ខេត្តត្បូងឃ្មុំ ៖ កាលពីថ្ងៃទី២៤ មិថុនា នេះ ក្រុមជំនួយការលោកហ៊ុន ម៉ាណែត បាននាំយកសម្ភារអំណោយដ៏ថ្លៃថ្លារបស់សម្តេចតេជោ និងសម្តេចកិត្តិព្រឹទ្ធបណ្ឌិត តាមរយៈលោកហ៊ុន ម៉ាណែត ប្រគេនដល់វត្តអារាម និងប្រគល់ជូនដល់សាលារៀនមួយចំនួនតាមការសន្យាមុនពេលបោះឆ្នោត ដោយក្នុងនោះរួមមានស៊ីម៉ង់តិ៍៥តោនប្រគេនដល់វត្តគីរីមានជ័យ ស្ថិតក្នុងឃុំចុងជាច ស្រុកតំបែរ ខេត្តត្បូងឃ្មុំ, ស៊ីម៉ង់ត៍៥តោន និងឥដ្ឋ១០,០០០ដុំ ប្រគេនដល់វត្តសុវណ្ណរតនសោភ័ណ្ឌមុន្នី ស្ថិតក្នុងឃុំព្រះអណ្តូង ស្រុកស្ទឹងត្រង់ខេត្តកំពង់ចាម, ស៊ីម៉ង់តិ៍៥តោន ប្រគេនដល់វត្តពោធិមង្គល, ម៉ាស៊ីនព្រីនធើរ១គ្រឿង និងម៉ាស៊ីនLCD Projector ១គ្រឿង ប្រគល់ជូនសាលាអនុវិទ្យាល័យទួលព្រះឃ្លាំង, ក្តារខៀនចំនួន១៤ និងប៊ិចហ្វឺតមួយចំនួន ប្រគល់ជូនសាលាបឋមសិក្សាទួលព្រះឃ្លាំង ឃុំទួលព្រះឃ្លាំង ស្រុកស្ទឹងត្រង់ ខេត្តកំពង់ចាម ។
ក្នុងឱកាសសំណេះសំណាល និងក្រៅពីប្រគេនអំណោយដល់វត្ត ក្រុមការងារក៏បាននាំយកអំណោយអនុស្សាវរីយ៍មួយចំនួនជូនលោកយាយលោកតា ពុទ្ធបរិស័ទ១២៥នាក់ ដោយម្នាក់ទទួលបានក្រណាត់សរ ក្រមា និងថវិកា៥ពាន់រៀល ព្រមទាំងមានសម្ភារសិក្សាជូនក្មួយៗកុមារាកុមារីផងដែរ។
លោក មែ ស៊ីថន ក្រុមជំនួយការលោកហ៊ុន ម៉ាណែត បានឱ្យដឹងថា សម្ភារៈដែលប្រគេនដល់វត្ត និងមូលដ្ឋាននានាទាំងអស់ខាងលើនេះ គឺជាអំណោយដ៏យថ្លៃថ្លារបស់សម្តេចតេជោ និងសម្តេចកិត្តិព្រឹទ្ធបណ្ឌិត តាមរយៈលោកហ៊ុន ម៉ាណែត ដែលបានសន្យាប្រគេន និងប្រគល់ជូនក្រោយបោះឆ្នោតក្រុមប្រឹក្សាឃុំសង្កាត់រួចកន្លងទៅនេះ ដើម្បីរួមចំណែកដល់ការកសាងសមិទ្ធផលវត្ត និងក៏ដូចជាឆ្លើយតបទៅនឹងសំណូមពរ និងការខ្វះខាតជាក់ស្តែងក្នុងមូលដ្ឋាន ។
ចែករំលែកព័តមាននេះ