រុស្ស៊ី-ស៊ីរី ៖ កាលពីថ្ងៃទី២៣ មិថុនា នាវា៣គ្រឿងរបស់កងកម្លាំងនាវាចរណ៍រុស្ស៊ីបានបា.ញ់មីស៊ីលបណ្តែតធុន KALIBR ជាច្រើនគ្រាប់ប្រឆាំងបណ្តាទីតាំងរបស់ក្រុមរដ្ឋអ៊ិស្លាមនៅស៊ីរី ។ អ្នកជំនាញការរបស់ទីភ្នាក់ងារព័ត៌មានរុស្ស៊ី
រុស្ស៊ី-ស៊ីរី ៖ កាលពីថ្ងៃទី២៣ មិថុនា នាវា៣គ្រឿងរបស់កងកម្លាំងនាវាចរណ៍រុស្ស៊ីបានបាញ់មីស៊ីលបណ្តែតធុន KALIBR ជាច្រើនគ្រាប់ប្រឆាំងបណ្តាទីតាំងរបស់ក្រុមរដ្ឋអ៊ិស្លាមនៅស៊ីរី ។ អ្នកជំនាញការរបស់ទីភ្នាក់ងារព័ត៌មានរុស្ស៊ី SPUTNIK លោកអាឡិចសាន់ដ្រ៍ហ្គ្រោឡេនកូ ពន្យល់ពីហេតុផលនៅពីក្រោយការវាយប្រហារនេះ ។
កាលពីថ្ងៃទី២៣ មិថុនា នាវាពិឃាត AMIRAL ESSEN និង AMIRAL GRIGOROVICH ព្រមទាំងនាវាមុជទឹក KRASNODAR របស់កងនាវាចរណ៍រុស្ស៊ីបានបាញ់មីស៊ីលបណ្តែតធុន KALIBR ៦គ្រាប់ប្រឆាំងបណ្តាប៉ុស្តិ៍ទីបញ្ជាការ និងឃ្លាំងស្តុកអាវុធសំខាន់ៗរបស់ក្រុមរដ្ឋអ៊ិស្លាមនៅខេត្តហាម៉ាស៊ីរី ។ ក្រសួងការពារប្រទេសរុស្ស៊ីបានប្រាប់តួកគី និងអីុស្រាអែលឱ្យដឹងមុនពីការវាយប្រហារនេះ ។ ការវាយប្រហារដោយមីស៊ីលវាយលុកខ្លាំងនេះធ្វើឡើងពេលមានការវាយលុករបស់កងទ័ពរដ្ឋាភិបាលស៊ីរី ។ ២ថ្ងៃមុននេះ បណ្តាកងឯកភាពនៃកងទ័ពស៊ីរីវាយយកបានពីក្រុមជីហាដនូវសង្កាត់៥ នៃជាយក្រុងភាគអាគ្នេយ៍ក្រុងដាម៉ាស់ ។
សភាពការណ៍ពិតជាសមស្របសម្រាប់បន្តស្វែងរកដំណោះស្រាយចរចាមួយនៅស៊ីរី ។ ក្រសួងការបរទេសរុស្ស៊ីប្រកាសថា ការបង្កើតបណ្តាតំបន់មានភាពធូរស្រាលសំខាន់ៗត្រូវបានព្រមព្រៀងគ្នាដោយបណ្តាប្រទេសដែលចូលរួមក្នុងការដោះស្រាយជម្លោះស៊ីរី ។
មនុស្សទាំងឡាយយល់ថា ការប្រើប្រាស់មីស៊ីលបណ្តែតបាញ់ចេញពីនាវាជាការប្រើកម្លាំងខ្លាំងជ្រុលពេកហើយ ព្រោះមីស៊ីល KALIBR គឺសម្រាប់វាយប្រហារគោលដៅស្ថិតនៅចម្ងាយដល់ទៅ២.៦០០គីឡូម៉ែត្រឯណោះ ហើយមីស៊ីលនេះអាចគេចផុតពីបណ្តាប្រព័ន្ធការពារអាកាស និងប្រឆាំងមីស៊ីលទំនើបៗទៀតផង ។ ដូច្នេះគេសួរថាតើត្រូវប្រើវាប្រឆាំងពួកជីហាដដែលមានតែកាំភ្លើងវាយលុក និងមីស៊ីលការពារអាកាសសាមញ្ញធ្វើអី?
អ្នកជំនាញការរបស់ SPUTNIK រូបនេះពន្យល់ថា បណ្តាមីស៊ីលទាំងនោះត្រូវបានបាញ់ចេញ បន្ទាប់ពីខាងផ្នែកស៊ើបការណ៍រាយការណ៍ពីភាពចាំបាច់នៃការវាយប្រហារសន្ធាប់យ៉ាងខ្លាំង និងចំៗបណ្តាទីតាំងរបស់ពួកភេរវករនៅខេត្តហាម៉ា ។ ក្រសួងការពារប្រទេសរុស្ស៊ីបញ្ជាក់ថា ពេលបាញ់មីស៊ីលនាវាមុជទឹក KRASNODAR ស្ថិតនៅលើផ្ទៃទឹក រួចការបាញ់មីស៊ីលនេះមានឥទ្ធិពលតែលើពួកយុទ្ធជនក្រុមរដ្ឋអ៊ិស្លាមប៉ុណ្ណោះ ។
ការបាញ់មីស៊ីលបណ្តែតចេញពីសមុទ្រមេឌីទែរ៉ាណេ ពុំត្រឹមជាការបង្ហាញសមត្ថភាពរបស់កងម៉ារីនរុស្ស៊ីឡើយ ក៏ប៉ុន្តែក៏ជាសមាសសភាពមួយនៃការតស៊ូប្រឆាំងភេរវកម្មអន្តរជាតិក្នុងកាលៈទេសៈមានវត្តមានក្នុងតំបន់របស់កងកម្លាំងអាកាស និងកងកម្លាំងជើងទឹករបស់សហរដ្ឋអាមេរិក និងអូតង់ ។
ការបកស្រាយរបស់រុស្ស៊ីលើសភាពការណ៍នៅស៊ីរីខុសពីការបកស្រាយរបស់សហរដ្ឋអាមេរិក និងរបស់អូតង់ ។ ការបាញ់ទម្លាក់យន្តហោះ SU-22 ស៊ីរី ដោយយន្តហោះ F/A-18A SUPER HORNET អាមេរិកក្នុងតំបន់រ៉ាកាស៊ីរីញ៉ាំងឱ្យរុស្ស៊ីផ្អាកបណ្តាញទាក់ទងរុស្ស៊ី-អាមេរិកពីការហោះហើរនៃយន្តហោះនៅស៊ីរី ។ រុស្ស៊ីក៏គំរាមតម្រង់មីស៊ីលលើគ្រប់យន្តហោះរបស់ក្រុមចម្រុះក្នុងដែនអាកាសស៊ីរីខាងលិចទន្លេ EUPHRATE លើកលែងតែតំបន់រ៉ាកា ។ ច្បាស់ណាស់ ពួកលោកខាងលិចពុំមានទម្លាប់ធ្វើប្រតិបត្តិការដែលប្រឈមមុខនឹងគ្រោះថ្នាក់ចំពោះអាយុជីវិតអ្នកបើកយន្តហោះ និងសម្ភាររបស់ពួកគេឡើយ ។
រុស្ស៊ីថ្លែងថា ខ្លួននឹងត្រួតពិនិត្យ ព្រមទាំងតាមដានការហោះហើររបស់គ្រប់យន្តហោះនៃក្រុមចម្រុះ ។ កងទ័ពអាកាសអាមេរិកពេលនេះត្រូវបង្ខំចិត្តពិនិត្យឡើងវិញ បណ្តាប្រតិបត្តិការរបស់ខ្លួនដោយសារហេតុផលដែលយន្តហោះរបស់គេនឹងពុំអាចធ្វើប្រតិបត្តិការដោយគ្មានការតាមដានត្រួតពិនិត្យពីសំណាក់ប្រព័ន្ធការពារអាកាសរបស់រុស្ស៊ីឡើយ ។ បែបនេះមានន័យថា ពួកអ្នកបើកយន្តហោះក្រុមចម្រុះស្ថិតក្នុងស្ថានភាពដែលយន្តហោះពួកគេអាចត្រូវបាញ់ទម្លាក់ ។
ឧត្តមសេនីយ៍ KEVIN RYAN អតីតសេនានុពន្ធយោធាអាេមរិកប្រចាំក្រុងមូស្គូនិយាយថា កាលអំឡុងឆ្នាំនៃសង្គ្រាមត្រជាក់ រុស្ស៊ីបានបាញ់ទម្លាក់យន្តហោះអាមេរិក៣៩គ្រឿង ជិតព្រំដែនរបស់ខ្លួន ។ សម្រាប់កងយោធារុស្ស៊ីការបាញ់ទម្លាក់យន្តហោះថ្មីមួយទៀតពុំមានអ្វីថ្មីទេ ។ ដូច្នេះហើយបានជាពួកអាមេរិកខ្លាចកងកម្លាំងអាកាសរុស្ស៊ី តែទន្ទឹមនឹងនេះក៏គ្រោងសេណារីយ៉ូនៃជម្លោះជាក់ស្តែងជាមួយរុស្ស៊ីនៅស៊ីរីផងដែរ ៕
ចែករំលែកព័តមាននេះ