ខេត្តឧត្តរមានជ័យ ៖ ក្រុមទាហានប្រមាណ១០នាក់ ប្រដាប់ដោយអាវុធគ្រប់ដៃឈរការពារគ្រឿងចក្រដែលកំពង់ធ្វើការឈួសឆាយផលដំណាំពលរដ្ឋ ធ្វើឱ្យពលរដ្ឋក្តៅក្រហាយនាំគ្នាមកតវ៉ា និងរារាំង កាលពីព្រឹកថ្ងៃទី២៧ ខែមិថុនា ឆ្នាំ២០១៧ ។ ហេតុការណ៍នេះ បានកើតឡើងក្នុងភូមិអណ្តូង៣ ហៅភូមិអូរតាមេង ឃុំអន្លង់វែង ស្រុកអន្លង់វែង ខេត្តឧត្តរមានជ័យ ។
ស្ត្រីម្នាក់ឈ្មោះ អ៊ឹម ចន្ថា ដែលជាតំណាងឱ្យពលរដ្ឋ បានឱ្យដឹងថា ផ្ទៃដីចំនួន៥០០ហិកតា មានពលរដ្ឋចំនួន១២០គ្រួសាររស់នៅ និងបង្កបង្កើតផលជារៀងរាល់ឆ្នាំ ចាប់តាំងអំឡុងឆ្នាំ២០០០ និងមានពលរដ្ឋមួយចំនួនទៀត ចូលបង្កបង្កើតផលនៅឆ្នាំ១៩៩៨មកម្លេះ ។ ក្រោយមកនៅឆ្នាំ២០១២ រាជរដ្ឋាភិបាលបានចេញអាជ្ញាប័នទៅឱ្យក្រុមហ៊ុន ទំរីងរាំប៊ឺ និងដាយតារាំប៊ឺ ចូលមកវិនិយោគលើដីសម្បទានសេកិច្ច ជាពិសេសគឺអនុវត្តតាមគោលនយោបាយរូបមន្តស្បែកខ្លា មិនធ្វើឱ្យប៉ះពាលដែនដីព្រៃសហគមន៍ និងប្រជាពលរដ្ឋ ។ ស្ត្រីតំណាងឱ្យពលរដ្ឋដដែលបានបន្តថា ក្រុមហ៊ុនទាំង២ខាងលើ បានចុះមកវិយោគឈួសឆាយដីព្រៃស្រោង ដែលជាជុំរកសត្វ ហើយឈួសឆាយផ្ទះសម្បែង ផលដំណាំប្រជាពលរដ្ឋអស់គ្មានសល់ ។ ពលរដ្ឋបានដាក់ពាក្របណ្តឹងឱ្យលោកអាជ្ញាធរជួយដោះស្រាយហើយ មិនយកចិត្តទុក្ខដាក់ឡើយ ប្រជាពលរដ្ឋបាននាំគ្នាដល់ក្រសួងមហាផ្ទៃ និងការិយាល័យសម្តេច ហើយសម្តេចបានដោះស្រាយកាត់ដីចំនួន៥០០ហិកតានេះ ពីក្រុមហ៊ុនប្រគល់ឱ្យពលរដ្ឋចូលមកកាន់កាប់ប្រើប្រាស់ដូចដើមវិញ ។
ស្ត្រីតំណាងឱ្យពលរដ្ឋបានបញ្ចាក់ថា ក្រោយពីរាជរដ្ឋាភិបាលកាត់ដីនេះឱ្យពលរដ្ឋនោះ ក្រុមហ៊ុនបានបាត់ឈ្មោះជាយូរហើយ ស្រាប់តែងើបមកវិញ យកគ្រឿងចក្រ និងទាហានអង្គភាពសឹករងខេត្តឧត្តរមានជ័យ ប្រមាណ១០នាក់ប្រដាប់ដោយអាវុធគ្រប់ដៃការពារគ្រឿងចក្រឈួសផលដំណាំប្រជាពលរដ្ឋអស់ចំនួនប្រមាណជាង២ហិកតា ។
ចែករំលែកព័តមាននេះ