ខេត្តកំពត ៖ មន្ត្រីរដ្ឋបាលព្រៃឈើកំពត-កែបមួយរូបបានឱ្យដឹងថា កាលពីវេលារំលងអធ្រាត្រឈានចូលថ្ងៃទី៧ មីនា កម្លាំងប៉ូលិសប៉ុសិ៍្តរដ្ឋបាល ឃុំកំពង់គ្រែង ស្រុកទឹកឈូ បានសហការជាមួយសមត្ថកិច្ចរដ្ឋបាលព្រៃឈើបង្ក្រាបបានឈើគ្រញូងចំនួន៥៥ដុំ ស្មើនឹងទម្ងន់២៩៩គីឡូក្រាម ដែលឈ្មួញដឹកតាមទូកបន្លំជាមួយទូកនេសាទតាមដៃព្រែកកំពតចូលមកសមុទ្រកំពត បំរុងដឹកចេញទៅលក់នៅប្រទេសវៀតណាម ។ ចំណែកពួកឈ្មួញក្រោយពេលឃើញទូកសមត្ថកិច្ច ពួកគេក៏ទម្លាក់ឈើទាំង៥៥ដុំនោះចុះ ទៅក្នុងទឹក រួចបើកទូករត់គេចខ្លួនបាត់។
ពេលឃើញបែបនេះ សមត្ថកិច្ចល្បាតដោយមានការសង្ស័យក៏បើកទូកដេញតាម តែតាមមិនទាន់ក៏ត្រឡប់មកពិនិត្យកន្លែងសង្ស័យហើយកម្លាំងប៉ូលិសបានចុះមុជរាវក្នុងទឹក ក៏ប្រទះឃើញឈើគ្រញូងដែលឈ្មួញទម្លាក់
ចោល ។ ក្រោយពីប្រមូលបានឈើហើយ សមត្ថ កិច្ចបានធ្វើកំណត់ហេតុដកហូតឈើល្មើសច្បាប់ទាំងនោះមករក្សាទុកនៅទីស្នាក់ការខណ្ឌរដ្ឋបាលព្រៃឈើកំពត ដើម្បីស្រាវជ្រាវរកមុខសញ្ញាម្ចាស់ឈើយកមកផ្តន្ទាទោសតាមច្បាប់ ។
គួររំលឹកថា ករណីរកស៊ីឈើគ្រញូងដែលឈ្មួញកំពុងធ្វើអាជីវកម្មសព្វថ្ងៃនេះនៅក្នុងខេត្តកំពត គឺមានគ្រប់រូបភាព ដឹកតាមទូកក៏មានដឹកតាមរថយន្តទំនើបៗក៏មាន ធ្វើឱ្យសមត្ថកិច្ចពិបាកកំណត់មុខសញ្ញាក្នុងការបង្ក្រាបបទល្មើសឈើទាំងនោះផងដែរ ៕
ចែករំលែកព័តមាននេះ