ខេត្តកំពង់ធំ ៖ លោក សុខ លូ អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តកំពង់ធំ និងលោកឧត្តមសេនីយ៍ឯកទោ ពៅ ហេង មេបញ្ជាការរងនាយសេនាធិការមេបញ្ជាការយោធភូមិភាគទី៤ បានអញ្ជើញជាអធិបតីក្នុងពិធីបិទវគ្គហ្វឹកហ្វឺនបំប៉នយុទ្ធវិធីយុទ្ធដំណើរទ័ពបាញ់ស៊ីបគ្រាប់ពិតដល់នាយទាហាន នាយទាហានរងពលទាហាន នៅបញ្ជាការដ្ឋានវរសេនាតូចថ្មើរជើងលេខ១ នៃតំបន់ប្រតិបត្តិការសឹករងកំពង់ធំ នៅភូមិតាឡែកថ្មី ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ ។
លោកឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំបានធ្វើរបាយការណ៍ស្តីអំពីការអនុវត្តតាមផែនការហ្វឹកហ្វឺនរបស់បញ្ជាការដ្ឋានកងទ័ពជើងគោក និងបញ្ជាការដ្ឋានយោភូមិភាគទី៤ការបើកវគ្គហ្វឹកហ្វឺនប្រចាំឆ្នាំតាមផែនការបានកំណត់ដែលមានសន្ទស្សន៍ដាក់ចុះចំនួន១០០នាក់ ។ ចំនួននេះអង្គភាពបានសម្រេចរៀបចំហ្វឹកហាត់ដល់កំលាំងវរសេនាតូចថ្មើជើងលេខ១ ដើម្បីបំប៉នដល់កំលាំងលើផ្នែកយុទ្ធវិធី វិន័យ សណ្តាប់ធ្នាប់ បង្កើនមនសិកាស្នេហាជាតិ ពង្រឹងតួនាទី ចូលរួមក្នុងកិច្ចការពាដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់ និងមានការបាញ់ស៊ីបគ្រាប់ពិត ប្រភេទអាវុធ B៤០ និងមានយុទ្ធដំណើរទ័ពក្នុងចម្ងាយផ្លូវ ៣២ គីឡូម៉ែត្រ នៅពេលបញ្ចប់វគ្គផងដែរ ។ ការហ្វឹកហ្វឺនរៀនសូត្រនេះមានរយៈពេល៤៥ ថ្ងៃដោយមានការឧបត្ថម្ភគាំទ្រពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បន្ថែមពីនេះចំណេះដឹង និងសមត្ថភាពទាំងនេះជាការពង្រឹងសមត្ថភាពបន្ថែមដល់យោធិនឲ្យក្លាយជាឧប ករណ៍ដ៏រឹងមាំក្នុងការចូលរួមរក្សាសន្តិសុខសង្គម ។
លោក ឧត្តមសេនីយ៍ ពៅ ហេង បានមានប្រសាសន៍ដាស់តឿនដល់នាយទាហាននិងពលទាហានទាំងអស់ត្រូវត្រៀមខ្លួនដើម្បីជួយបង្ការគ្រោះធម្មជាតិក្នុងការជួយដល់ប្រជាពលរដ្ឋ ត្រូវសហការណ៍គ្នាជាមួយកងកម្លាំងដទៃទៀតក្នុងការបង្ក្រាបគ្រឿងញៀន ហើយនាយទាហាន និងពលទាហានត្រូវជៀសឲ្យឆ្ងាយពីគ្រឿងញៀន បើពិនិត្យឃើញថាមានផ្ទុកសារធាតុញៀនត្រូវបណ្តេញចេញពីអង្គភាពជាបន្ទាន់ ត្រូវគោរពច្បាប់ចរាចរណ៍ ដោយចេះយោគយល់អធ្យាស្រ័យក្នុងពេលបើកបរ ត្រូវសហការណ៍ផ្ទៃក្នុងឲ្យបានល្អ ៕
ចែករំលែកព័តមាននេះ