លោក គួច ចំរើន ត្រូវតែងតាំងជាអភិបាលនៃគណៈអភិបាលខេត្តកំពង់ចាម
ខេត្តកំពង់ចាម ៖ «សូមឲ្យសមត្ថកិច្ចត្រូវតែយកចិត្តទុកដាក់បង្ក្រាបល្បែងស៊ីសង និងស្ថាប័នជំនាញត្រូវតែប្រឹងប្រែងទប់ស្កាត់បទល្មើសព្រៃឈើផងដែរ»
ខេត្តកំពង់ចាម ៖ «សូមឲ្យសមត្ថកិច្ចត្រូវតែយកចិត្តទុកដាក់បង្ក្រាបល្បែងស៊ីសង និងស្ថាប័នជំនាញត្រូវតែប្រឹងប្រែងទប់ស្កាត់បទល្មើសព្រៃឈើផងដែរ» នេះជាប្រសាសន៍របស់សម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ ដែលបានថ្លែងនៅព្រឹកថ្ងៃទី២៧ មិថុនា ២០១៧ ក្នុងពិធីប្រកាសចូលកាន់មុខតំណែងអភិបាលនៃគណៈអភិបាលខេត្ត។ ដោយបានធ្វើឡើងនៅសាលប្រជុំសាលាខេត្ត មានមន្ត្រីរាជការ កងកម្លាំងប្រដាប់អាវុធចូលរួមច្រើនកុះករ។
លោក លន់ លឹមថៃ អភិបាលខេត្ត ដែលត្រូវបានចូលនិវត្តបានថ្លែងថា ការងារផ្តល់សេវាគ្រប់ទីកន្លែងក្នុងខេត្តកាន់តែមានភាពល្អប្រសើឡើង និងមានការផ្លាស់ប្តូរជាទីមោទនៈទាំងរបៀបធ្វើការងារ ទាំងឥរិយាបថរបស់អ្នកផ្តល់សេវា និងអ្នកទទួលសេវា។ ការបង្កើតឲ្យមានការិយាល័យច្រកចេញចូលតែមួយគឺបានឆ្លើយតបទៅនឹងតម្រូវការរបស់ប្រជាពលរដ្ឋ ពីព្រោះនីតិវិធីនៃការស្នើសុំសេវានេះមានលក្ខណៈសាមញ្ញា ងាយស្រួល មានភាពច្បាស់លាស់ចំពោះតម្លៃសេវា លឿន តម្លាភាព ប្រសិទ្ធភាព និងកាត់បន្ថយបាននូវបញ្ហាជាច្រើនដែលធ្លាប់កើតមានកាលពីមុនមក។
លោក គួច ចំរើន អភិបាលនៃគណៈអភិបាលខេត្ត ដែលត្រូវបានតែងតាំងថ្មីបានធ្វើការប្តេជ្ញាចិត្តថា៖១-ប្តេជ្ញាខិតខំអនុវត្តឲ្យបានម៉ឺងម៉ាត់នូវរដ្ឋធម្មនុញ្ញ គោលការណ៍ច្បាប់លិខិតបទដ្ឋានគតិយុត្តិជាធរមាន និង គោលការណ៍ណែនាំរបស់រាជរដ្ឋាភិបាល ដែលបានដាក់ចុះឲ្យមានប្រសិទ្ធភាពខ្ពស់។២-ប្តេជ្ញាគោរពគាំទ្រ និងអនុវត្តឲ្យបានខ្ជាប់ខ្ជួន នូវកម្មវិធីគោលនយោបាយ និងយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាលក្រោមការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន នាយរដ្ឋមន្ត្រីនៃព្រះរាជាណាចក្រកម្ពុជា។ ៣-ខិតខំគោរព និងអនុវត្តតាមគោលការណ៍ដឹកនាំ ចង្អុលបង្ហាញ និងទទួលយករាល់ការផ្តល់នូវអនុសាស៍ដ៏ខ្ពង់ខ្ពស់របស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក៏ដូចជាថ្នា ក់ដឹកនាំក្រសួងឲ្យបានល្អដើម្បីពង្រឹងការគ្រប់គ្រង ដឹកនាំប្រកបដោយប្រសិទ្ធភាព តម្លាភាពក្នុងការបំពេញភារកិច្ចនៅរដ្ឋបាលថ្នាក់ក្រោមជាតិ។
បន្ទាប់មកសម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ មានប្រសាសន៍ឲ្យដឹងដែរថា ការតែងតាំងលោក គួច ចំរើន ពីអគ្គនាយករងនៃអគ្គនាយករដ្ឋានរដ្ឋបាលក្រសួងមហាផ្ទៃ មកទទួលមុខតំណែងជាអភិបាលខេត្តកំពង់ចាមជំនួសលោក លន់ លឹមថៃ អភិបាលខេត្តដែលត្រូវចូលនិវត្ត។ ជាមួយនោះមានការតែងតាំងអភិបាលរងខេត្ត ចំនួន៣រូបទៀតមាន៖ ១-លោក ហាន សុកល ២-លោក ហេង វណ្ណី និងលោកស្រី ស្រី គឹមឆយ។សម្តេចក្រឡាហោម ស ខេង មានប្រសាសន៍បន្តថា ការបោះឆ្នោតក្រុមប្រឹក្សាឃុំសង្កាត់អាណត្តិទី៤កន្លងទៅនេះមានលក្ខណៈល្អប្រសើរ ហើយក្រសួងមហាផ្ទៃក៏បានប្រកាសទទួលស្គាល់មេឃុំចៅសង្កាត់ថ្មី ដែលបានជាប់ឆ្នោតផងដែរ។
អភិបាលខេត្តដែលត្រូវតែងតាំងថ្មីធ្វើយ៉ាងណាខិតខំចេះសាមគ្គីភាពផ្ទៃក្នុងឲ្យ បានល្អប្រសើរ ត្រូវពង្រឹងសន្តិសុខ និងសណ្តាប់ធ្នាប់សាធារណៈជូនប្រជាពលរដ្ឋ ហើយត្រូវតែទប់ស្កាត់ អំពើប្លន់ បង្ក្រាបគ្រឿងញៀន ពង្រឹងការគ្រប់គ្រងអាវុធជាតិផ្ទុះឲ្យបានល្អ បង្ក្រាបល្បែងស៊ីសងគ្រប់ ប្រភេទ ទប់ស្កាត់បទល្មើសព្រៃឈើ ហើយត្រូវតែពង្រឹងច្បាប់ចរាចរណ៍ផ្លូវគោកបន្ថែមទៀតធ្វើយ៉ាងណាដើម្បី កាត់បន្ថយការស្លាប់។ មិនតែប៉ុណ្ណោះត្រូវតែប្រឹងប្រែងផ្តល់សេវាសាធារណៈជូនពលរដ្ឋក្នុងមូលដ្ឋាន ឲ្យបានល្អប្រសើរ៕
ចែករំលែកព័តមាននេះ