ខេត្តបាត់ដំបង ៖ សេចក្តីរាយការណ៍ឱ្យដឹងថា កាលពីវេលាម៉ោង០៥ និង៤៥នាទីល្ងាចថ្ងៃទី២៥ មិថុនា មានការព័ទ្ធបង្ក្រាបរបស់កម្លាំងសមត្ថកិច្ចជាច្រើន ដោយធ្វើការតាមចាប់ជនសង្ស័យជាចោរឆក់កាបូបម្នាក់រហូតចាប់បាន ស្ថិតត្រង់ចំណុចភូមិរំចេក៣ សង្កាត់រតនៈ ក្រុងបាត់ដំបង ។
សមត្ថកិច្ចឱ្យដឹងថា ជនសង្ស័យខាងលើឈ្មោះសុះ ឆៃយ៉ា អាយុ២៩ឆ្នាំ មានទីលំនៅក្នុងភូមិហប់ ឃុំហប់ ស្រុកគាស់ក្រឡ ខេត្តបាត់ដំបង ។ រីឯស្ត្រីជាម្ចាស់កាបូបឈ្មោះស្វាយ វិវឌ្ឍនៈ អាយុ២៣ឆ្នាំ មានទិលំនៅក្នុងភូមិកម្មករ សង្កាត់ស្វាយប៉ោ ក្រុងបាត់ដំបង។
ក្នុងហេតុការណ៍នេះ ត្រូវសមត្ថកិច្ចឱ្យទៀតថា មុនពេលកើតហេតុ ខណៈស្ត្រីជាម្ចាស់កំពុងជិះម៉ូតូ មកដល់ចំណុចមុខបញ្ជាការដ្ឋានយោធាភូមិភាគ៥ ក៏លេចមុខជនសង្ស័យរូបនេះមកធ្វើសកម្មភាពឆក់កាបូបតែម្តង ដោយក្នុងកាបូបមានលុយមួយចំនួន, ទូរស័ព្ទដៃអាយហ្វូន6plus មួយគ្រឿងផងដែរ ។ បច្ចុប្បន្ន ជនសង្ស័យត្រូវបានប្រគល់ទៅការិយាល័យជំនាញ ដើម្បីចាត់ការតាមច្បាប់ ។ រីឯកាបូបនិងសម្ភារ ត្រូវបានប្រគល់ទៅម្ចាស់ដើមវិញ ។
ចែករំលែកព័តមាននេះ