រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោត ហៅកាត់ថា (គ.ជ.ប) បានចេញសេចក្តីថ្លែងការបង្ហាញការសោកស្តាយខ្លាំងដែលស្ថាប័ននិងគណបក្សនយោបាយមួយចំនួនបានវាយតម្លៃអវិជ្ជមានអំពីដំណើរការរៀបចំការបោះឆ្នោត ។
សេចក្តីថ្លែងការណ៍បានបញ្ជាក់ថា៖ “គ.ជ.ប មានការសោកស្តាយជាខ្លាំងចំពោះការវាយតម្លៃដែលគ្មានព្រឹត្តិការណ៍ជាក់ស្តែងមកឆ្លុះបញ្ជាំងការពិតទៅលើទិដ្ឋភាពបច្ចេកទេសដែលបានបញ្ញាតិនៅក្នុងច្បាប់បោះឆ្នោត និងបទបញ្ជា នីតិវិធីរបស់ គ.ជ.ប ដែលអាចធ្វើឲ្យសាធារណជនមានការយល់ច្រឡំលើដំណើការ និងលទ្ធផលនៃការបោះឆ្នោត”។ គ.ជ.ប បានបញ្ជាក់ថា សម្រាប់ការបោះឆ្នោតដែលបានប្រព្រឹត្តទៅកាលពីថ្ងៃទី ៤ ខែមិថុនាបានបញ្ចប់ដោយរលូន មានសុខសន្តិភាព នងមានភាពល្អប្រសើរជាងការបោះឆ្នោតមុនៗដោយមានអ្នកបោះឆ្នោតចំនួនដល់ទៅជាង ៩០.៣៧% បានចេញទៅបោះឆ្នោត “ប្រកបដោយទឹកមុខរីករាយ គ្មានការបំភិតបំភ័យ និងគ្មានការភ័ខ្លាច”។
គ.ជ.ប ក៏បានបញ្ជាក់ថាការដាក់ ការទទួល និងការដោះស្រាយពាក្យបណ្តឹង រួមទាំងការដោះស្រាយបណ្តឹងទាក់ទងនឹងការសុំរាប់សន្លឹកឆ្នោតឡើងវិញរបស់គណបក្សនយោបាយមួយចំនួន គ.ជ.ប បានអនុវត្តត្រឹមត្រូវពេញលេញតាមច្បាប់ បទបញ្ជា និងនីតិវិធីបោះឆ្នោត។
សេចក្តីថ្លែងការណ៍របស់ គ.ជ.ប ជាការឆ្លើយតបនឹងគណបក្សសង្គ្រោះជាតិ និងបណ្តុំអង្គការនៃបន្ទប់ស្ថានការណ៍ដែលបានចោទប្រកាន់ថាការបោះឆ្នោតមិនទាន់មានសេរី និងមានការគំរាមគំហែង ជាពិសេសបក្សប្រឆាំងបានចោទប្រកាន់ថា គ.ជ.ប ក៏ដូចជាគណៈកម្មាធិការជាតិរៀបចំការបោះឆ្នោតរាជធានី-ខេត្ត បានបដិសេធពាក្យបណ្តឹងរបស់បក្សប្រឆាំង ពាក់ព័ន្ធនឹងបញ្ហានៃសំឡេងឆ្នោតលម្អៀងគ្នាតិចជាង ០.៥% ជាមួយគណបក្សប្រជាជនកម្ពុជា។
ចែករំលែកព័តមាននេះ