ខេត្តបន្ទាយមានជ័យ ៖ ជនសង្ស័យម្នាក់ជាប់ចោទពីបទឆក់កាបូប ត្រូវកម្លាំងនគរបាលជំនាញការិយាល័យព្រហ្មទណ្ឌកំរិតស្រាល រៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យ នៅថ្ងៃទី២៧ ខែមិថុនា ឆ្នាំ២០១៧ នេះ ។
ខេត្តបន្ទាយមានជ័យ ៖ ជនសង្ស័យម្នាក់ជាប់ចោទពីបទឆក់កាបូប ត្រូវកម្លាំងនគរបាលជំនាញការិយាល័យព្រហ្មទណ្ឌកំរិតស្រាល រៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យ នៅថ្ងៃទី២៧ ខែមិថុនា ឆ្នាំ២០១៧ នេះ ។
លោកវរសេនីយ៍ទោ ខែម សុភ័ណ នាយការិយាល័យនគរបាលព្រហ្មទណ្ឌកំរិតស្រាល បានឲ្យដឹងថា ៖ ជនសង្ស័យត្រូវចាប់ឃាត់ខ្លួនឈ្មោះ សូ ស៊ិន ភេទប្រុស អាយុ២៦ឆ្នាំ នៅភូមិពង្រ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។ តាមបណ្តឹងរបស់ជនរងគ្រោះឈ្មោះ ពុំ លីជឺ ភេទស្រី អាយុ១៩ឆ្នាំ នៅភូមិរោងម៉ាស៊ីន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ និងប្អូនថ្លៃឈ្មោះ អ៊ុន សុភ័ក្ត្រា បានប្រាប់សមត្ថកិច្ចថា នៅវេលម៉ោង០៨និង៣០នាទីយប់ ថ្ងៃទី០១ ខែមិថុនា ឆ្នាំ២០១៧ ខ្លួនបានជិះម៉ូតូឌុបប្អូនថ្លៃមកពីហូបស៊ុប លុះដល់ផ្លូវលំមុខផ្ទះរបស់ខ្លួន ស្រាប់តែមានជនល្មើសចំនួន២នាក់ ជិះម៉ូតូម៉ាក HONDA DREAM ពណ៌ខ្មៅ មិនស្គាល់ស៊េរី មកពីក្រោយ ឆក់យកកាបូបលុយរបស់ប្អូនថ្លៃ ដែលក្នុងកាបូបមាន ទូរស័ព្ទដៃម៉ាក IPhone៦ មួយគ្រឿង ប្រាក់ដុល្លារ២៥០ដុល្លារ ប្រាក់ខ្មែរ៥ម៉ឺនរៀល ខ្សែ.កមួយខ្សែ តម្លៃ២០០ដុល្លារ ។ លោកនាយការិយាល័យ បានបញ្ជាក់ថា ៖ ក្រោយពីទទួលបានបណ្តឹងរបស់ជនរងគ្រោះ និងមានបទបញ្ជាពីលោកឧត្តមសេនីយ៍ទោ អាត់ ខែម ស្នងការនគរបាលខេត្ត និងមានការសម្របសម្រួលពីលោក តេង សាម៉ៃ ព្រះរាអាជ្ញារងអមសាលាដំបូងខេត្ត និងការដឹកនាំផ្ទាល់ពីលោកឧត្តមសេនីយ៍ត្រី សិទ្ធ ឡោះ ស្នងការរង ទទួលផែននគរបាលព្រហ្មទណ្ឌ លោកបានដឹកនាំកម្លាំធ្វើការស្រាវជ្រាវ រហូតឈានដល់ការឃាត់ខ្លួនមុខសញ្ញាសង្ស័យឈ្មោះ សូរ ស៊ិន នៅថ្ងៃទី២៥ ខែមិថុនា ឆ្នាំ២០១៧ ដើម្បីធ្វើការសាកសួរ ។ នៅចំពោះមុខសមត្ថកិច្ច ជនសង្ស័យឈ្មោះ សូរ ស៊ិន បានសារភាពថា ៖ រាល់ការធ្វើសកម្មភាពបទល្មើស គេតែងធ្វើជាមួយបក្ខពួកគេម្នាក់ទៀតឈ្មោះ បឺ អាយុ២៤ឆ្នាំ នៅភូមិគោរដ្ឋាន សង្កាត់អូរអំបិល ក្រុងសិរីោសភ័ណ (ជាប់ពន្ធនាគារ) ធ្លាប់ធ្វើសកម្មភាព ឆបោកពលរដ្ឋនៅស្រុកស្វាយចេក ១លើក និងប្រព្រឹត្តអំពើលួច ៤លើក នៅដើមខែមិថុនាឆ្នាំនេះ ឆក់កាបូប ១លើក នៅក្រុងសិរីសោភ័ណ ។ លោកវរសេនីយ៍ទោ ខែម សុភ័ណ បានបញ្ជាក់ថា ៖ ជនសង្ស័យឈ្មោះ សូរ ស៊ិន គឺជាមុខសញ្ញាចាស់ ធ្លាប់ធ្វើសកម្មភាព ឆក់ លួច ជាច្រើនលើក សមត្ថកិច្ចបានតាមប្រមាញ់ជាយូរមកហើយ ទីបំផុតគេអស់លក្ខណ៍ ត្រូវជាប់អន្ទាក់សមត្ថកិច្ច ។
ហើយមានបណ្តឹងរបស់ជនរងគ្រោះ រួមទាំងចម្លើយសារភាពរបស់ជនសង្ស័យនោះ កម្លាំងនគរបាលជំនាញរបស់លោក បានរៀបចំសំណុំរឿង បញ្ជូនខ្លួនទៅសាលាដំបូងខេត្ត ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ