គ្រាប់សេសសល់ពីសង្គ្រាមផ្ទុះកក្រើកធរណីឆក់យកជីវិតកសិករម្នាក់
ខេត្តឧត្តរមានជ័យ ៖ បុរសវ័យចំណាស់ម្នាក់បានស្លា.ប់បាត់បង់ជីវិតភ្លាមៗនៅនឹងកន្លែងកើតហេតុ
ខេត្តឧត្តរមានជ័យ ៖ បុរសវ័យចំណាស់ម្នាក់បានស្លាប់បាត់បង់ជីវិតភ្លាមៗនៅនឹងកន្លែងកើតហេតុ ខណៈកាប់ដីដំបូករំលាយធ្វើស្រែប៉ះចំគ្រាប់៦០មីល្លីម៉ែត្របណ្តាលឱ្យផ្ទុះ កាលពីវេលាម៉ោង៣និង៣០នាទីល្ងាច ថ្ងៃទី២៧ ខែមិថុនា ឆ្នាំ២០១៧ ។ ហេតុការណ៍នេះកើតឡើងនៅចំណុចវាលស្រែដែលស្ថិតនៅខាងក្រោយភូមិចំងាយប្រមាណ៣គីឡូម៉ែត្រ ក្នុងភូមិខ្ទុម សង្កាត់កូនគ្រៀល ក្រុងសំរោង ខេត្តឧត្តរមានជ័យ ។ ជនរងគ្រោះឈ្មោះ យិញ យឿប ភេទប្រុស អាយុ៦៩ឆ្នាំ រសនៅក្នុងភូមិ-សង្កាត់កើតហេតុខាងលើ ។
យោងតាមការឱ្យដឹងពីក្រុមគ្រួសារជនរងគ្រោះនៅព្រឹកថ្ងៃទី២៧ ខែមិថុនា ឆ្នាំ២០១៧ ជនរងគ្រោះបានចេញពីផ្ទះមានគោលបំណងកាប់ដីដំបូកកាយឱ្យស្មើរនឹងដីស្រែដើម្បីស្រួលងាយនឹងភ្ជួររាស់នៅពេលរដូវបង្កបង្កើនផល ។ លុះនៅវេលាម៉ោង៣រសៀលក្នុងថ្ងៃដដែលនោះជនរងគ្រោះបានកាប់ចំគ្រាប់ដែលសេសសល់កាលពីសម័យសង្គ្រាមកប់នៅក្នុងដីបណ្តាលឱ្យផ្ទុះកក្រើកភ្ញាក់ផ្អើលដល់អ្នកភូមិចេញទៅមើលហើយបានឃើញជនរងគ្រោះត្រូវអំបែងគ្រាប់យ៉ាងសុះសាច់ស្លាប់បាត់ទៅហើយ ។
តាមប្រភពពីប៉ូលិសប៉ុស្តិ៍រដ្ឋបាលសង្កាត់កូនគ្រៀលបានឱ្យដឹងថា ក្រោយពីកើតហេតុសមត្ថកិច្ចបានចុះទៅដល់កន្លែងកើតហេតុឃើញជនរងគ្រោះបានដេកស្លាប់នៅក្នុងថ្លុកឈាម ហើយធ្វើការត្រួតពិនិត្យ និងការផ្ទុះ សមត្ថកិច្ចបានសនិ្នដ្ឋានថា ជាប្រភេទគ្រាប់កាំភ្លើងធុន៦០មីលី្លម៉ែត្រ សមត្ថកិច្ចបានប្រគល់សពទៅឱ្យក្រុមគ្រួសារ និងសាច់ញាតិយកទៅធ្វើបុណ្យទៅតាមប្រពៃណី ៕
ចែករំលែកព័តមាននេះ