រាជធានីភ្នំពេញ ៖ រយៈពេលប្រមាណជាង២ឆ្នាំមកហើយដែលកីឡាករ-កីឡាការិនីត្រកូល ស៊នទាំង៣នាក់ គឺលោក ស៊ន អេលីត អ្នកនាងស៊ន ដាវីន និងកញ្ញាស៊ន សៀវម៉ី ត្រូវបានថ្នាក់ដឹកនាំផ្ដល់ការងារឱ្យធ្វើជា
រាជធានីភ្នំពេញ ៖ រយៈពេលប្រមាណជាង២ឆ្នាំមកហើយដែលកីឡាករ-កីឡាការិនីត្រកូល ស៊នទាំង៣នាក់ គឺលោក ស៊ន អេលីត អ្នកនាងស៊ន ដាវីន និងកញ្ញាស៊ន សៀវម៉ី ត្រូវបានថ្នាក់ដឹកនាំផ្ដល់ការងារឱ្យធ្វើជាមន្ត្រីរាជការនៅនាយកដ្ឋានអង្គរក្សនៃក្រសួងមហាផ្ទៃដោយអ្នកទាំង៣ក្រៅពីក្លាយជាមន្ត្រីរាជការពេញសិទ្ធិក៏មានសិទ្ធិអាទិភាពជាងមន្ត្រីអង្គរក្សផ្សេងៗទៀតដែរ។
លោក ស៊ន អេលីត បងប្រុសកញ្ញាស៊ន សៀវមុី និយាយថា បងប្អូនរបស់លោកទាំង៣នាក់ត្រូវបានជ្រើសរើសឱ្យចូលជាកងអង្គរក្សក្នុងនាយកដ្ឋានអង្គរក្សនៃក្រសួងមហាផ្ទៃកាលពីឆ្នាំ២០១៤ ។ មកទល់ពេលនេះបងប្អូនរបស់លោកសុទ្ធតែមានឋានន្ដរស័ក្ដិជាអនុសេនីយ៍ទោ(ស័ក្ដិ២)ដូចៗគ្នា ដោយមិនមានអ្នកណាមានឋានៈធំជាងអ្នកណានោះទេ និងមានតួនាទីចេញប្រតិបត្តិការការពារគណៈប្រតិភូដែលចុះមកទស្សនកិច្ចនៅកម្ពុជា ដោយប្អូនស្រីរបស់លោកគឺ ស៊ន សៀវម៉ី និង ស៊ន ដាវីន ភាគច្រើនត្រូវបានគេចាត់ឱ្យការពារប្រតិភូជាស្ត្រី ។ អ្នកទាំង២ក៏ត្រូវគេចាត់ឱ្យចេញបេសកកម្មការពារ ថ្នាក់ដឹកនាំស្ត្រីរបស់កម្ពុជាដែលចេញទៅទស្សនកិច្ចផ្លូវការនៅក្នុងប្រទេសណាមួយដែរ ។ លោកថា ក្នុងចំណោមបងប្អូនរបស់លោកទាំង៣ គឺសុទ្ធតែពេញក្របខ័ណ្ឌ និងមានប្រាក់ខែជាង១លានរៀលផ្អែកទៅតាមស័ក្ដិដែលបានទទួលដូចៗគ្នា ដោយមិនមានការតែងតាំងរំលងពីការងារ និងសមត្ថភាពនោះទេ ។ ទោះបីយ៉ាងណា លោកថា ចំពោះករណី ស៊ន សៀវម៉ី គឺមានលក្ខណៈពិសេសជាងគេដោយសារតែនាងមិនសូវបានចូលធ្វើការ តែមានការយោគយល់ពីនាយកដ្ឋានអង្គរក្ស នៅពេលនាងជាប់ប្រកួតម្ដងៗ ។ ជារៀងរាល់ថ្ងៃ លោក និងស៊ន ដាវីន
ត្រូវទៅហ្វឹកហាត់និងបំពេញការងារច្រើនជាងអត់ ប៉ុន្តែសម្រាប់ស៊ន សៀវម៉ី មានការយោគយល់ពីថ្នាក់ដឹកនាំច្រើនណាស់ បើមិនដូច្នោះទេគឺនាងមិនអាចកាន់ការងារជាមន្ត្រីអង្គរក្សពាក់ស័ក្តិ២បាននោះទេ ។ ប៉ុន្តែលោកនៅតែថាប្អូនស្រីរបស់លោកទៅបំពេញការងារជាប្រចាំនៅរាល់ពេលមានការចាត់តាំង ជាពិសេសគឺការហែហមគណៈប្រតិភូជាស្ត្រីដែលចុះមកទស្សនកិច្ចនៅកម្ពុជា ។
លោកសរសើរចំពោះវាសនារបស់ខ្លួននិងប្អូនស្រីដែលមានសំណាងទទួលបានការងាររដ្ឋធ្វើជាបង្អែកក្រោយចំណាយពេលច្រើនឆ្នាំប្រឡូកក្នុងការងារកីឡា ។ លោកអះអាងថា ការងារដែលបងប្អូនលោកកំពុងធ្វើសុទ្ធតែពេញចិត្តទាំងអស់គ្នាព្រោះត្រូវនឹងជំនាញរបស់ខ្លួន ។ មិនតែប៉ុណ្ណោះ តួនាទីជាកងអង្គរក្សមិនត្រឹមតែជួយលើកមុខមាត់បងប្អូនលោកប៉ុណ្ណោះទេ តែក៏ជួយឱ្យបងប្អូនលោកមានការងារមួយច្បាស់លាស់បន្ថែមពីលើអាជីពបង្វឹកតេក្វាន់ដូដល់ក្មេងៗជារៀងរាល់ថ្ងៃផងដែរ ។
ជាមួយនឹងការទម្លាយនេះ គឺបានបង្ហាញថា ស្រីស្អាត ស៊ន សៀវម៉ី គឺជាមន្ត្រីអង្គរក្សពេញសិទ្ធិរបស់ក្រសួងមហាផ្ទៃរយៈពេលមិនក្រោម២ឆ្នាំមកហើយទេ ដោយនាងក្រៅពីជាវីរនារីផ្នែកតេក្វាន់ដូដែលជួយឱ្យកម្ពុជាទទួលបានមេដាយលើឆាកអន្តរជាតិ ក៏ជាមន្ត្រីរាជការពាក់ស័ក្ដិ២លើស្មាយ៉ាងកាលីពផងដែរ ខណៈដែលកិច្ចការនេះនាងក៏ធ្លាប់បង្ហើបថា នឹងចាប់ឱ្យជាប់រហូតដល់ចូលនិវត្តន៍ដោយសារតែត្រូវនឹងជំនាញ ។ ស៊ន សៀវម៉ី ធ្លាប់អះអាងថា នាងស្រឡាញ់ការងាររដ្ឋ ហើយនាងមិនចូលចិត្តបង្វឹកសិស្សដូចបងៗទាំង២នោះទេ ទើបទោះជាមានការមមាញឹកយ៉ាងណាក៏នាងនៅតែចុះបំពេញការងារបានល្អជាពិសេសការចុះការពារដល់គណៈប្រតិភូស្ដ្រីដូចដែលគេបានឃើញនាងតាមហែហមតំណាងម្ចាស់ក្សត្រី សុរិន្ទថង នាពេលកន្លងមកជាដើម ។ ទោះបីយ៉ាងណាគេកត់សម្គាល់ថានាងមិនមែនជាមន្ត្រីរាជការវ័យក្មេងដែលចូលចិត្តសម្ញែងស័ក្ដិ និងតួនាទីនោះទេ ទើបក្នុងពេលខ្លះសឹងមិនដឹងថា នាងគឺជាមន្ត្រីរាជការពេញសិទ្ធិ ដោយម្នាក់ៗនឹកស្មានត្រឹមថានាងត្រូវគេជ្រើសរើសឱ្យបំពេញការងារជាកងការពារម្ដងម្កាលនៅពេលមានប្រតិភូចុះមក ។
ស៊ន សៀវម៉ី បញ្ជាក់ថា ក្រោយពេលនាងសម្រេចចិត្តចូលនិវត្តន៍លើការងារកីឡានោះ នាងនឹងឈោងចាប់ការងារណាមួយច្បាស់លាស់ ដែលការងារដែលនាងចង់ធ្វើនោះត្រូវគេដឹងថាជាមន្ត្រីរាជការ ច្រើនជាងការងារឯកជន ។ ប៉ុន្តែគេមិនដឹងថា រហូតដល់ពេលណាទើបនាងសម្រេចចិត្តបោះបង់ការប្រកួតនោះទេ ក្នុងពេលដែលនាងក៏នៅមានមហិច្ឆតាចង់បានមេដាយបន្តទៀតលើឆាកអន្តរជាតិ ។ ជាក់ស្ដែង នាងបានចាកចេញពីប្រទេសកម្ពុជាប្រមាណជាមួយសប្ដាហ៍មកហើយទៅកាន់ប្រទេសកូរ៉េ ដើម្បីចូលរួមប្រកួតតេក្វាន់ដូកម្រិតអន្តរជាតិដែលរៀបចំដោយម្ចាស់ផ្ទះកូរ៉េ នៅថ្ងៃទី២៨ មិថុនា នេះ ។ សៀវម៉ីបានអះអាងមុនចេញទៅកូរ៉េថា នាងនឹងប្រើពេល២០ថ្ងៃសរុបទាំងការហ្វឹកហាត់ ដោយក្រោយបញ្ចប់ការប្រកួតនេះនាងក៏ត្រូវត្រៀមខ្លួនក្នុងព្រឹត្តិការណ៍ស៊ីហ្គេម និងព្រឹត្តិការណ៍អន្តរជាតិមួយចំនួនទៀត ។ ប៉ុន្តែនាងថា ឱ្យតែការងារក្នុងក្របខ័ណ្ឌរដ្ឋត្រូវថ្នាក់ដឹកនាំទម្លាក់ឱ្យធ្វើ គឺនាងទទួលមិនដែលខាននោះទេ ដោយសារតែជាការងារគ្រឹះដែលនាងមិនអាចឱ្យរបូតពីដៃបាន ៕
ចែករំលែកព័តមាននេះ