រាជធានីភ្នំពេញ ៖ សេចក្តីរាយការណ៍ឱ្យដឹងថា រថយន្តម៉ាកឡិចស៊ីសRX300មួយគ្រឿង ដែលស្គាល់ជារបស់លោកឧត្តមសេនីយ៍ ត្រីម្នាក់ ត្រូវបានរថភ្លើងបើកបុកខ្ទេចអស់មួយកំណាត់ក្រោយ និងវិលមួយជុំហើយក៏ទៅប៉ះជាមួយរថយន្ត២គ្រឿងទៀត ខណៈកំពុងបើកឆ្លងផ្លូវរថភ្លើងនោះ មិនបានប្រុងប្រយ័ត្ន ។
ហេតុការណ៍ដ៏រន្ធត់នេះ បានកើតឡើងកាលពីវេលាម៉ោង០៨ និង១០នាទីព្រឹកថ្ងៃទី២៧ មិថុនា នេះ ស្ថិតនៅចំណុចត្រឡោកបែក ស្ថិតតាមបណ្តាលផ្លូវលេខ៥៩៨ ក្នុងសង្កាត់បឹងកក់២ ខណ្ឌទួលគោក ។ ទោះបីជាយ៉ាងណា នេះចាត់ទុកជាសំណាងល្អមួយដែល មិនមានមនុស្សត្រូវរងគ្រោះថ្នាក់ ។
សេចក្តីរាយការណ៍បន្តថា បន្ទាប់ពីកើតគ្រោះថ្នាក់នេះ ខាងរថភ្លើងបើកចូលទៅស្ថានីយបាត់ ។ រីឯរថយន្តឡិចស៊ីសRX300 ពណ៌ស ពាក់ស្លាកលេខភ្នំពេញ2S-6017 បើកបរដោយលោកឧត្តមសេនីយ៍ត្រី អេង ហួង អាយុប្រមាណ៤០ឆ្នាំ បម្រើការនៅក្រសួងការពារជាតិ ស្នាក់នៅផ្ទះលេខ២៤ ផ្លូវលេខ៦P សង្កាត់ដង្កោ ខណ្ឌដង្កោ ។
បើតាមសាក្សីថា នៅមុនពេលកើតហេតុ គេឃើញរថភ្លើងធ្វើដំណើរក្នុងទិសដៅពីលិចទៅកើតចូលស្ថានីយ ។ នៅពេលជិតដល់ចំណុចកែងផ្លូវលេខ៥៩៨ បានស៊ីផ្លេ ហើយសន្តិសុខដែលប្រចាំការបានទំលាក់របាំងដែក តែទំលាក់តែម្ខាង ស្រាប់តែមានរថយន្តម៉ាកឡិចស៊ីសខាងលើមិនបានឈប់ទេ ក៏បានបើកឆ្លងផ្លូវដែកមិនទាន់ផុត ក៏ត្រូវរថភ្លើងមកដល់បុកចំផ្នែកខាងក្រោយ បណ្តាលឱ្យបុកខ្ទេចមួយកំណាត់ និងធ្លាក់កាង ។ រថយន្តឡិចស៊ីសនោះបានវិលអស់មួយជុំបោកទៅត្រូវរថយន្ត២គ្រឿងទៀត តែខូចខាតតិចតួចទេ ។
តាមលោកឧត្តមសេនីយ៍យោធាដែលជាម្ចាស់រថយន្តថា ដោយសារតែឃើញផ្លូវស្រឡះ និងឃើញរថភ្លើងនៅឆ្ងាយ គាត់ក៏បានធ្វើដំណើរឆ្លងកាត់ តែមិនផុតក៏ត្រូវរថភ្លើងមកដល់បុក ចំផ្នែកខាងក្រោយពេញទំហឹងតែម្តង។
ចែករំលែកព័តមាននេះ