រាជធានីភ្នំពេញ ៖ ព្រះអង្គម្ចាស់ធម្មិកោ មន្ត្រីជាន់ខ្ពស់គណបក្សសង្គ្រោះជាតិគឺកំពុងតែបោកប្រាសរាស្ត្រ រឿងសន្យាទាមទារយកទឹកដីកម្ពុជាក្រោមមកវិញ បើបក្សប្រឆាំងឈ្នះការបោះឆ្នោតជាតិឆ្នាំ២០១៨ ហើយឈានទៅដឹកនាំរាជរដ្ឋាភិបាល។
រាជធានីភ្នំពេញ ៖ ព្រះអង្គម្ចាស់ធម្មិកោ មន្ត្រីជាន់ខ្ពស់គណបក្សសង្គ្រោះជាតិគឺកំពុងតែបោកប្រាសរាស្ត្រ រឿងសន្យាទាមទារយកទឹកដីកម្ពុជាក្រោមមកវិញ បើបក្សប្រឆាំងឈ្នះការបោះឆ្នោតជាតិឆ្នាំ២០១៨ ហើយឈានទៅដឹកនាំរាជរដ្ឋាភិបាល។
អ្នកនាំពាក្យគណបក្សប្រជាជនកម្ពុជាលោក សុខឥសាន បានឲ្យដឹង នៅថ្ងៃទី២៦ ខែមិថុនាថា ព្រះករុណា ព្រះបាទសម្តេចព្រះ នរោត្តម សីហនុ ព្រះបរមរតនៈកោដ្ឋ ត្រូវបានប្រជារាស្ត្រខ្មែរ ទាំងក្នុង និងក្រៅប្រទេស ប្រសិទ្ធនាមព្រះអង្គថាជាព្រះវរបីតាជាតិ ជាអ្នកស្នេហាជាតិជាងគេទាំងអស់ ។ ក្នុងឋានៈព្រះអង្គជាព្រះបីតាជាតិ ព្រះអង្គបានធ្វើព្រះរាជបូជនីយកិច្ចទាមទារឯករាជ្យពីអាណានិគមនិយមបារាំង ពុះពារគ្រប់ឧបសគ្គ ដើម្បីប្រជាជាតិកម្ពុជា ដែលការលះបង់របស់ព្រះអង្គបានត្រឹមទឹកដីកម្ពុជាបច្ចុប្បន្ននេះ គឺក្នុងក្រឡាផ្ទៃ១៨១.០៣៥ គីឡូម៉ែត្រការ៉េ ប៉ុណ្ណោះ ដោយព្រះអង្គឈ្វេងយល់ថា មិនអាចទាមទារបានទឹកដីកម្ពុជាក្រោមមកវិញទេ ។
លោក សុខ ឥសាន បានបន្តទៀតថា នៅក្នុងព្រះរាជសារលិខិតរបស់ព្រះអង្គផ្ញើរជូនលោក ផាំ វ៉ាន់ដុង នាយករដ្ឋមន្ត្រីវៀតណាម នាឆ្នាំ១៩៩៩ ក៏ព្រះអង្គបានបញ្ជាក់ថាដែនដីកម្ពុជាក្រោម រួមទាំងកោះត្រល់ និងកោះមួយចំនួនទៀតបានបាត់បង់រួចទៅហើយ ដោយសារបារាំងបានកាត់ទៅឲ្យវៀតណាម ។
អ្នកនាំពាក្យបក្សកាន់អំណាចបានបញ្ជាក់ថា៖ «ដូច្នេះបើសម្តេចព្រះបីតាឯករាជ្យជាតិ ព្រះ នរោត្តម សីហនុ មិនអាចទាមទារដែនដីកម្ពុជាក្រោមបានមកវិញនោះ ហើយទ្រង់ធម្មិកោ ដែលត្រូវជាក្មួយព្រះករុណា ថាអាចទាមទារមកវិញបាននោះ មានតែធម្មិកោខ្លាំងជាងព្រះករុណាព្រះនរោត្តម សីហនុ? ស្នេហាជាតិជាង សម្តេចព្រះនរោត្តម សីហនុ?»។
លោកបានដាក់សំណួរថា៖ «តើប្រជារាស្ត្រខ្មែរជឿថា ទ្រង់ធម្មិកោស្នេហាជាតិជាងសម្តេចឳ សម្តេចតា សម្តេចតាទួតយើងដែរប្ញទេ។ បើមិនជឿថា ធម្មិកោស្នេហាជាតិជាងសម្តេចឳ សម្តេចតា សម្តេចតាទួត យើងទេ មានតែធម្មិកោភូតកុហក់ប្រជារាស្ត្រខ្មែរ យ៉ាងពិតប្រាកដ។ កុំចង់បោកប្រាស់អី ទ្រង់ធម្មិកោ មិនខ្មេះទេ រឿងកម្ពុជាក្រោមនោះ» ។
មានព្រះរាជបន្ទូលនៅចំពោះមុខពលរដ្ឋ និងព្រះសង្ឃក្នុងពិធីរំលឹកការចងចាំការបាត់បង់ទឹកដីកម្ពុជាក្រោមកាលពីល្ងាចថ្ងៃទី២៥ ខែមិថុនា នៅវត្តចាស់ ស្ថិតក្នុងខណ្ឌជ្រោយចង្វា អតីតទីប្រឹក្សាផ្ទាល់របស់អតីតព្រះមហាក្សត្រ ព្រះបរមរតនកោដ្ឋ និងជាមន្ត្រីជាន់ខ្ពស់គណបក្សសង្គ្រោះជាតិព្រះអង្គម្ចាស់ស៊ីសុវត្ថធម្មិកោបានសន្យាថានឹងទាមទារទឹកដីកម្ពុជាក្រោម ពីវៀតណាមមកវិញ ក្រោយគណបក្សប្រឆាំងឈ្នះឆ្នោតឆ្នាំ២០១៨។ព្រះអង្គបានបន្តថា៖ «ទឹកដីកម្ពុជាក្រោម គឺជាទឹកដីរបស់ខ្មែរ ដូច្នេះយើងត្រូវតែរួបរួមគ្នាពួតដៃគ្នារំដោះទឹកដីកម្ពុជា ហើយយកមកភ្ជាប់ជាមួយទឹកដីព្រះរាជាណាចក្រកម្ពុជាឡើងវិញ។ ខ្ញុំប្ដេជ្ញាចិត្ត ហើយនឹងតស៊ូមតិនៅក្នុងគណបក្សសង្គ្រោះជាតិ »។
ចំពោះបញ្ហាទឹកដីកម្ពុជានេះដែរសម្តេចតេជោ ហ៊ុន សែន នាយករដ្ឋមន្ត្រីតែងព្រមានជាញឹកញាប់ថា អ្នកដែលចង់បានកោះត្រល់ ឬទឹកដីកម្ពុជាក្រោមមកវិញ នឹងជាបក្សដែលបង្កើតសង្គ្រាមជាមួយប្រទេសជិតហើយ។
ចែករំលែកព័តមាននេះ