ខេត្តបាត់ដំបង ៖ សេចក្ដីរាយការណ៍បឋមឱ្យដឹងថា មានជនមិនស្គាល់មុខមួយក្រុម បាននាំគ្នាវាយបំផ្លាញរូបសំណាកនាងកេន្ន ដែលសាងសង់ជាជំហរ៣នាក់នៅលើរង្វង់មូល ស្ថិតក្នុងសួនច្បារព្រែកមហាទេព ក្នុងសង្កាត់ស្វាយបោ ក្រុងបាត់ដំបង ដែលគេអះអាងថា បានកើតឡើងនៅវេលារំលងអធ្រាត្រ ឈានចូលថ្ងៃទី២៧ មិថុនា ២០១៧។
សេចក្តីរាយករណ៍បន្តថា រូបសំណាកនាងកេន្នឈរ៣នាក់នេះ ត្រូវជនមិនស្គាល់មុខវាយបំបាក់ដៃ និងក្បាលម្ដងហើយ កាលពីប៉ុន្មានឆ្នាំមុន ហើយអាជ្ញាធរមិនទាន់បានជួសជុលផង ឥឡូវត្រូវជនទុច្ចរិតវាយកម្ទេចសារជាថ្មី រហូតបាក់ធ្លាក់ពីលើរង្វង់មូលតែម្ដង។
គួរបញ្ជាក់ថា កាលពីចន្លោះយប់ថ្ងៃទី១៦ ទៅ១៧ មិថុនា កន្លងទៅ (ជាងមួយសប្ដាហ៍មុន) ឃើញជនមិនស្គាល់មុខ បានវាយ
បំផ្លាញរូបសំណាកស្ត្រីទូលកណ្ដាប់ស្រូវម្ដងហើយនៅសួនច្បារច្រមុះជ្រូកខាងជើងផ្សារណាត់ តាមបណ្ដោយផ្លូវលេខ៣ ចំកណ្ដាលក្រុងបាត់ដំបងតែម្ដង តែរហូមកដល់ពេលនេះ អាជ្ញាធរក៏ដូចជាសមត្ថកិច្ច ហាក់មិនទាន់ស្រាវជ្រាវរកមុខសញ្ញាក្រុមជនទុច្ចរិតវាយបំផ្លាញរូបសំណាកតាមសួនច្បារសាធារណ:ឃើញនៅឡើយទេ ប៉ុន្តែអាជ្ញាធរក្រុងបានអះអាងថា លោកបានស្នើឲ្យកម្លាំងសមត្ថកិច្ច ធ្វើការស្រាវជ្រាវលើករណីនេះហើយ ។
ចែករំលែកព័តមាននេះ