ខេត្តឧត្តរមានជ័យ ៖ ក្រុមអាជ្ញាធរថៃបានធ្វើការដោះលែងអ្នកទោសខ្មែរ២នាក់ ដែលត្រូវបានចាប់ខ្លួនជាប់ចោទពីបទឆ្លងដែនខុសច្បាប់ ចូលកាប់ឈើគ្រញួងនៅក្នុងទឹកដីថៃ កាលពីរសៀលថ្ងៃទី២៧ មិថុនា តាមមាត់ច្រកទ្វារអន្តរជាតិជាំ ស្ថិតនៅក្នុងភូមិជាំ ឃុំត្រពាំងប្រីយ៍ ស្រុកអន្លង់វែង ។
អ្នកទោសខ្មែរដែលអាជ្ញាធរថៃដោះលែងនាំខ្លួនមកប្រគល់ឱ្យក្រុមអាជ្ញាធរកម្ពុជាម្នាក់ ឈ្មោះផាន់ ថេង ភេទប្រុស អាយុ៣១ឆ្នាំ និងម្នាក់ទៀតឈ្មោះឈឿន ប៊ុនធឿន ភេទប្រុស អាយុ៣៦ឆ្នាំ ទាំងពីរនាក់រស់នៅភូមិជាំឃុំត្រពាំងប្រីយ៍ ស្រុកអន្លង់វែង ត្រូវបានថៃចាប់ខ្លួន ថ្ងៃទី២០ មករា ២០១៧ តាមច្រកក្នុងភូមិសាស្ត្រចន្លោះបង្គោលសីម៉ាលេខ២ ដែលស្ថិតនៅក្នុងស្រុកអន្លង់វែង ។
ប្រជាពលរដ្ឋនៅក្នុងស្រុកអន្លង់វែងបានឱ្យដឹងថា សព្វថ្ងៃនេះ ក្រុមឈ្មួញកំពុងតែបន្តគៀងគរពលរដ្ឋក្នុងស្រុក និងក្រៅស្រុក ឱ្យឡើងភ្នំដងរែកឆ្លងដែនចូលទៅក្នុងទឹកដីថៃ រុករកកាប់ឈើគ្រញួងយកមកលក់ឱ្យពួកខ្លួន ។ ដោយមិនខ្វល់ថា នឹងត្រូវក្រុមទាហានថៃបាញ់សម្លាប់ ឬចាប់ខ្លួនទៅដាក់គុកច្រវាក់នោះទេ នៅតែបំពានដដែល ។
អ្នកស្រុកខ្លះនិយាយថា មេឈ្មួញគ្រញូងឈ្មោះ យាយម៉ាយ បានរត់ទៅស្រុកយួនបាត់ហើយ ព្រោះសមត្ថកិច្ចមានដីកាស្វែងរកចាប់ខ្លួន ។ ប៉ុន្តែឈ្មួញគ្រញូងនៅតែមានដដែល ដែលគេសង្ស័យថា យាយម៉ាយ ដូររូបភាពពីខ្លួនឯង ឱ្យទៅអ្នកដទៃជាក្រុមរបស់គាត់ ។ ដោយសារនៅសល់ឈ្មួញគ្រញូងបែបនេះហើយ ទើបនៅតែមានពលរដ្ឋលើកគ្នាទៅរកកាប់គ្រញូង ដោយលួចឆ្លងដែនទាំងក្រុមៗ ដូចរូបថតជូនភ្ចាប់មកនេះ ដែលពួកគេចេញដំណើរនិងថតបាន ថ្ងៃទី២៦ មិថុនានេះ ។
មន្ត្រីបម្រើការងារនៅមាត់ច្រកទ្វារអន្តរជាតិជាំបានឱ្យដឹងថា អាជ្ញាធរថៃបានដោះលែងអ្នកទោសខ្មែរ ពីបទឆ្លងដែនកាប់ឈើគ្រញួងចំនួន២នាក់មកប្រគល់ឱ្យកម្ពុជាយើងវិញ ហើយក្រុមសមត្ថកិច្ចបានធ្វើការអប់រុំរួចឱ្យវិលត្រឡប់ទៅជួបជុំក្រុមគ្រួសារវិញក្នុងថ្ងៃដដែល ៕
ចែករំលែកព័តមាននេះ