រាជធានីភ្នំពេញ ៖ សេចក្តីរាយការណ៍បន្តឱ្យដឹងថា ក្រោយពីគណៈកម្មាធិការប្រយុទ្ធប្រឆាំងផលិតផលក្លែងក្លាយ រួមមាន ព្រះរាជអាជ្ញារងអមសាលាដំបូងរាជធានីភ្នំពេញ សហការអាជ្ញាធរខណ្ឌចំការមន បានធ្វើការឆ្មក់ចូលបង្ក្រាបទីតាំងឃ្លាំងស្តុក និងចែកចាយគ្រឿងសម្អាងមួយកន្លែងនោះបានរកឃើញថា មានគ្រឿងសម្អាងចំនួនជាង៤០ប្រភេទ និងមានជាង៥០០កេស ដែលកំពុងសង្ស័យសុទ្ធតែនាំចូលដោយខុសច្បាប់ និងមិនទាន់ដឹងថា គ្រឿងសម្អាងទាំងនោះក្លែងក្លាយ ឬក៏សុទ្ធនោះទេ ខណៈកម្លាំងបានដកមួយមុខៗ យកទៅធ្វើការពិសោធន៍បន្ត ។
គួរបញ្ជាក់ថា ប្រតិបត្តិការនេះ បានធ្វើឡើងកាលពីវេលាម៉ោង០៩ និង២០នាទីព្រឹកថ្ងៃទី២៧ មិថុនា នេះ ស្ថិតនៅចំណុចផ្ទះលេខ២០Bនិង២០C ផ្លូវលេខ៣28 ក្រុម២៤ ភូមិ៣ ក្នុងសង្កាត់ទួលស្វាយព្រៃទី១ ខណ្ឌចំការមន ដែលមានម្ចាស់ឈ្មោះរ៉ែន ឡេង ភេទស្រី អាយុ៥១ឆ្នាំ ជាអាជីវករ ស្នាក់នៅផ្ទះទីស្តុកអីវ៉ាន់ខាងលើ ។
ប្រភពដដែលបន្តថា កម្លាំងបានរកឃើញគ្រឿងសម្អាងដែលលួចស្តុកទុក សម្រាប់ចែកចាយទាំងនេះ ដែលភាគច្រើនមានជាប្រភេទឡេលាបស្បែក, សាប៊ូគ្រប់ប្រភេទ, ម្សៅលាប រួមទាំងគ្រឿងសម្អាងផ្សេងៗទៀត ដែលមានរហូតចំនួនជាង៤០ប្រភេទ និងជាង៥០០កេះឯណោះ ។ គ្រឿងសំអាងទាំងអស់នេះ បាននាំចូលមកពីប្រទេសសាំងហ្គាពួរ, ប្រទេសថៃ, ប្រទេសម៉ាឡេស៊ី, និងឥណ្ឌូនេស៊ីផងដែរ ។ នេះបើយោងទៅតាមពិនិត្យឃើញលើសំបកដប ឬកំប៉ុងទាំងនោះ ។
បច្ចុប្បន្ន ផលិតក្លែងក្លាយទាំងនេះ និងស្ត្រីម្ចាស់ទីតាំង ត្រូវបាននាំមករក្សាទុកនៅគណៈកម្មាធិការប្រយុទ្ធប្រឆាំងផលិតផលក្លែងក្លាយនៃក្រសួងមហាផ្ទៃ ដើម្បីធ្វើការចាត់ការទៅតាមច្បាប់ និងបិទទីតាំងខាងលើជាបណ្តោះអាសន្ន ។
ជាចុងក្រោយ លោកឧត្តមសេនីយ៍ត្រី អនុប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ ក៏សូមធ្វើការអំពាវនាវទៅដល់បណ្តារអ្នកសារព័ត៌មានទាំងអស់ មេត្តាជួយសហការផ្តល់ជាព័ត៌មាន ជាពិសេសយើងត្រូវការមានការចូលរួមអំពីសំណាក់បងប្អូនប្រជាពលរដ្ឋគ្រប់ទិសទីទាំងអស់ឱ្យបានដឹងថាមានទីតាំងណាខ្លះ ដែលបិទទ្វារជិត ឬមានការសង្ស័យ ឬនៅកន្លែងណាមានការលាក់លៀម ត្រូវរាយការណ៍ប្រាប់កម្លាំងមានសម្ថកិច្ចជាបន្ទាន់ ។
ចែករំលែកព័តមាននេះ