រាជធានីភ្នំពេញ ៖ អ្នកនាំពាក្យក្រសួងការបរទេស លោក ជុំ សុន្ទរី បានឲ្យដឹងថា ក្រោយពីស្ថានឯកអគ្គរាជទូតកម្ពុជាប្រចាំនៅប្រទេសថៃ បានទាក់ទងជាមួយអាជ្ញាធរថៃរួចហើយនោះ បានទទួលព័ត៌មានថា ក្នុងចំណោមពលករខ្មែរចំនួន ២២៥ នាក់ ដែលត្រូវបានសមត្ថកិច្ចថៃឃាត់ខ្លួន កាលពីថ្ងៃទី ២២ ខែមិថុនា ឆ្នាំ២០១៧ នៅកន្លែងស្នាក់នៅរបស់ពលករសំណង់ ក្នុងស្រុកបានឡាមុងខេត្តឈុនបុរី ប្រទេសថៃ ពលករចំនួន ៤០ នាក់ មានបណ្ណពណ៌ស៊ីជម្ពូរ តែធ្វើការខុសកន្លែង។ ចំណែកពលករ២នាក់ផ្សេងទៀតមានបណ្ណអនុញ្ញាតការងារក្លែងក្លាយ និងពលករ១៨៣នាក់ ពុំមានឯកសារអ្វីទាំងអស់។
លោកជុំ សុន្ទរីបានឲ្យដឹងទៀតថា ៖ «ពលករខ្មែរដែលពុំមានឯកសារ ត្រូវបានអាជ្ញាធរថៃបញ្ជួនទៅការិយាល័យអន្តោប្រវេសន៍ ដើម្បីរៀបចំបញ្ជួនត្រឡប់មកកម្ពុជាវិញ រីឯពលករដែលមានបណ្ណពណ៌ស៊ីជម្ពូរ តែធ្វើការខុសកន្លែង និងមានបណ្ណអនុញ្ញាតការងារក្លែងក្លាយនឹងត្រូវបញ្ជួនឡើងតុលាការ»។
ចែករំលែកព័តមាននេះ