ខេត្តព្រះសីហនុ ៖ ស្រុកព្រៃនប់ បញ្ហារំលោភដីព្រែក សមុទ្រ ដែលជាសម្បត្តិរបស់រដ្ឋ ពីសំណាក់បុគ្គលមួយចំនួននៅតែមាន បើសិនជាអាជ្ញាធរមិនមានវិធានការតិងរឹងនិងយកចិត្តទុកដាក់តាមដានទេនោះ ការលួចឆ្មក់វាទទី យកមកនៅតែបន្តកើតមាន ។
ជាក់ស្តែងនៅព្រឹកថ្ងៃទី២៧ ខែមិថុនា ឆ្នាំ២០១៧ នេះ ក្រុមការងារថ្នាក់ស្រុកព្រៃនប់ បានចុះត្រួតពិនិត្យ និងទប់ស្កាត់ការបោះបង្គោលហ៊ុំព័ទ្ធចូលក្នុងសមុទ្រ នៅចំណុចមាត់ពាម ស្ថិតនៅភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ ដែលត្រូវបានបុគ្គលមួយចំនួនរំលោភបំពានដោយខុសច្បាប់ ។ លោក ព្រំ ប៊ុន្នី នាយករដ្ឋបាលសាលាស្រុក ដែលបានដឹកនាំក្រុមការងារចុះពិនិត្យនោះ បានឲ្យដឹងថា ៖ បន្ទាប់ពីក្រុមការងារចុះទៅដល់ ជាក់ស្តែងឃើញមានកម្មករចំនួន៣នាក់ កំពុងសម្រួចបង្គោលស្មាច់ បម្រុងយកទៅបោះក្នុងសមុទ្រ ដោយប្រើបង្គោលស្មាច់ ប្រវែងជា២ម៉ែត្រ ប្រមាណ២០០ដើម និងបង្គោលស្មាច់កាត់ជាពីរកំណាត់មានចំនួនប្រមាណជា៥០ដើម ។ មិនត្រឹមតែប៉ុណ្ណោះ នៅក្នុងសមុទ្រក៏មានបង្គោលស្មាច់ដែលត្រូវបានគេបោះរួចជាស្រេច មានចម្ងាយប្រមាណ៥០ម៉ែត្រ និងមានបោះបង្គោលតម្រុយតូចៗហ៊ុំព័ទ្ធចូលក្នុងសមុទ្រ ទំហំប្រមាណ៣ហិកតាទៀត ។ លោក ព្រំ ប៊ុន្នី បានបន្តថា បន្ទាប់ពីពិនិត្យឃើញជាក់ស្តែង ក្រុមការងារបានឯកភាពដកហូត ប្រមូលបង្គោលស្មាច់ទាំងនោះ យកមករក្សាទុកនៅសាលាឃុំបិតត្រាំង ចំណែកមនុស្សចំនួន៣នាក់ ដែលជាកម្មករត្រូវបានណែនាំឲ្យរុះរើបង្គោលដែលបានបោះចូលក្នុងសមុទ្ររួចចេញ និងលុបចេញ អ្វីដែលបានជីកឲ្យដូចដើមវិញ ព្រមទាំងបានធ្វើកិច្ចសន្យាបញ្ឈប់សកម្មភាពទាំងនេះ ចាប់ពីពេលនេះតទៅ ។
ពាក់ព័ន្ធនឹងបញ្ហានេះ តាមប្រភពក្រៅផ្លូវការថា ការចូលទន្ទ្រានបោះបង្គោលចូលក្នុងសមុទ្រនេះ ច្បាស់ជាមិនមែនប្រជាពលរដ្ឋតូចតាចឡើយ ច្បាស់ជាមានបុគ្គលធំ ដែលឈរចង្អុលពីក្រោយ ។ តែទោះបីយ៉ាងណា ការទន្ទ្រានខាងលើ ត្រូវបានទប់ស្កាត់ទាន់ពេល ពីសំណាក់រដ្ឋបាលស្រុកព្រៃនប់សហការណ៍ជាមួយសមត្ថកិច្ចមូលដ្ឋាន ទោះបីស្ថិតក្នុងការអប់រំ តែជាការយកចិត្តទុកដាក់ខ្ពស់ ក្នុងការការពារសម្បត្តិរដ្ឋ ។
ចែករំលែកព័តមាននេះ