងនគរបាលប៉ុស្តិ៍ពើក ធ្វើការឃាត់ខ្លួន ខណៈពេលក្រុមនោះកំពុងធ្វើសកម្មភាពជួញដូរគ្រឿងញៀន ហេតុការណ៍នេះបានធ្វើឡើងកាលពីវេលាម៉ោង១១ព្រឹក ថ្ងៃទី២៨ ខែមិថុនា ឆ្នាំ២០១៧ នៅចំណុចមុខរោងចក្រកាត់ដេរកាបូប ស្ថិតនៅក្នុងភូមិទឹកជា ឃុំពើក ស្រុកអង្គស្នួល ។
ជនសង្ស័យទាំង២នាក់នោះ ម្នាក់ឈ្មោះ ផុន ប៊ុនណាត អាយុ២៣ឆ្នាំ ជនជាតិខ្មែរ មុខរបរកម្មកររោងចក្រ មានទីលំនៅក្នុងភូមិកណ្តោស ឃុំលំហាច ស្រុកអង្គស្នួល ជាអ្នកជួញដូរ និងចែកចាយយ៉ាងសកម្មបំផុត និងម្នាក់ទៀតឈ្មោះ ម៉ឹង មាន អាយុ២៥ឆ្នាំ មុខរបរកម្មកររោងចក្រ ស្នាក់នៅក្នុងភូមិទឹកជា ឃុំពើក ស្រុកអង្គស្នួល ជាអ្នកប្រើប្រាស់ផង និងផ្ដល់បន្ទប់សម្រាប់ជួញដូរ ចែកចាយផង។ ចំណែកវត្ថុតាងដែលដកហូតរួមមាន ៖ ម្សៅក្រាម.សថ្លាជាប្រភេទម៉ាទឹកកក៥កញ្ចប់តូច, ទូរស័ព្ទដៃណូគៀចុចពិល១គ្រឿង, លុយ១០.០០០រៀល និងវត្ថុសំរាប់វេចខ្ចប់ និងប្រើប្រាស់មួយចំនួនទៀត។
តាមប្រភព័ត៌មានបានឲ្យដឹងថា នៅមុនពេលឈានដល់ចាប់ខ្លួនជនខាងលើ កម្លាំងនគរបាលទទួលព័ត៌មានថា មានមុខសញ្ញាជួញដូរគ្រឿងញៀនកំពុងធ្វើសកម្មភាពនៅត្រង់ចំណុចខាងលើ។ ពេលនោះកម្លាំងក៏ចុះទៅធ្វើការចាប់ខ្លួនតែម្ដង បន្ទាប់មកនាំសាកសួរ ហើយជនសង្ស័យឈ្មោះ ផុន ប៊ុនណាតនោះបានប្រាប់ថា ចំពោះថ្នាំញៀននោះខ្លួនបានទិញពីឈ្មោះមោក វាសនា មានទីលំនៅក្នុងភូមិស្ងួនពេជ្រ ដោយទិញក្នុងតម្លៃ២០ម៉ឺនរៀល ដើម្បីយកទៅលក់បន្ត ហើយតែ២ថ្ងៃប៉ុណ្ណឹង គឺលក់អស់ហើយ បន្ទាប់មកក៏ទៅទិញទៀត ហើយអត់ដែលយូរឡើយ គឺពិតជាកាក់កបខ្លាំងណាស់។
នេះគឺជាចម្លើយគួរឲ្យភ្ញាក់ផ្អើលមួយសម្រាប់មុខរបរដែលខុសច្បាប់នេះ តែក្រោយពេលសាកសួរ និងកសាងសំណុំរឿងរួច ជននោះត្រូវកម្លាំងនគរបាលខាងលើបញ្ជូនទៅកាន់សាលាដំបូងខេត្តកណ្ដាល ដើម្បីចាត់ការបន្តតាមនីតិវិធីច្បាប់៕
ចែករំលែកព័តមាននេះ